Read Yucateco Jeremías 19 Bible Online

Jeremías 19 - Yucateco bible

Jeremías 19

¹Yuumtzile' tu ya'alaj ti' teen: Xeen a man jun p'éel p'úul, ca a t'aan wa jay túul u nuuquilo'ob caaj, yéetel wa jay túul aj kiino'ob nuxibo'ob.

²Cu dzo'ocole' ca jóokol tu Táax kóom lu'umil Ben-hinom, actáan u Jool caaj cu kaaba'intic Xamach, ca a ka'ayt le péectzil bíin wa'al ti' techa'.

³A'al beya': U ajawile'ex Judá yéetel u cajnáalile'ex Jerusalén, u'uye'ex u péectzil Yuumtzil yuumil tuláacal páajtalil ti', u Ku Israel: Bin in ca'aj in túuxt jun p'éel noj yajil tu yóokol le cúuchila', tuláacal máax bíin u'uyique' bíin péecnac u yóol.

⁴Tumen le j israelitaobo' tu p'ateno'ob, tu sutajo'ob le cúuchila' bey táanxel lu'umile', te'elo' tu kubajo'ob poom ti' jela'an kuob, ma' j kaj óolta'ab, mix tumen u máanja'an ch'i'ibalo'obi', mix tumen u ajawilo'ob Judá, ca tu chupajo'ob yéetel u ki'ikel j ma' si'ipilo'ob.

⁵Cu dzo'ocole' tu beetajo'ob u multuunil kultaj u ti'al u tóoquico'ob u paalal ti' Baal, bey láaj tóocbile', ba'ax ma' tin wa'alaj ca u beeto'obi', mix tin tuucul j máani'.

⁶Le t o'olale' bíin talac kiino'ob, ti' le cúuchila' ma' bíin u kaaba'int Tofet mix u Táax lu'umil Ben-hinom, ba'ale' u Táax lu'umil Quíimsaj. Teen Yuumtzil, teen a'alic.

⁷Te j cúuchila' bíin in mixba'alcunt u kax tuuculo'ob Judá yéetel Jerusalén. Bíin in beet ca pa'abac u muuko'ob yéetel ca quíimsa'aco'ob tumen u aj p'eeco'ob, yéetel u j quimen wíinclilo'obe' meyajnaco'ob bey janal ti' j ch'oomo'ob yéetel ti' u ba'alche'ob káax.

⁸X tocoy lu'um yéetel ba'ax sajbe'entzil bíin in suut le caaja'. Tuláacal máax cu bin j máane' bíin ja'akac u yóol le quéen u yila' bix u mixba'alcunta'ali'.

⁹Yaan in beetic u jaantico'ob u j xibil paalal yéetel u x ch'upul paalal, yéetel ca u jaantuba'ob tu baatzilo'ob tu yo'olal taan u quíimilo'ob yéetel wi'ij tu yo'olal bakpachta'anil le caaj tumen u aj p'eeco'ob.

¹⁰Cu dzo'ocol a wa'alique', ca jéen p'uchtic le p'úulo', le táan yich le máaco'ob láakintmailecho',

¹¹ca a wa'al ti'ob: Yuumtzil u yuumil tuláacal páajtalil cu ya'alic beya': Je'el bix u pa'abal jun p'éel p'úul mina'an utzquinaj ti'e', bey bíin in beet ti' le caaja', yéetel ti' u cajnáalilo'ob. Le máaco'obo' yaan u muquico'ob u quimeno'ob tu lu'umil Tofet, tu yo'olal mina'an cúuchil u ti'al u muquico'ob.

¹²Bey bíin in beet yéetel le caaja' bey xan ti' u cajnáalilo'ob. Bíin in p'ato'ob je'el bix tin beetilac ti' Tofet. Teen Yuumtzil, teen jajcuntic.

¹³U najilo'ob Jerusalén, u jalach najo'ob u ajawilo'ob Judá, yéetel tu yóokol le najo'ob tu'ux ca'ach cu kubico'ob poom ti' tuláacal le eeko'ob yéetel tu'ux cu wéequel u ti'ibil óolalil vino ti' jela'an kuob, bíin ila'aco'ob kaas yanilo'ob je'el bix yanil Tofet.

¹⁴Cu dzo'ocol tuláacale' ca j suunaj Jeremías Tofet, tu'ux túuxta'ab ca'ach tumen Yuumtzil ca t'aanac tu kaaba', ca j wa'alaj te j sujuy táancabo', ca tu ya'alaj ti' tuláacal le caajo':

¹⁵Yuumtzil u yuumil tuláacal páajtalil, u Ku Israel, cu ya'alic: Bin in ca'aj in túuxt ti' le caaja' yéetel le yano'ob tu bakpacho' le jadz tin ka'aytaje', tumen tu dzu'uyquintajo'ob u poolo'ob, u ti'al ma' u yu'ubico'ob in t'aani'.