Read Yucateco Jeremías 16 Bible Online

Jeremías 16 - Yucateco bible

Jeremías 16

¹Yuumtzile' tu ya'alaj ti' teen:

²Ma' u dzo'ocol a beel mix u yantal a paalal te j lu'uma'.

³Tumen téen Yuumtzile', bin in ca'aj in wa'al ti' teech ba'ax bíin úuchuc ti' le paalal cu bino'ob j síijil te j lu'uma' yéetel ti' u taataob.

⁴Kaakas koja'anilo'ob bíin quíimsico'ob, mix máac bíin oktico'ob mix máac bíin muquico'ob, bíin p'áataco'ob jayacbalo'ob lu'um bey u ta' wacaxe'. Ba'atel yéetel wi'ij bíin xu'ulsico'ob, le quimeno'obo' ch'oomo'ob yéetel ba'alche'ob bíin jaantico'ob.

⁵Tu ya'alaj xan ti' teen Yuumtzil: Ma' a wocol ti' jun p'éel naj tu'ux yaan okom óolal tu yo'olal jun túul quimen; ma' a wokol mix a we'esic yaj óolal, tumen dzo'oc in lukesic ti' le caaja' in jéedzel, in yaacunaj yéetel in ch'a'a óotzilil. Téen Yuumtzil, teen a'alic.

⁶Nucuch máac yéetel mejen paalal cu bino'ob j quíimil te j lu'uma'; mix máac bíin muquico'ob, mix okoltic, mix bíin u ye'es yaj óolal wa cu kilic u wíinclil ma' xan bíin koliscuntubái.

⁷Mix máac bíin u kiinbes noj janal u ti'al u líiksa'al u yóol u láaktzilo'ob le quimeno', quex wa u taata, wa maama.

⁸Ma' xan a wocol ti' jun p'éel naj ukul yéetel janal tu'ux yaan noj janal,

⁹Tumen téen Yuumtzil u yuumil tuláacal páajtalil, u Ku Israel, quin wa'alic: Teen bíin in beet u xu'ulul te j lu'uma' u kaayilo'ob cha'an, qui'imac óolal yéetel u kaayilo'ob dzo'ocol beel. Lela' láili' ta kiinile'ex cu bin j úuchul, te'ex xan bíin a wile'ex.

¹⁰Le quéen a wa'al ti' le caaj le péectzila', yaan u káat chi'itico'ob ti' teech, ¿Ba'ax óolal cu bin u taas Yuumtzil le nojoch kaas t óokola'? ¿Ba'ax loobil dzo'oc beetic? ¿Ba'ax kebanil dzo'oc c beetic tu taan Yuumtzil c Ku?

¹¹Teche' núuc ti'ob, Yuumtzile' cu ya'alic beya': Cu yúuchul, tumen a máanja'an ch'i'ibale'exe' tu p'atajeno'ob ca j bino'ob tu paach u láak kuob, u ti'al u dza'ob kultaj yéetel tzicbe'enil ti'ob; tu p'atajeno'ob ma' xan tu dzo'ocbesajo'ob in tzol xiquini'.

¹²Te'exe' talam ka'ajsa'ane'ex asab ti' a máanja'an ch'i'ibale'ex, tumen jujun túule' tu pechajubáa u beet ba'ax tu yóoltaj, ma' xan ta wu'uyaje'ex in t'aani'.

¹³Le t o'olale' in ca'aj in tojolch'inte'ex te j lu'uma' tac ti' jun p'éel lu'um ma' a kaj óoltmaje'exi', mix tumen a úuchben ch'i'ibale'exi', ti' bíin a meyajte'ex bul kiin yéetel bul áakab, u láak kuobi', tumen ma' bíin in ch'a'a ti' te'ex óotzil.

¹⁴Ba'ale' bíin talac jun p'éel kiine' Teen Yuumtzil, teen a'alic ma' bíin u jalach t'anto'ob beya': Tu yo'olal u cuxtal Yuumtzil, máax jóokes le j israelitaob tu lu'umil Egipto,

¹⁵ba'ale' u najmal u ya'alico'ob: Tu yo'olal u cuxtal Yuumtzil máax jóokes le j israelitaob tu lu'umil j xaman, yéetel tuláacal u jeel lu'umo'ob tu'ux tu ki'itbesajo'ob. Teen bíin in beet a suute'ex ta lu'ume'ex, le lu'um tin dzaj ti' a máanaja'an ch'i'ibale'exo'.

¹⁶Yaan in beetic u taal ya'ab aj chuuco'ob teen Yuumtzil jajcuntic u ti'al ca u chuco'ob le israelitaobo'. Cu dzo'ocole' quin beetic u taal aj dzo'ono'ob u ti'al ca dzo'onco'ob, yéetel ca jóokesa'aco'ob te j káaxo'obo', te j pu'uco'ob tac le yano'ob ichil u jeetlil le cháaltuuno'obo',

¹⁷Tumen táan in wilic tuláacal ba'ax cu beetico'ob, mix jun p'éel bíin p'áatac ma' in wiliqui', mix u kebano'ob bíin páatac mucul ti' in paacat.

¹⁸Táanile' yaan in beetic u bo'otico'ob u ca'amat kebano'ob yéetel kasa'anilo'ob, tumen tu manba'alcuntajo'ob in lu'umil yéetel u p'ecbe'en quimen kuob, yéetel ti' tuláacal le lu'um tin dzaj bey kamba'albáile', tu beetajo'ob ba'alo'ob in p'ecmaj.

¹⁹Yuumtzil, in muuk, in canan, in ta'acbe'enil tu chi' quíimil; ti' teech bíin talac le caajo'obo' líikbal tu xuul u caajilo'ob lu'ume', bíin a'ala'ac ti' teech: Chéen tuusil kuob ma' páajtalil tu kamo'ob c taataob bey kamba'albáile'.

²⁰¿Wíinique' cu páajtal u beetic u kuob? ¡Wa máax beetique', ma' u jaajil kuobi'!

²¹Le t o'olale' jun puli' in ca'aj in we'es ti'ob in páajtalil; beyo' je'el u yojéeltico'obe' in kaaba'e' Yahveh.