Read Yucateco Jeremías 24 Bible Online

Jeremías 24 - Yucateco bible

Jeremías 24

¹Nabucodonosor u ajawil Babiloniae', tu bisaj táanxel lu'umil Jeconías u paal Joacim, u ajawil Judá pa'ate' yéetel u noj meyajo'ob, u aj meen jadzutz ba'alo'ob, bey xan u j meen máascabo'ob, Yuumtzile' tu beetaj in wilic ca'a p'éel u xaaquilo'ob higo'ob ch'uyquinta'ano'ob tu táan kulnaj.

²Ti' jun p'éel xaaque' yaan ca'ach jach ma'alob higos le cu séeb kantalo'obe', ba'ale' u láak jun p'éele' jach kasa'antac u yich, tu yo'olal jach kaasilo'obe' ma' tu páajtal u jaanta'alo'ob.

³Yuumtzile' tu káat chi'itaj ti' teen: Jeremías, ¿ba'ax ca wilic? Tene' tin núucaj: Higo'ob. Le ma'alobo' jach ma'alobtaco'ob; ba'ale' le kaastaco' jach kaastaco'ob ma' tu páajtal u jaanta'alo'ob.

⁴Yuumtzil túune' tu ya'alaj ti' teen:

⁵Teen Yuumtzil, u Ku Israel, quin wa'alic: Bey u ma'alobil u yich higoe' bey bíin in pact u caajil Judá, le tin túuxtaj tu lu'um le j caldeobo'. Bíin in pacto'ob yéetel utzil,

⁶bíin in dza'ob yáanal in canantajil yéetel bíin in beet u suuto'ob te j lu'uma'. Way bíin in beet u ayikaltalo'obe', mix bikin xan bíin suunaquen in xu'ulsa'; bíin in pako'ob, ma' bíin suunaquen in ca'a joco'obi'.

⁷Bíin in dzáa u na'ato'ob u ti'al ca u kaj óolto'ob chéen teen Yuumtzil, leti'obe' in caajal, teen xane' u Kuob, tumen bíin suunaco'ob ti' teen tu jaajil u yóol u pucsi'ikalo'ob.

⁸Ba'ale' Sedequías, u ajawil Judá yéetel u nuuquilo'obe', bey xan u cajnáalilo'ob Jerusalén le j p'áato'ob te j lu'umo', wa le cajlajo'ob Egiptoe', bíin in beet ti'ob, je'el bix u beeta'al ti' u yich le higo'ob kaastac ma' tu páajtal u jaanta'alo'ob.

⁹Bíin in beet yéetelo'ob jun ba'al bíin taas jak óolal ti' tuláacal u caajilo'ob le lu'uma', lelo' u ti'al u canico'ob cabal óolal, kex óolal yéetel loolob t'aan u ti'al tuláacal le lu'umo'ob tu'ux bíin in ki'itbeso'obo'.

¹⁰Bíin in túuxto'ob ba'atel, wi'ij yéetel báan quíimil, tac quéen láaj xu'ulsa'aco'ob te j lu'um tin kubaj ti' u yúuchben ch'i'ibalo'ob.