Read Yucateco Jeremías 15 Bible Online

Jeremías 15 - Yucateco bible

Jeremías 15

¹Yuumtzile' tu ya'alaj ti' teen: Quex ca talaco'ob Moisés yéetel Samuel tin táane', ma' tin in ch'a'a óotzilil ti' le caaja'. A'al ti'obe' ca xi'ico'ob, ma' in káat in wilo'obi'.

²Wa cu káat chi'itico'ob tu'ux bíin xi'ico'obe', a'al le ba'ax quin wa'alica': Le máaxo'ob yéeya'ano'ob j quíimil ti' bam quíimile', ti' báan quíimil bíin dzo'oco'ob, le máaxo'ob yéeya'ano'ob j quíimil ti' ba'atele', ichil ba'atel bíin quíimico'ob; le máaxo'ob yéeya'ano'ob j quíimil yéetel wi'ije', yéetel wi'ij bíin quíimico'ob; le máaxo'ob yéeya'ano'ob j bisbil táanxel lu'ume', táanxel bíin bisa'aco'ob.

³Teen Yuumtzil, teen a'alic: Bin in ca'aj tu'ux ti' te'ex can p'éel jejeláas jaadzo'ob: bíin quíimsa'aco'ob ich ba'atel, bíin jíiltaco'ob tumen peeko'ob, bíin jaanta'aco'ob tumen j ch'oomo'ob, bey xan tumen u ba'alche'ilo'ob káax.

⁴Bíin in beet u cha'ico'ob sajaquil tuláacal u caajilo'ob lu'um, le quéen u yilo'ob le ba'ax bíin in beet yéetelo'ob, tu yo'olal ba'ax tu beetaj tu caajil Jerusalén u ajawil Judá, Manasés, u paal Ezequías.

⁵¿Máax bíin ch'a'ic óotzilil ti' Jerusalén? ¿Máax bíin yaachajac u yóol ta wo'olal? ¿Máax bíin yaayaj tuuculnac tu yo'olal a toj óolal?

⁶Teche' ta xúump'attajen, ta sutaj a paach ti' teen. Teen Yuumtzil, teen jajcuntic. Le t o'olalo' tene', dzo'oc u ca'anal in chuca'an óolal, tin líikesaj in kab u ti'al in jadziquech, ca tin jenajech.

⁷Tin ki'itbesaj a cajnáalilo'ob bey sojole' ca tin jóokesajo'ob tu caajilo'ob le múuch' caajo'obo'; tin p'ataj x ma' paalal in caajal, tin jenaj tumen ma' tu yóoltaj u p'at u kaakas cuxtali'.

⁸Tin p'ataj ichilo'obe' ya'ab x quimen íicchamo'ob, ti' sáam lu'um yaan tu jáal ka'anabo'. chúumuc kiin tin beetaj u lúubul le quíimilo' yóokol le maama yéetel u táanquelem paalal; tin cha'aj u lubul yóokolo'ob okom óolal yéetel sajaquil.

⁹Le maamatzilo'ob ya'ab u paalale' cu lúubulo'ob, cu cu'upul u yiko'ob, sublaco'ob yéetel cabalcunta'an u yóolo'ob, u sáasil kiine' suunaj éekjoche'enil. Wa máax cu p'áatal cuxa'ane' quin beetic u quíimsa'al tumen u aj p'eeco'ob. Teen Yuumtzil, quin dzáic u t'aanil.

¹⁰¡Óotzilen in maama, ta síijsen chéen u ti'al in japlan chi' ba'atel yéetel tuláacal yóokolcaab! Ti' mix máac in páay taakin, mix páaya'ac teni', quex túun beyo' tuláacal cu loolob t'anqueno'ob.

¹¹U loolob t'aano'obe' béeychajac, Yuumtzil, wa ma' in meyajtech ma'alobi', wa ma' payalchi'inajen yo'olal in aj p'eeco'ob, le taan yano'ob ich numyajil yéetel yaayaj óolal.

¹²¿Máax cu páajtal u cachic u hierroi yéetel u broncei' le j xamano'?

¹³Yo'olal tuláacal a kebane' Israel, bin in ca'aj in kub ti' aj p'eeco'ob a ayikalil yéetel a ta'acumbil taakin tuláacal ba'ax yaan ta lu'umil, u ti'al ca bisa'ac chéen beyo'.

¹⁴Yaan in beetic a palitzilta'al tumen a aj p'eeco'ob ti' jun p'éel lu'um ma' a kaj óoli' tumen in p'ujulile' dzo'oc u t'aabal bey jun p'éel káak bíin jabiquech.

¹⁵Yuumtzil teech a wojel tuláacal ba'al, ¡Ka'ajaquen ti' teech u ti'al ca taaquech a wáanten! ¡Sut u jeel kaas ti' máaxo'ob ch'a'apachtiquen! ma' u jach chúucpajal a wóol yéetelo'ob, bic a p'at in quíimil; ile, ta wo'olale' quin mukyajtic pooch'ilo'ob.

¹⁶Le ca'ach quéen a t'anene', tene' quin láaj dzo'ocbesic a t'aan; leti'obe' ca'ach u qui' óolal yéetel qui'imac óolal in pucsi'ikal, tumen tene' a ti'alen, Yuumtzil, Ku u yuumil tuláacal páajtal.

¹⁷Tene' tin wet'aj in much'quinbáa yéetel máaxo'ob chéen cu tucultico'ob u náaysic u yóolo'ob; líikbal tu kiinil ca ta ti'altajene' jach chéen tin t'uluch jun, tumen ta chupajen yéetel a p'u'ujul.

¹⁸¿Ba'ax o'olal mina'an u xuul in mukyaj? ¿Ba'ax o'olal in yajile' mina'an dzaac u ti'al, jach ma' tu yóoltic utztal? In ti'al tene', beyech chéen u tuusil ja' cu yila'al ti' jun p'éel waya'asbe'ene'.

¹⁹Yuumtzil túune' tu núucaj ti' teen: Wa ca suut tin wicnale', quin ca'a kamiquech beyo' bíin páatac a meyajtiquen. Wa cu jáawal a wa'alic ma' nu'uca'an t'aan, yéetel ca wa'alic chéen ba'ax u najmale', teech bíin t'aanaquech tin wo'olal. Leti'ob u najmal u suuto'ob ti' teech ma' teech u najmal a suut ti'obi'.

²⁰Teen bíin in beet ca béeychajaquech u ti'al le caaja' bey je'el bix jun p'éel u pakil bronce, talam u pa'abal u muuk. Bíin u ba'ateltecho'ob, ba'ale' ma' bíin páataco'ob ta wéeteli', tumen téene' ti' yanen ta wéetel u ti'al in toquech yéetel u ti'al in jáalkabtech. Teen Yuumtzil, teen a'alic ti' teech.

²¹Bíin in jáalkabtiquech ti' u páajtalil le j loolob máaco'obo', ¡Bíin in toquiquech ti' u páajtal le j loolob quíimico'obo'!