Read Yucateco Jeremías 17 Bible Online

Jeremías 17 - Yucateco bible

Jeremías 17

¹Judá a kebane' dzíibta'an yéetel cincel fierro u ca'aj, t'óoja'an yéetel u ni' took tu tuunichil a pucsi'ikal, tu yóokol baaco'ob u multuunil a kultajo'ob.

²A paalale' cu ka'ajal ti'ob le multuunil kultajo'ob bey xan le quili'ich chuun che'ob yano'ob ca'ach tu tzéel le che'ob cocojqui u le'ob bey xan le yano'ob yóokol a ca'anal jo'ol lu'ume'ex

³yéetel yóokol u pu'uquilo'ob le coolo'obo'. Tu yo'olal a kebano'obe', bíin in beet u yocla'al ba'ax yaan ti' teech, bey a ayikalilo'ob, bey xan ca xakla'ac quili'ich jo'ol lu'umil.

⁴Bíin a p'at le lu'um tin dzaj ti' teech bey kamba'albáile', bíin in beet ca palitzilta'aquech tumen a aj p'eeco'ob ti' jun p'éel lu'um ma' a kaj óoli', tumen in p'ujulile' dzo'oc u léequel bey jun p'éel káak bíin u jabeche'.

⁵Yuumtzile' cu ya'alic: Loolob t'anta'ac le máax cu tzelic u pucsi'ikal ti' teen, cu dzáic u alab óolal ti' wíinico'ob ti' leti'ob xan cu caxtic áantaj.

⁶bíin béeyac je'el bix u cojquéejil x tocoy lu'ume', ma'atech u táan óolta'al: cu ch'íijil bin ichil tuunicho'ob, tu lu'umilo'ob ta'ab, tu'ux mix máac cajacbali'.

⁷Ba'ale' utz yanil le máac cu kubic u yóol ti' teen, cu dzáic u pa'atajil ti' teen.

⁸Bíin béeyac je'el bix jun cúul che' paka'an tu jáal jun p'éel áalcab ja'e', u mootzo'obe' cu chucla'antic tac tu'ux cu yáalcab ja' ma' tu péec u yóol quéen kuchuc ooxowilo'obo', tumen u ya'ax le'e' mantadz cocojqui. Tu kiinilo'ob yáax kiine' ma'atech u cu'upul yiik, ma' xan tu jáawal u yichanquil.

⁹Mina'an u láak ba'al cu tuus yéetel sen kasa'ane' je'el bix u pucsi'ikal wíinique' ¿Máax je'el u páajtal u ch'a'a nu'uctic bixe'?

¹⁰Teen Yuumtzile', quin xakal ilic le pucsi'ikalo' in kaj óol tac u dzu' le tuuculo'; máax dzáic ti' jujun túul ba'ax cu najmatic, je'el ba'axo'ob tu beetaje'.

¹¹Le máax cu ayikalchajal ma' tu beele' bey jun túul noom cu wíinictic u ye'el yaanal ch'íiche'. Jach tu táanquelmil bíin u p'at u ayikalil. tu xuule', cu p'áatal chéen jun túul j ma' na'at.

¹²C kulnaje' jun p'éel nojbe'en jalach káanche', líikbal tu yáax chuun, ca'anal dza'abic.

¹³Yuumtzil teech u alab óol Israel, tuláacal máax p'atiqueche' bíin p'áatac ich subtzilil. Tuláacal máax cu náachtal ti' teche' bíin sa'atac bey jun p'éel kaaba' dzíibta'an yóokol ma'ay lu'ume', tu yo'olal tu p'atajech, teech u sayabil síis ja'.

¹⁴Yuumtzil, dzáa in toj óolale' beyo' je'el in wutztale'; toqueni', ca yanchajac ti' teen tocsajil, tumen chéen teech quin qui'iqui' t'antiquech.

¹⁵Le máaco'obo' cu ya'alico'ob ti' teen: ¿Ba'ax úuch yéetel u t'aano'ob Yuumtzil? ¡Ca béeychajac jun puli' bejela'e'!

¹⁶Ba'ale' tac bejela'e' ma' in babal káat ca a tu'ux noj yaj ti'obi'. mix tin dzíiboltaj talam kaas ti'obi' teche' jach a wojel ba'ax tin wa'alaj, tumen tin wa'alaj ta táan.

¹⁷Ma' a suticabáa quiquil ja'asaj óolal tumen teech in j ta'acbesaj tu kiinilo'ob yaayaj óolal.

¹⁸Paj u subtal máaxo'ob ch'a'apachtqueno'ob, ma' ti' teni'; leti'ob ca ja'akac u yóolo'ob, ma' teni'. Beet u lúubul yóokolo'ob yaayaj óolal, láaj xe'exe'eto'ob jun puli'.

¹⁹Yuumtzile' tu ya'alaj ti' teen: Xeene' ca wa'alaquech tu Jool Caaj, tu'ux cu yocol yéetel cu jóokol u ajawilo'ob Judá, cu dzo'ocole' beet láili' ti' tuláacal u jool caajilo'ob Jerusalén.

²⁰A'al ti' le máaco'obo': Ajawe'ex yéetel tuláacal u cajnáalilo'ob Judá, yéetel u cajnáalilo'ob Jerusalén ca woocle'ex te j joolo'oba', u'uye'ex u t'aan Yuumtzil.

²¹Yuumtzile' cu ya'alic: sábadoe', tu yo'olal in cha'ic óotzilil ti' a cuxtale'exe', ma' a bisique'ex cuuch mix a wocsique'ex tu jolo'ob Jerusalén.

²²Mix xan a jóokesique'ex cuuch ta wotoche'ex sábado, mix a beetique'ex mix jun p'éel meyaj. Jun páaycunte'ex ti' teen sábado, je'el bix tin wa'alaj ti' a wúuchben ch'i'ibale'exo'.

²³Ba'ale' leti'obe', ma' tu táan óolteno'obi' mix tu yu'ubajo'ob in t'aani', ba'ale' j dzu'uychaj poolo'ob, ma' tu yóotajo'ob u yu'ubo'ob in t'aani', mix tu yóoltajo'ob canbali'.

²⁴Teen Yuumtzil, teen a'alic: Tu jaajil u'uye'ex in t'aani', ma' a bisique'ex mix jun p'éel cuuch tu joolilo'ob caaj sábado; jun páaycunte'ex in ti'alt le kiina', ma' beetique'ex mix jun p'éel meyaj.

²⁵Wa ca beetique'ex beyo', mantadz cu bin j antal ajawo'ob cu bino'ob j cutal tu jalach káanche' David, bey xan ca ococo'ob tu joolo'ob le caaja' ti' bolano'ob yéetel tzíimino'ob, j láakinta'ano'ob tumen u nuuquilo'ob yéetel u cajnáalilo'ob Judá yéetel Jerusalén, Jerusalene' mantadz cu bin yantal u cajnáalilo'ob.

²⁶Bíin talac máaco'ob líikbalo'ob tu caajilo'ob Judá, le yano'ob tu bakpach Jerusalén, yéetel tu táax lu'umil u cajnáalilo'ob Néguev. Bíin u taaso'ob kulnaj ba'alche'ob u ti'al láaj tocbil yéetel u ti'al u láak quíimsbil ba'alche'ob, u ti'ibil óolal jejeláas janalbe'en neeko'ob, poom yéetel u ti'ibil óolalil nib óolal.

²⁷Ba'ale' wa te'ex ma' ta dzo'ocbesique'ex in wa'almaj t'aan, ca a jun páaycunte'ex ti' sábado, ca woquesique'ex xan cuuch tu joolo'ob Jerusalene', teen túune' bíin in t'ab yéetel káak u joolo'ob le caaja', jun p'éel káak yaan u xu'ulsic u jalach najilo'ob Jerusalén, mix máac xan cu bin páatac u tupic.