Read Yucateco Jeremías 14 Bible Online

Jeremías 14 - Yucateco bible

Jeremías 14

¹Tu yo'olal yáax kiine', Yuumtzile' tu t'anaj Jeremías, ca tu ya'alaj ti':

²Judae' cu yokol tu yo'olal u yóotzil óolal tu caajilo'obe', u cajnáalilo'obe' yaj u yóolo'ob, pequecbalo'ob j lu'um. Jerusalén cu yawat tu yo'olal u mukyaj.

³Le ayikalo'obo' cu túuxtico'ob u palitzilo'ob u caxto'ob ja'; leti'obe' cu bino'ob tu'ux yaan chultuno'ob, ba'ale' ma' tu caxtico'ob ja'i', cu suuto'ob yéetel u p'uulo'ob x ma' ja'il; péeca'an u yóolo'ob, sublaco'ob tu yo'olal ma' tu caxtajo'obi', cu pixico'ob u yicho'ob.

⁴Colnáalo'obe' cu yu'ubico'ob péeca'an u yóolo'ob tu yo'olal ma' tu bin utzil ti'obe' cu pixico'ob xan u yicho'ob tu yo'olal ma' káaxal ja'e' le lu'umo' cu tijil.

⁵Tac le x quéejo'ob te j káaxo' cu p'atico'ob u paalo'ob táant u síijilo'ob, tumen mina'an xíiw u jaanto'ob.

⁶Le ko'oko'ox burroo' wa'alacbalo'ob tu yóokol x tocoy jo'ol lu'umo'ob cu jéesbalo'ob beyo'ob u peekilo'ob káaxe'; u sáasilil u yicho'obe' cu p'áatal budzucnac tumen mina'an xíiw u ti'al u jaanto'obe'.

⁷¡Yuumtzil, quex cu taquic c pool c kebane', beet ba'ax u najmal tu yo'olal u tzicbe'enil ta kaaba'! Ya'ab u téenel j kexmajech, j kebanchajo'on ta táan.

⁸U alab óolalech Israel, c aj tocsajil ti' kiino'ob talamtac, ¿ba'axten beyech jun túul j táanxel lu'umil, beyech jun túul u'ulab cu p'áatal u máans áakabe'?

⁹¿Ba'axten beyech jun túul máac saatal u yóol, bey jun túul aj ba'atel ma' tu páajtal u yáantaje'? Ba'ale' Yuumtzil, teche' ti' yanech ichilo'one', tuláacal máax ojéeltmail to'one' a caajalo'on; ¡ma' a p'atico'on!

¹⁰Yuumtzile' bey cu ya'alic tu yo'olal u caajil Israel: Le caaja' utz tu t'an u máan chéen beyo'. Le t o'olale' kaas u lúubul ti' teen. Bejela'e' bin in ca'aj in ka'ajes u kebano'ob, ca xan u cáanto'ob u kebano'ob.

¹¹Yuumtzile' tu ya'alaj ti' teen: Ma' a káat óoltic ti' teen ca xi'ic utzil ti' le caaja'.

¹²Je'el buca'aj ca su'ukinake', ma' bíin in wu'uy u káat óolali'; je'el buca'aj láaj tóocbil ba'alche' yéetel u ti'ibil óolalilo'ob janalbe'en neeko'ob ca u tass ti' tene', ma' bíin in wil wa utz. Yaan in xu'ulsic yéetel ba'atelil, wi'ij yéetel báan quíimil.

¹³Ca túun ti' núucaj: Yuumtzil, le aj bóobato'obo' táan u ya'alico'ob ti' le caaja', ma' tu bin j antal ba'atel mix wi'ij, teech xane', bíin a dzáa jun p'éel jéedzel yaan u xáantal ti' le cúuchila'.

¹⁴Ca túun tu núucaj ti' teen Yuumtzil: Wa bey u táan le aj bóobato'ob tin kaaba'o', táan u tuuso'ob. Tene' ma' in wa'al ti'ob mix ba'ali' mix tin túuxtajo'obi'. Chéen tus náayo'ob cu taal tu koja'an tuuculo'ob.

¹⁵Teen Yuumtzil, teen a'alic, tu yo'olal le aj bóobato'ob táan u dzáicuba'ob j t'aan tin kaaba', ma' jaaj wa teen j túuxto'obi', cu ya'alico'ob bin, ma' bin yanchajac ba'ateli' mix wi'ij te j caajo', le aj bóobato'obo' bíin quíimico'ob ich ba'atel, wi'ij xan bíin quíimsico'ob.

¹⁶Te j caaj tu'ux cu bino'obo', láili' bíin quíimico'ob ichil ba'atelil bey xan yéetel wi'ij pa'ate' yéetel u yatano'ob, u j xibil paalal u x ch'upul paalal. U quimen wíinclilo'obe', tu bejilo'ob Jerusalén cu bin pulbilo'ob, tumen ma' bíin yanac máax muquico'obi'. Bey quin in beet u bo'otico'ob u si'ipilo'ob.

¹⁷A'al ti' le caaj beya': Jóokoc x ma' je'elel u ja'il a wich, bul kiin, bul áakab, yo'olal u numyajil yéetel u talam mukyaj in caajal.

¹⁸Quin jóokol j káaxe', quin wilic jayacbal quimeno'ob ich ba'atel; quin wocol te j caajo' quin wilic máaco'ob táan u quíimilo'ob yéetel wi'ij. Tac le aj bóobato'ob yéetel le aj kiino'obo', táan u bino'ob táanxel lu'umil.

¹⁹Yuumtzil, ¿jach tu jaajil dzo'oc a dzáic jun tzéelil u caajil Judá? ¿Dzo'oc u náacal a wóol tu yo'olal u noj caajil Sión? ¿Ba'ax teen ta túuxtaj t óokol jun p'éel loob mina'an dzaaquil ti'? Táan c pa'atic ca'ach u bin to'on utzil, ba'ale' mix ba'al ma'alob kuchuc ti' to'on. Táan c pa'atic ca'ach toj óolale', ba'ale' chéen ja'asaj óol j kuchi'.

²⁰Yuumtzil c kaj óoltic c kasa'anilo'ob bey xan u si'ipil c máanja'an ch'i'ibalo'ob; dzo'oc kebanchajal ta taan.

²¹¡Yo'olal u tzicbe'enil a kaaba'e' ma' a tzelico'on ma' a p'ectic a caajal tu'ux yaan u nojbe'enil a káanche'! ¡Ka'ajac ti' teech le nup t'aan ta beetaj t éetel, ma' a tu'ubsic!

²²¿Yaan wa ba'ax ichil le mentbil kuob cu páajtal u beetic u káaxal ja'? ¿Chéen wa tu juunal cu túuxtic cháac le ca'ano'? ¡Ma' c Yuumtzil, yéetel c Ku! Teech túuxtic, teech beetic tuláacal ba'alo'ob; ¡le t o'olal pa'atic áantaj chéen ti' teech!