Read Yucateco Jeremías 2 Bible Online

Jeremías 2 - Yucateco bible

Jeremías 2

¹Yuumtzile' tu ya'alaj ti' teen:

²Xeen ca a wa'al ti' u caajil Jerusalén; awatnen u ti'al ca ma'alob u'uya'aquech: ¡Yuumtzile' bey u ya'alica'! Kaja'an tene', le ca'ach x lo'obayaneche', mix jun téen ta kexajen, le ca tin watanteche' a yaacuntmajen ca'achi' taalech tin paach te x tocoy lu'umo', lu'um tu'ux ma'atech u beeta'al cooli'.

³Israele' jun páaycunta'an chéen in ti'al, bey u ma'alobil u yáax ich in pakale'. Wa ca yanac máax beetic loob ca'ach ti'e', teen ca'ache' jadzic iquil in túuxtic núumsaj yajo'ob ti'. Teen Yuumtzil, ten a'alic.

⁴U ch'i'ibalo'ob Jacob, u yotochnáalo'ob tuláacal Israel, u'uye'ex u t'aan Yuumtzil.

⁵Yuumtzile' cu ya'alic: ¿Ba'ax loobil tin beetaj ti' a máanaja'an ch'i'ibalo'ob u ti'al ca náachaco'ob ti' téen? J bino'ob tu paach kuob mix ba'alo'ob ba'ale' tu juunal tu mix ba'alcuntajuba'ob.

⁶Ma' tu yaayanto'ob u caxteno'obi', teen le máax jóokeso'ob tu lu'umil Egipto, ca tin bisajo'ob te x tocoy, tiquin yéetel kóom lu'umo', lu'um mina'an ja'i', chuup yéetel sajbe'en ba'alo'ob, lu'um tu'ux mix máac cajacbali' mix xan cu máani'.

⁷Tene' tin taasajo'ob te j cáacab lu'uma', u ti'al u jaantico'ob u yich, yéetel u ma'alobil u joocho'ob. Ba'ale' te'exe' j taale'exe' ca ta maanba'a'alcunte'ex in lu'um, ta beetaje'ex in p'ectic in lu'um.

⁸Le aj kiino'obo' ma' tu caxteno'obi' u aj tzol xiquino'ob in caajale' ma' j ka'ajen ti'obi', u nuuquilo'obe' ma' tu yu'ubajo'ob in t'aani', aj bóobato'ob xane' j t'aanajo'ob tu kaaba' Baal ca j bino'ob tu paach beetbil kuob mix ba'alo'ob.

⁹Le t o'olalo', teen Yuumtzil, teen a'alic: Bin in ca'aj in beet jun p'éel u dzíibil si'ipil ta wóokole'ex yéetel tu yóokol a wáabile'ex.

¹⁰Xeene'ex tu petemilo'ob j chikin ca a wile'ex; túuxte'ex wa máax tu lu'umil Cedar u ti'al u yilic ma'alob, wa ucha'an jun p'éel ba'al beya',

¹¹wa jun p'éel p'ecbe'en múuch' caajo'obe' u kexmaj u kuob ¡U jaajile' lelo' chéen tuusil kuob! Ba'ale' in caajale' dzo'oc u p'atiquen, quex tumen teen u nojbe'enen, tu yo'olal beetbil kuob mix ba'alo'ob.

¹²¡Ja'akac a wóol ca'an, tu yo'olal ba'ax cu yúuchul! ¡Quiquilnen yéetel sajbe'enil! Teen Yuumtzil, teen a'alic.

¹³In caajale' ca'a p'éel keban dzo'oc u beetic: tu xúump'attajeno'ob, teen cuxa'anen, ca tu beetajo'ob u chultuno'ob, ch'e'eno'ob teejeltaco'ob, cu láaj ukic u ja'il.

¹⁴Israele' ma' jun túul palitzili'; tumen ma' j síij ich palitzili'. ¿Ba'ax ten túun cu láaj ocolta'al?

¹⁵¿Ba'ax ten cu pulicuba'ob j chi'ibal beyo'ob leóno'obe', beyo'ob leóno'ob táan u jéemcalo'ob? Dzo'oc u p'atico'ob ju'uju'ut u múuch' caajalo'ob; u caajo'obe' láaj tóoca'abo'ob, mix máac j p'áati'.

¹⁶U cajnáalilo'ob Menfis yéetel Tafnes tu pa'ajo'ob a pool.

¹⁷Lela' j úuch ti' teech tu yo'olal ta xúump'attilaquen tene' Yuumtzil a Junab Kuen, máax nu'uctic ca'ach a beel.

¹⁸Bejela'e' ¿ba'ax ca najmatic iquil a bin Egipto u ti'al a wukic u ja'il Nilo? ¿Ba'ax ca najmatic iquil a bin Asiria u ti'al a wukic u ja'il Éufrates?

¹⁹A keban bíin u jadzech, a kexic a Kue' leti' bíin xot kintiquech. Tucult, il a wil xan u kaasil yéetel u káajil iquil a p'atiquen mix xan a tziqueni', quex tumen teen Yuumtzil a Junab Kuen. Teen, Yuumtzil u yuumil tuláacal páajtalil, teen a'alic.

²⁰Úuch p'áatac ma' ta tziquic in t'aan ma' ta wóoltaj a wu'uy in t'aani'. Ta wa'alaj: Ma' in káat meyaji'. Tu yóokol tuláacal jo'ol lu'um, mix yaanal tuláacal che' piim u le' ca ta kubabáa u ti'al x cáacbachil.

²¹Tene' tin pakajech, beyech jun cúul u asab ma'alobil uvae', tin yéeyajech bey u asab u ma'alobil u neek uva. ¡Ba'ale' tu yo'olal dzo'oc a jach kastale', bejela'e' ma' tin kaj óoltic wa teech!

²²Quex ca p'o'aba yéetel jo'ol ja' wa ca sen ichquinaqueche', tin táane' láili' boonolech yéetel kebane'. Teen Yuumtzil, teen a'alic.

²³¿Bix je'el u páajtal a wa'alic: Ma' boonolen yéetel kebani' mix in dzaamaj kultajil ti' u tuusil kuobi'? Il a wil bix cuxlajiquech te j kóom lu'umo', il a wil tuláacal ba'ax dzo'oc a beetic, beyech x camella péeca'an u xíimbale' je'el tu'uxaque';

²⁴beyech jun túul burra x káaxil cu ch'a'a boctic tu'ux yaan burroe'. Tu kiinil taac u báaxale' mix máac cu páajtal u cúumquintic. Wa cu máan caxtbil tumen jun túul burro mix kabéet u ca'anali', mantadz cu nactáanta'al taac u báaxal.

²⁵¡Israel, ma' a yaacunsic a wooc iquil a wáalcab x ma' xanabil, ma' a cha'ic u tijil a caal! Ba'ale' teche' ta wa'alaj: Ma' tu páajtal; in yaabiltmaj yaanal j xiibo'ob, in ca'aj tu yéetelo'ob.

²⁶Je'el bix cu ch'i'ic subtal jun túul j ocol le quéen chu'ucuque', bey bíin u ch'a'a subtal Israel, u caajil, u ajawilo'ob, u nuuquilo'ob, u aj kiino'ob yéetel u aj bóobato'ob;

²⁷tumen ti' jun cul che'e' cu ya'alico'ob: Teech in taata, yéetel ti' jun p'éel tuuniche' cu ya'alico'ob: Teche' in maama. Ba'ale' Ti' tene', cu sutico'ob u paacho'ob, ma' tu pactiqueno'ob. Chéen p'elac u yilicuba'ob tu chi' quíimile', cu ya'alico'ob: ¡Co'oten a toco'oni'!

²⁸Judá, ¿tu'ux yaan le kuob ta beetajo'? ¡Ya'ab a kuob je'el bix ya'abil le caajo'obo'! ¡Talaco'ob, ca c ila'a' wa je'el u páajtal u toquiquecho'obe' le kiin quéen talac le yaayaj óolalo'!

²⁹¿Ba'ax ca mucul t'antique'ex tin wo'olal, wa tuláacale'ex ma' ta tzicaje'ex in t'aani'? Teen Yuumtzil, teen a'alic.

³⁰Chéen cunel tin jadzilac a paalale'ex, tumen ma' tu yóoltajo'ob u cano'ob le canbalo'. Ta báile'exe', beye'ex dzíic leóne', ta quíimse'ex in aj bóobato'ob.

³¹(Bey xan te'ex le ch'i'ibala', ch'en xiquinte'ex u péectzil Yuumtzil.) Israel, ¿te'exe' béeychaja'anech x tocoy lu'umil? ¿Jun p'éel lu'um chuup yéetel éekjoche'enil? In caajal, ¿ba'ax o'olal ca wa'alic: To'one' jáalkabo'on; mix bikin bíin suunaco'on ta wicnal?

³²¿Cu páajtal wa u tu'usic jun túul co'olel u co'ocoj léechcalo'ob, yéetel u jadzutz ba'alo'ob tu kiinil u dzo'ocol u beel? Ba'ale' in caajale', úuch u tu'ubsen.

³³¡Wa u ti'al a caxantic xiibo'obe' Jach ma'alob a kaj óoltmail le bejo'! ¡X ca'anbesajech tu cúuchil tu'ux cu ca'anal kaas!

³⁴Pa'apa'ak a nook yéetel u ki'ikel óotzilo'ob, bey yéetel u ki'ikel ma' le si'ipilnaja'ano'obo', máaco'ob ma' a wilmaj u beetico'ob loob mix jun téeni'.

³⁵Quex beyo' ca wa'alic: J ma' si'ipileni'. Kue' ma' kuux tin wéeteli' Ma'alob túun, bey ca wa'alic ma' kebanchajquecho', bin in ca'aj in we'es ti' buca'aj a si'ipil.

³⁶¿Ba'ax óolal ca séebcuntic a kexic a wéet t'aano'ob? Bey xan Egipto bíin u p'atech kaasil, je'el bix tu p'atilaquech kaasil Asiriae'.

³⁷Yaan wal a suut lukbalech Egipto chupech yéetel subtale', tumen tene' dzo'oc in tzelic ti' máaxo'ob ala'an a wóolo', ma' bíin a kam mix jun p'éel utz tu yo'olal a bisicabáa yéetelo'ob.