Read Yucateco Jeremías 23 Bible Online

Jeremías 23 - Yucateco bible

Jeremías 23

¹Yuumtzile' cu ya'alic: ¡Yaj yanil le j canan tamano'ob cu p'atico'ob u sa'atal, yéetel u ki'itpajal in j tamano'ob!

²Yuumtzil u Ku Israele', cu ya'alic ti' le j canan tamano'ob cu méektáantico'ob u caajalo': Te'exe' dzo'oc a ki'itbesique'ex in j tamano'ob, dzo'oc a beetique'ex u púudzulo'ob ma' xan ta canantaje'exo'obi'. Wa beyo', tene' bíin in jadze'ex tu yo'olal le kaakas ba'alo'ob ca beetique'exo'. Teen Yuumtzil, teen a'alic.

³Teen bíin in taas u yalab in j tamano'ob ti' le lu'umo'ob tu'ux tin beetaj u púudzulo'ob, bíin xan in beet u suuto'ob tu'ux cu tzéenticuba'ob, u ti'al ca yanac ya'ab u mejenilo'ob.

⁴Bíin in dzáa ti'ob j canan tamano'ob u ti'al canantico'ob, u ti'al ma' u yantal mix ba'al sajbesico'ob, bey xan ma' u sa'atal mix jun túul ti'obi'. Teen Yuumtzil, teen a'alic.

⁵Yuumtzile' cu ya'alic: Bíin talac u kiinil in líikesic jun túul u jach ch'i'ibal David, jun túul ajaw bíin ajawnac yéetel ojéelaj ca meyajnac xan yéetel ti'ibil bejil bey xan yéetel tojil te j lu'uma'.

⁶Tu kiinilo'ob u ajawile', Judae' mix jun p'éel ba'al bíin úuchuc ti', bey xan Israel bíin cuxlac x ma' sajaquil. Lela' leti' le kaaba' bíin dzabac ti'a': Yuumtzil leti' c tocsajil.

⁷Yuumtzile' cu ya'alic: Bíin talac u kiinilo'ob ma' bíin úuchuc jalach t'anto'ob beya': Tu yo'olal u cuxtal Yuumtzil, máax tu jóokesaj le j Israelitaob tu lu'umil Egipto,

⁸ba'ale' bíin jalach t'aanaco'ob beya': Tu yo'olal u cuxtal Yuumtzil, máax tu jóokesaj u ch'i'ibal Israel, tu lu'umil j xaman yéetel ti' tuláacal u chuucáan lu'umo'ob tu'ux ca'ach tu ki'itbesa'ajo'ob. Bíin cajlaco'ob jach tu lu'umo'ob.

⁹Péectzil tu yo'olal aj bóobato'ob: Jach seten saatal in wóolal; tuláacal in wíinclil cu quiquilanquil, beyen jun túul cala'ane', beyen jun túul xiib joch'kaja'an tu yo'olal vino, tu yo'olal Yuumtzil yéetel u quili'ich t'aano'ob.

¹⁰Le lu'uma' chuup yéetel j pak kebano'ob, máaco'ob cu yáalcabo'ob u beeto'ob loob, le páajtalil yaan ti'obo' chéen u ti'al u beeto'ob ba'axo'ob ma' tu beeli'. Le t o'olale' Yuumtzile' tu loolob t'antaj le lu'uma' ca j tiji', u xíiwilo'ob le x tocoy lu'uma' j eelo'ob.

¹¹Yuumtzile' cu ya'alic: Tac le aj bóobato'ob yéetel aj kiino'obe' j kebano'ob; tin kulnaj tin nactáatajo'ob táan u beetico'ob ba'alo'ob kaastac.

¹²Le t o'olale' u beelo'obe' éekjoch'eno'ob yéetel jajalqui: teen bíin in beet ca léench'inta'aco'ob u ti'al ca lúubuco'ob. Quéen kuchuc u kiinil in wilic buca'aj u p'aaxo'ob, bíin in taas tu yóokolo'ob noj yaj óolal. Teen Yuumtzil, teen a'alic.

¹³Tene' dzo'oc in wilic u aj bóobatilo'ob Samaria u beetico'ob ba'alo'ob cu poch'iqueno'ob: dzo'oc u bóobato'ob tu kaaba' Baal dzo'oc xan u beetico'ob u kastal in caajal Israel.

¹⁴Tene' dzo'oc in wilic u beeta'al talam ba'alo'ob tumen u bóobatilo'ob Jerusalén: cu pak kebano'ob, cu yoocolo'ob, cu líiksico'ob u yóol le máaco'ob u ti'al u beeto'ob kaas. Leti'ob yéetel u cajnáalilo'ob le caaja' in ti'ale' beyo'ob Sodoma yéetel Gomorrae'.

¹⁵Le t o'olale', téen Yuumtzil u yuumil tuláacal páajtalile', quin wa'alic ti' le aj bóobato'obo': Bíin in dzáa káakaj ba'al u jaanto'ob; bin in ca'aj in dzáa ti'ob ja' cu quíimsaj, tumen tu yo'olal u aj bóobatilo'ob Jerusalene' dzo'oc u ya'abtal kasa'anil ti' tuláacal le múuch' caajo'oba'.

¹⁶Yuumtzil u yuumil tuláacal páajtalile' cu ya'alic: Israelitaex, ma' a táan óoltique'ex ba'axo'ob cu ya'alico'ob le aj bóobato'obo'. Tumen ba'axo'ob cu ya'alico'obe' chéen tuuso'ob, ba'alo'ob, chéen leti'ob patico'ob tu poolo'ob, ba'alo'ob ma' teen a'al ti'obi'.

¹⁷Ti' le máaxo'ob cu kex óoltico'ob in t'aane' cu ya'alico'ob: Tuláacal bíin jóokoc utzil. Ti' le máax cu beetic chéen ba'ax cu yóoltique' cu ya'alico'ob ti': Mix jun p'éel kaas bíin talac ta cuxtal.

¹⁸Ba'ale' ¿máax kaj óoltmajil u x mucul tuucul Yuumtzil? ¿máax ilmail wa u yu'ubmaj u t'aan? ¿máax táan óoltmail u t'aan?

¹⁹U p'u'ujul Yuumtzile' bey jun p'éel cháac ka'am u yiikale', bey u yustaj chac ikal cu pilin suut ichil le loolob máaco'obo'.

²⁰U p'u'ujul Yuumtzile' ma' tu máan wa ma' tu beetic ba'axo'ob u tucultmaj. Bíin talac u kiinil a tucultique'ex, yéetel a na'atique'ex le ba'alo'oba'.

²¹Tene' ma' in túuxt le aj bóobato'obo' mix in t'aano'obi', ba'ale' leti'obe' áalcab jóokico'ob u ti'al j t'aan tin kaaba'.

²²Wa ca u kaj óolto'ob ca'ach in muculilo'obe' dzo'oc ca'ach u dzáico'ob ojéeltbil in t'aan, ti' in caajale'; dzo'oc ca'ach u beetico'ob u p'atico'ob u kaakas beje' yéetel ca u p'ato'ob u kaakas cuxtalo'obe'.

²³Yuumtzile' cu ya'alic: Náach wa naadze', tene' Kuen.

²⁴¿Máax cu páajtal u ta'acbescubáa ma' in wilic? Yéetel in cuxtale' quin chupic ca'an yéetel lu'um. Teen Yuumtzil, teen a'alic.

²⁵Dzo'oc in wu'uyic u tuuso'ob le aj bóobato'obo' cu táabalo'ob j t'aan tin kaaba', cu paticuba'ob j t'aan tin wéetel ichil u wayako'ob.

²⁶¿Ba'ax kiin bíin jáawac u ka'aytico'ob chéen tuuso'ob cu jok jo'oltico'ob?

²⁷Yéetel le wayako'ob cu tzicbaltico'ob tu baatzilo'obe', cu beetico'ob in tu'ubsa'al tumen in caajal, je'el bix u máanja'an ch'i'ibalo'ob tu tu'ubsajeno'ob ca j bino'ob tu paach Baal.

²⁸¡Wa jun túul aj bóobat cu wayake', u ya'al chéen jun p'éel wayak, wa cu kamic in t'aane', ca u dzáa ojéeltbil je'el bix tu kamilaque'! Ma' tu páajtal lajquetcunta'al sojol yéetel trigoo'. In t'aane' bey káake', bey jun p'éel bajab cu pa'ic le tzekel tuuno'. Teen Yuumtzil, ten a'alic.

³⁰Le t o'olale' in p'eec le aj bóobato'ob cu yocoltico'ob tu baatzilo'ob in t'aano'ob. Teen Yuumtzil, teen a'alic.

³¹Le t o'olal in p'ectmaj le aj bóobato'ob cu ya'alico'ob bey in péectzila', le ba'ax cu jok jo'oltico'ob.

³²In p'ectmaj le aj bóobato'ob cu tzicbaltico'ob chéen tuus wayako'ob; bey xan yéetel u tuus t'aano'obe' cu beetico'ob u kastal in caajal. Tene' ma' in túuxto'obi' mix in wa'almaj mix ba'al ti'obi', beyo' mina'an u páajtalil u yáantico'ob in caajal. Teen Yuumtzil teen a'alic.

³³Jeremías, wa jun túul u j xibil caaj, wa jun túul aj bóobat, wa jun túul aj kiin cu káat chi'itic: ¿Ba'ax u kubentmaj Yuumtzil? a'al ti'ob: Yuumtzile' cu ya'alique' u cuuche' te'ex bin, ba'ale' bin u ca'aj u p'at u lúubul,

³⁴Wa jun aj bóobat, wa jun túul aj kiin, wa jun túul u cajnáalil le caaj cu ya'alic le t'aana': Kuben t'aan Yuumtzil, tene' yaan in jadzic pa'ate' yéetel u yotochnáalo'ob.

³⁵Wa xan máax cu káat chi'itic ti' jun p'éel u yéet bisajbáa wa jun túul u láake', cu páajtal u ya'alic: ¿Ba'ax núuc t'aanil tu dzaj ti' teech Yuumtzil? ¿Ba'ax tu ya'alaj?

³⁶Ba'ale' ma' a suut a wa'ale'ex: kuben t'aan Yuumtzil tumen wa máax cu ya'alic, bíin in beetic ca suunac jun p'éel nojoch cuch u ti'al. Te'exe' dzo'oc a kascuntique'ex u na'atil u t'aan cuxa'an Ku, a Junab Kuex, Yuumtzil u yuumil tuláacal páajtal.

³⁷Jeremías káat chi'it ti' le aj bóobato'obo': ¿Ba'ax núuc t'aanil tu dzaj Yuumtzil? ¿Ba'ax tu ya'alaj?

³⁸Wa cu ya'alico'ob: u kuben t'aan Yuumtzil, núuc ti'ob: Yuumtzile' cu ya'alic: Tu yo'olal u xu'ulul a wa'alique'ex le t'aan tin wa'alaj ca a wet'e'exa',

³⁹teen bíin in líiksique'ex bey jun p'éel cuuche', te'ex yéetel le caaj tin dzaj ti' a úuchben ch'i'ibalo'ob, bíin in p'atic a lúubule'ex náach ti' teen.

⁴⁰Mix bikin cu bin j náachtal ti' te'ex cabal óolal yéetel subtzilil, ma' tu bin páajtal a tu'ubsique'ex.