Read Yucateco Jeremías 18 Bible Online

Jeremías 18 - Yucateco bible

Jeremías 18

¹Yuumtzile' tu t'anajen ca tu ya'alaj ti' teen:

²Xeen tu yotoch j pat kat, te'elo' bíin in dzáa ti' teech jun p'éel péectzil.

³Teen Jeremíase', j binen ca tin nactáantaj le j pat kato', táan ca'ach u meyaj ti' u nu'ucul u pa'atal kat.

⁴Wa ca'ach cu jóokol kaasil ti' le kat cu patic ca'acho', cu beetic u láak ba'al yéetel le kato', tac le quéen yil dzo'oc u jóokol ma'alobil je'el bix u yóoltique'.

⁵Yuumtzil túune' tu ya'alaj ti' teen:

⁶¿Ca tuclic ma' tu páajtal wa in beetic láili' bey ta wéetele'exo', israelitaex, je'el bix u beetic le j pat kat yéetel le kato'? Te'exe', tin kabe' beye'ex le kat tu kab le j pat kato'. Teen Yuumtzil, teen a'alic.

⁷Ichil jun súutuc wa in káate', tene' je'el u páajtal in joquic, lúubsic yéetel in xiixcuntic jun múuch' caaj wa jun p'éel ajawile'.

⁸Ba'ale' wa le múuch' caajo'ob cu tzéelcuba'ob ti' le kaaso', teen túune' ma' bíin in túuxt le jaadz in nu'ucbesmaj ca'acho'.

⁹Ti' u láak kiine' je'el u páajtal in líiksic wa in beetic u nojochtal jun múuch' caajo'ob wa jun p'éel ajawile'.

¹⁰Ba'ale' wa le múuch' caajo'ob cu beetic kaas mix xan tu yu'ubic in tzol xiquino'obe', ma' bíin in túuxt le utzo'ob in nu'ucbesmaj ca'ach ti'obo'.

¹¹A'al túun ti' u cajnáalilo'ob Judá yéetel ti' u cajnáalilo'ob Jerusalén, teen Yuumtzil, tene' quin wa'alic: Táan in nu'uctic ba'axo'ob quin in beet ti' te'ex; táan in tucultic in jadzique'ex. P'ate'ex le kaakas kuuxtalo'; utzquinte'ex a cuxtale'ex, bey xan ba'axo'ob ca beetique'ex.

¹²Leti'obe' bíin u ya'alo'ob ti' teech: ¡Ma' a chéen máansic kiin t éetel! P'at ca cuxlaco'on je'el bix j utz t t'aane', yéetel u dzu'uyil c poole' binel ca'ajo'on j beet ba'axo'ob cu kaakas dzíiboltic c pucsi'ikal.

¹³Le t o'olale', Yuumtzile' cu ya'alic: Káatchi'ite'ex ichil le múuch' caajo'obo', wa yaan máax dzo'oc u yu'ubic ba'al beya'. ¡U caajil Israele' dzo'oc u beetic jun p'éel ba'al jach talam kaas!

¹⁴¿Cu kuchul u kiinil wa u sa'atal le nieve yaan tu yóokol u nucuch tuunichilo'ob Líbano'? ¿Bíin sa'ap'ac wa le síis ja' cu yéemel ti' le pu'uco'obo'?

¹⁵Ba'ale' in caajale' dzo'oc u tu'ubsiquen, yéetel cu kubic poom ti' u tuusil kuob. Dzo'oc u sa'atal tu beel, leti' le úuchben bejo', táan u bin ti' bejo'ob ma' u kaj óoltmaji'.

¹⁶Beyo', dzo'oc u sutic u múuch' caajalo'ob jun p'éel x tocoyil, suunaj jun p'éel ba'al mantadz jak óolal. Tuláacal máax cu máanel te'elo' bíin u péecs u pool jaka'an u yóol.

¹⁷Tene', bey jun p'éel j lakin iike', bíin in ki'itbes Israel; bíin in beet u púudzul ti' u aj p'eeco'ob. Tene' bíin in sut in paach ti', ma' in wichi', le quéen kuchuc u kiinil u ja'adzal.

¹⁸Le máaco'obo' tu ya'alajo'ob: Co'ox tucultic bix je'el c beetic u lúubul u muuk Jeremíase'. Mix bikin u binet aj kiino'ob ca u ca'anbeso'on, mix aj ojéelajo'ob ca u tzolo'ob c xiquin, mix aj bóobato'ob u ti'al u tze'ec ti' to'on u t'aan Ku. Cone'ex taquic u pool, u ti'al ca quíimsa'ac. Ma' ocsic t óol ti' ba'ax cu ya'alic.

¹⁹¡Yuumtzil, ch'en xiquinteni'! ¡U'uy ba'ax cu ya'alico'ob in aj p'eeco'ob!

²⁰¿Yéetel kaas cu bo'ota'al le utzo'? ¡Leti'obe' dzo'oc u páanico'ob in mucnal! Ka'ajac ti' teech, queetlan ich t'aanaja'anen ta wéetel u ti'al in t'aan utz tu yo'olalo'ob, u ti'al in káatic ti' teech ca tzéel a p'uja'anil ti'ob.

²¹¡Ba'ale' bejela'e' beet u quíimil u paalal yéetel wi'ij wa tu yej máascab; ca p'áataco'ob x quimen íicchamo'ob yéetel x ma' paalal u yatano'ob! ¡Ca quíimsa'ac u j xiibilo'ob tumen báan quíimil u j táanquelemilo'obe' ca lúubuco'ob tu cúuchil ba'atel!

²²Téec tu'ux tu yóokolo'ob jun múuch' oocolo'ob; ¡ca u'uya'ac u yawato'ob yéetel sajaquilil! Tumen tu páanajo'ob jun p'éel jool u ti'al u machiqueno'ob tu dzajo'ob léecho'ob tin beel.

²³Ba'ale' teche' Yuumtzil, a wojel tuláacal ba'ax, dzo'oc u beetico'ob u ti'al u quíimsiqueno'ob. ¡Ma' a sa'atsic u kasa'anilo'ob mix a tu'ubsic u kebano'ob! ¡Beet u lúubulo'ob ta táan, jadzo'ob yéetel a p'uja'anil!