Read Yucateco Jeremías 22 Bible Online

Jeremías 22 - Yucateco bible

Jeremías 22

¹Yuumtzile' tu ya'alaj ti' teen: Xeen jalach naj ca wa'al le péectzila'

²tu táan u ajawil Judá, máax culucbal tu jalach káanche' David, yéetel ti' u noj aj meyajo'ob, yéetel ti' u cajnáalilo'ob le noj caajo': U'uye'ex u t'aan Yuumtzil.

³Beete'ex ba'ax no'oja'an yéetel ba'ax tu beel te j cúuchila', toque'ex ti' máax óotzilcuntic le máax yedzico', ma' a pajique'ex subtal mix a beetique'ex kaas ti' le j táanxel lu'umilo', mix ti' le j ma' taataob mix ti' le x quimen íichamo'obo'. Ma' quíimsique'ex máac mina'an u si'ipil.

⁴Wa tu jaajil ca beetique'ex; le ba'ax dzo'oc in wa'alic ti' te'exa', mix bikin bíin j p'áatac j ma' ajaw u jalach káanche' David, máaxo'ob bíin ococo'ob ti' bolano'ob yéetel ti' tzíimino'ob tu jool najilo'ob le jalach naja', láakinta'ano'ob tumen u noj aj meyajo'ob, bey xan tumen le caajo'.

⁵Ba'ale' wa ma' ta táan óoltique'ex le ba'axo'ob dzo'oc in wa'alico'oba', le jalach naja' bíin p'a'atac chéen x tocoy. Teen Yuumtzil, teen a'alic.

⁶Tumen Yuumtzile' cu ya'alic tu yo'olal u jalach naj u ajawil Judá: In ti'al tene', teche' beyech u káaxil Galaade', bey u p'íich ca'analil Líbanoe', ba'ale' quin séeb chi'itique', bíin in sutech x tocoyil, jun p'éel cúuchil x ma' cajnáalilo'ob.

⁷Bin in ca'aj in túuxt máaco'ob u machmaj u dzoono'ob u ti'al u ba'ateltecho'ob, yéetel u t'aanil ca u xu'ulsech. Bíin u ch'aco'ob a jadzutz ocomalo'ob kuulche' u ca'ajo'ob u ti'al u pulico'ob ichil káak.

⁸U cajnáalilo'ob ya'ab múuch' caajo'ob bíin máanaco'ob naadz ti' le noj caaja', tu baatzilo'ob bíin u káat chi'ituba'ob: ¿Ba'ax ten bey tu beetilac Yuumtzil ti' le nojoch caaja'?

⁹Bíin núuca'ac: Tumen tu p'atajo'ob le nup t'aan tu beetaj Yuumtzil, u Ku, u beetmaj ca'ach yéetelo'ob, ca tu kultajo'ob u jeel kuob.

¹⁰Ma' a wokole'ex tu yo'olal ajaw Josías, ma' a wokole'ex tu yo'olal quíimic okolnene'ex tu yo'olal Salum u paal, ba'ale' okolnene'ex tu yo'olal le máax cu bino', tumen mix bikin bíin ca suunac u yila'a le lu'um tu'ux síijo'. Tumen Yuumtzile' cu ya'alic tu yo'olal Salum u paal Josías, u ajawil Judá, le j culaj tu jalach káanche' u taatae', ca jóok ti' le cúuchila': Ma' bíin suunaqui',

¹²te j lu'um tu'ux bisa'abo'obo' ti' bíin quíimiqui', mix bikin bíin ca'a suunac te j caajo'oba'.

¹³¡Yaj a wanil, tumen yo'olal kasa'anil yéetel loobil bejil ca beetic a jalach naj yéetel a ca'anal najo'ob, ca beetic u meyaj u láak máaco'ob x ma' bo'olal!

¹⁴Ca wa'alique': Bin in ca'aj in beet jun p'éel nojoch jalach naj, yéetel u cóococh yáalo'ob tu yóokol. Ca dzáic u calom kiino'ob, ca balic u pakilo'ob yéetel kuulche' ca bonic yéetel chac.

¹⁵¿Ca tucultic tu yo'olal bakpachta'an tumen kuulche'e' cu ajawtal wíinic? A taatae' ma'alob cuxlajic; tu yo'olal cu meyaj ca'ach yéetel ti'ibil bejil bey xan yéetel tojil cuxtal, le t o'olal j bin utzil ti'.

¹⁶Cu t'aan ca'ach tu yo'olal ba'axo'ob cu najmatic óotzilo'ob bey xan ti' le máax yedza'ano'obo', le t o'olal cu bin utzil ti'. Leti' máax cu ya'ala'al u kaj óoltmajen. Teen Yuumtzil, teen a'alic.

¹⁷Ba'ale' teche' ca tucultic a náajal chéen binqui' ba'alo'ob; ca quíimsic máax mina'an u si'ipil, ca yedzic xan a caajal.

¹⁸Yuumtzile' cu ya'alic tu yo'olal Joacim, u paal Josías, u ajawil Judá: Mix máac cu bin u yokolt a quíimil. Mix máac bíin okolnac táan u ya'alic: ¡In láak, yaj in wanil! ¡yaj in wanil in x láak! ¡Yuumtzil, yaj in wanil! ¡Yaj in wanil, tzicbe'enil!

¹⁹Bíin mu'ucuc bey jun túul burroe'; bíin jíilta'ac u ti'al j pu'ulul tu paach caajil Jerusalén.

²⁰¡Judá na'aquen tu witzil Líbano' ca awatnaquech! ¡Awatnen tu witzilo'ob Basán! ¡Awatnen líikbal tu jo'ol lu'umil Abarim, tumen tuláacal a j keecho'obe' dzo'oc u pa'abal u muuko'ob!

²¹Tene' tin t'aanajech tu kiinil ya'ab ba'ax utz yáantech, ba'ale' ma' ta wóoltaj a wu'uyeni'. Bey ta beetajilac líikbal ta táanquelmilo'; ¡ma' ta wóoltaj a wu'uy in t'aani'!

²²Le iiko' bíin u jíilt tuláacal a nuuquilo'ob, a j keecho'obe' bíin u bisa'aco'ob táanxel lu'umil. Bíin pa'ajac a subtal yo'olal a kasa'anil.

²³Bejela'e' jeedzel yanilech ta ku' ichil le kuulche'ob taasa'abo'ob te j Líbano', ¡ba'ale' bíin mukyajnaquech le quéen talac a ki'inamilo'ob, bey u ki'inamilo'ob aalanquile'!

²⁴Yuumtzile' dzo'oc u ya'alic ti' Jeconías, u paal Joacim, u ajawil Judá: Quin séeb chi' tu yo'olal in cuxtal: Quex ca béeyaquech jun p'éel u dzipitil dzalab tin x no'oj kabe', chíiculal dza'an tin no'oj kabe' je'el in jodziquech ti'e'

²⁵u ti'al in kubiquech ti' aj p'eeco'ob, ti' le máax seten sajaque'echo'. Bíin in kubech ti' Nabucodonosor, u ajawil Babilonia, yéetel ti' le j caldeobo'.

²⁶Bíin in tojolch'intech pa'ate' yéetel a maama, ti' jun p'éel lu'um ma' tu yilaj a síijile'exi', ti' ca bine'ex j quíimil tu ca'a túulale'exi'.

²⁷Leti'obe' ma' tu bino'ob j suut ti' le lu'um ca seten dzíiboltajo'ob j suuti'.

²⁸¿Jeconíase' jun p'éel luuch mix ba'al u biilal, jun p'éel nu'ucul mix máac u káati'? ¿Ba'ax ten cu pu'ululo'ob táanxel lu'umil pa'ate' yéetel u paalal?

²⁹¡Lu'um, lu'um, lu'um; u'uy ba'ax cu yaj óoltic Yuumtzil!

³⁰Yuumtzile' cu ya'alic: Dzíibte'ex u kaaba' le j xiib ti' le dzíibil ju'uno' bey jun túul j xiib mina'an u paalale', bey jun túul j xiib ma' j bin utzil ti' le cuxtala'. Tumen mix jun túul ti' u ch'i'ibal bíin culac tu jalach káanche' David u ti'al u beetic u ajawil tu ca'a téen lu'umil Judá.