Read Yucateco Jeremías 12 Bible Online

Jeremías 12 - Yucateco bible

Jeremías 12

¹Yuumtzil wa quin dzáiquinbáa japlanchi' ta wéetele' láili' teech ca wa'alic u jaajile' quex túun beyo' quin káat chi'itic ti' teech ba'ax o'olal cu yúuchul le ba'alo'oba'. ¿Ba'ax ten cu bin utzil ti' le j loolob wíinico'obo'? ¿Ba'ax o'olal jéedzel u cuxtal le j kex óolo'obo'?

²Teche' ta beetaj u síijilo'ob, leti'obe' j p'áato'ob ti' jun p'éelili' cúuchil, nuucchajo'ob, cu yila'al u yich u meyajo'ob. chéen yéetel u chi'ob cu qui'iqui' t'antiquecho'ob, ba'ale' u pucsi'ikalo'obe' náach yanilo'ob ti' teech.

³Yuumtzil teche' a kaj óolen, a wojel ba'ax yaan tin tuucul, wa in yaabiltmajech, wa ma'. ¡Bis le máaco'ob bey j tamano'ob cu bisa'alo'ob j quíimsbile'; dzáa u chíiculalo'ob u ti'al u kiinil quíimsaj!

⁴¿Tac ba'ax kiin cu bin j p'áatal tiquin le lu'uma' tac ba'ax kiin u xu'ulul u tijil u le'ilo'ob u xíiwilo'ob le káaxo'? Le ba'alche'ob yéetel le ch'íich'o'obo' táan u quíimilo'ob tu yo'olal u kasa'anil u cajnáalilo'ob u múuch' caajilo'ob le lu'uma' cu tucultico'obe' ma' táan a wilic ba'ax cu beetico'ob.

⁵Wa séeb a ca'anal iquil a wáalcab tu paach le máaco'ob xíimbal u bino'obo', ¿bix bíin lajqueet áalcabnaquech yéetel le cu bino'ob yóokol tzíimino'? Tu'ux jáanil cúuchile' utz ta wu'uyajicabáa, ¿ba'ale' ba'ax ca bin a beet ichil u su'il u káaxilo'ob Jordán?

⁶Tac a sucu'uno'ob a wéet ki'ikele' dzo'oc u beetico'ob kaas ti' teech, ta paache' cu yawat poch'iquecho'ob. Ma' a wocsic a wóol ti'ob, quex ca u qui'iqui' t'antecho'ob.

⁷Dzo'oc in xúump'attic in caajal, le ba'ax in ti'alintmaj ca'ache', tin tzelaj. dzo'oc in kubic tu kab u aj p'eeco'ob le múuch' caajo'ob in seten yaabiltmaj ca'ache'.

⁸Leti'e' caaj in ti'al ca'ache', bejela'e' bey jun túul u leónil káaxe'; cu dzíiquil quéen u yilen, le beetic in p'ectmaj.

⁹In caajale' bey jun túul ch'íich' jadzutz u ku'ukmele' le t o'olal cu ja'adzal tumen u yéet ch'íich'ilo'ob. ¡Co'otene'ex tuláacal ko'okox ba'alche'ex, u ti'al múul janale'ex!

¹⁰Ya'ab u nuuquilo'ob aj p'eeco'ob, dzo'oc u kascuntico'ob in x péetpach, tu pepe'eche'etajo'ob in cool. Dzo'oc u sutico'ob x tocoyil, le lu'um in asab yaabiltmaj ca'acho'.

¹¹Sutajo'ob x tocoy lu'umil, chakan tu p'atilaco'ob, tene' quin wilic bix u yaayaj óolticubáa. Tuláacal u caajilo'ob x tocoychaja'ano'ob, ba'ale' mix máac cu tuclic u beetic wa ba'ax.

¹²Ti' tuláacal u jo'ol lu'umilo'ob chakan j taal loolob wíinico'ob, tumen teen Yuumtzile', yaan ti' teen jun p'éel máascab ca'amat u yej u ti'al in láaj xu'ulsic le múuch' caajo'oba', ti' mix jun p'éel bíin yanac jéedzel.

¹³Tu pakajo'ob trigo ca tu jochajo'ob ki'ix; tuláacal meyajo'obe' chéen cunelchaji. Láaj kaschaj u yich u meyajo'ob tu yo'olal in seten p'uja'anil.

¹⁴Bey cu ya'alic Yuumtzil ti' le loolob caajo'ob u bakpachtmajo'ob Israel, le dzo'oc u xu'ulsico'ob le lu'um tu dzaj Yuumtzil bey kamba'albáil ti' u caajal Israel: Tene' bíin in tzelo'ob tu lu'umilo'ob, yaan in jóokesic Judá ichilo'ob.

¹⁵Ba'ale' cu dzo'ocol in tzelico'obe' bíin in ca'a ch'a'a óotzilil ti'ob, yaan xan in beetic u suuto'ob tu caajalo'ob yéetel tu lu'umo'ob.

¹⁶Tu jaajile', leti'ob ca'anbes in caajal jalach t'aan tu kaaba' Baal, ba'ale' bejela'e' je'el u p'áatalo'ob ichil in caajale', wa jach tu jaajil u yóolo'ob u kamico'ob u yocsaj óolal in caajal, wa xan cu jalach t'aano'ob tin kaaba' beya': Tu yo'olal u cuxtal Yuumtzil.

¹⁷Ba'ale' ti' le múuch' caajo'ob ma' bíin u yu'ubo'ob in t'aane', bíin in joc tac tu mootz, u ti'al in láaj xu'ulsic. Teen Yuumtzil, teen a'alic.