Read Yucateco Jeremías 25 Bible Online

Jeremías 25 - Yucateco bible

Jeremías 25

¹Tu can ja'abil u ajawil Joacim, u paal Josías, tu caajil Judae', Yuumtzile' tu dzaj ti' Jeremías le péectzila' u ti'al tuláacal u caajil Judá. U yáax ja'abil ca'ach u ajawil Nabucodonosor Babilonia.

²Aj bóobat Jeremíase' tu dzaj le péectzil ti' tuláacal u caajil Judá yéetel ti' u cajnáalilo'ob Jerusalén. Ca tu ya'alaj:

³Líikbal u ja'abil trece u ajawil Josías, u paal Amón, tu caajil Judá, tac bejela'e', co'ox a'alique' veintitrés ja'abo'ob, Yuumtzile' tu t'anajen, tene' dzo'oc xan in wa'alic ti' te'ex ya'ab u téenel, ba'ale' te'exe' ma' a wóolt a wu'uye'exi'.

⁴Quex tumen Yuumtzil ya'ab u téenel tu túuxtaj u j palitzilo'ob le aj bóobato'obo', te'exe' ma' ta wóoltaje'ex a dzo'ocbese'exi'.

⁵Leti'obe' dzo'oc u ya'alico'ob: P'ate'ex le kaakas cuxtalo' yéetel le loolob ba'alo'obo', ja'ali' bey je'el u páajtal a cajtale'ex te j lu'um tu dzaj Yuumtzil mantadz ti' te'ex yéetel ti' a úuchben ch'i'ibale'exo'.

⁶Ma' a bine'ex tu paach u láak kuob; ma' a kultique'exo'ob mix a qui'iqui' t'antique'ex. Ma' a beetique'ex u p'u'ujul Yuumtzil iquil a kultique'ex kuob, láili' te'ex beete', leti'e' ma' bíin u túuxte'ex mix jun p'éel kaasi'.

⁷Bejela'e', Yuumtzile' cu ya'alic: Te'exe' ma' ta wóoltaje'ex a wu'uye'ex in t'aani'; ca beetique'ex u p'u'ujul iquil a kultique'ex kuob láili' te'ex beete', lela' chéen u ti'al u taas kaas ta wóokole'ex.

⁸Le t o'olale', Yuumtzil u yuumil tuláacal páajtalile' cu ya'alic: Bey tumen te'ex ma' ta wu'uyaje'ex in tzol xiquine',

⁹bin in ca'aj in t'aan tuláacal u caajilo'ob j xaman yéetel in aj meyaj Nabucodonosor u ajawil Babilonia, u ti'al ca ta'aco'ob u ba'atelto'ob le múuch' caajo'oba', u cajnáalilo'ob yéetel tuláacal le caajo'ob yaan tu bakpacho'. Bíin in láaj xu'ulse'. Bíin in jaaj xiixcunte. Bíin in p'at jun puli' x lab caajil, jun p'éel ba'al ca yoques sajaquil yéetel jak óolal.

¹⁰Bin in ca'aj in beet ma' u yu'uba'al u kaayilo'ob kiinbesaj, mix u kaayilo'ob qui'imac óolal mix u kaayilo'ob dzo'ocol beel, mix u juum u ca'ilo'ob juuch', mix ca suunac u yila'al u juul le x t'uchub sáasilo'.

¹¹Tuláacal le lu'uma' yaan u xiixcunta'al yéetel u p'áatal x tocoy. Ti' setenta ja'abo'obe' le lu'uma' bíin p'áatac yáanal u páajtalil u ajawil Babilonia.

¹²Le quéen máanac tuláacal le sesenta ja'abo'obo', bíin in beet u cáantico'ob u kebano'ob u ajawil Babilonia yéetel u múuch' caajalo'ob, u lu'umil le j caldeobo', u ti'al in xu'ulsic jun puli'. Teen Yuumtzil, teen a'alic.

¹³Bíin in beet u lúubul yóokol le múuch' caajo'obo', tuláacal ba'ax tin wa'alaj bey xan ba'ax dzíibta'an ti' le ju'una': tuláacal ba'ax tu ya'alaj Jeremías tin kaaba', tu yo'olal tuláacal le múuch' caajo'obo'.

¹⁴Nucuch caajo'ob yéetel ajawo'ob bíin u kububa'ob ti'ob. Bey cu najmatic ca u bo'oto'ob ba'axo'ob tu beetajo'obo'.

¹⁵Yuumtzil u Ku Israele', tu ya'alaj ti' teen: Pact u nu'ucul ukul chup yéetel u yukulil in p'u'ujul. Mache', dzáa ca u'ukuc tumen tuláacal le caajo'ob tu'ux bíin in túuxtecho'.

¹⁶Le quéen u yuuco'obe', cu cáajal u xejo'ob, bey choco u poolo'ob tu yo'olal le ba'atel bíin in túuxto'.

¹⁷Tene' tin machaj u nu'ucul le ukul yaan tu kab Yuumtzilo', ca tin dzaj ukbil tumen tuláacal le caajo'ob tu'ux tu túuxten Yuumtzil.

¹⁸Tin dzaj u yuk Jerusalén yéetel ti' u caajilo'ob Judá, pa'ate' yéetel u ajawilo'ob, u nuuquilo'ob, u ti'al ca in xu'uls yéetel ca in p'ato'ob x tocoyil, bey jun p'éel ba'al cu dzáic sajaquil yéetel jak óolale', u ti'al ca ila'ac bix loolob t'aanil tac bejela'e'.

¹⁹Tin dzaj xan ti' faraón, u ajawil Egipto, yéetel ti' u noj aj meyajo'ob, u náacomo'ob, yéetel ti' tuláacal le caajo',

²⁰bey xan ti' le máaco'ob jejeláas u ch'i'ibalo'ob yano'ob te'elo'; ti' tuláacal u ajawilo'ob u lu'umil Uz yéetel u múuch' cajtalil le filisteobo': Ascalón, Gaza, Ecrón yéetel le p'áatalo'ob ti' u caajil Asdod;

²¹ti' u caajil Edom, Moab yéetel Amón;

²²ti' tuláacal u ajawilo'ob Tiro yéetel Sidón; tuláacal u ajawilo'ob u lu'umil u ka'anab Mediterraneo;

²³ti' u múuch' cajtalilo'ob Dedán, Tema, Buz, yéetel le caajo'ob cu dziquico'ob u t'o'ol tzo'otzel yaan actáan ti' u xiquino'ob;

²⁴ti' tuláacal u ajawilo'ob Arabia; ti' tuláacal u ajawilo'ob le jejeláas ch'i'ibalo'ob caja'ano'ob te x tocoy lu'umo';

²⁵ti' tuláacal u ajawilo'ob Zimri, Elam Yéetel Media:

²⁶ti' tuláacal u ajawilo'ob j xaman, le much'ucbalo'obo', yéetel le náachtaco'obo'. Co'ox a'alique' tuláacal u ajawilo'ob le lu'umo'. U dzooque' cu yukic u ajawil Babilonia.

²⁷Cu dzo'ocole' tu ya'alaj ti' teen Yuumtzil: A'ale', teen Yuumtzil u yuumil tuláacal páajtalil, u Ku Israel quin wa'alic ti'ob ca cáalchajaco'ob, ca xeenaco'ob, yéetel ca lúubuco'ob j lu'um u ti'al ma' u líikilo'ob, tu yo'olal le ba'atel bíin in túuxto'.

²⁸Wa ma' u káato'ob u ch'a'ob ta kab u ti'al u yuko'obe', a'al ti'obe': Yuumtzil u yuumil tuláacal páajtalile' cu ya'alic: Je'el bixaque' yanili' a wukique'exe'.

²⁹Tumen bin in ca'aj in cáajs in túuxtic le jadzo'ob tu yóokol le caaj jun páaycunta'an ti' teno'. ¿Ca tucultique'ex bíin a jeche'ex le jaadzo'? Ma' tu páajtal a jechique'ex, tumen bíin in túuxt ba'atel tu yóokol tuláacal u cajnáalilo'ob le lu'umo'. Teen Yuumtzil u yuumil tuláacal páajtalile', teen a'alic.

³⁰Teech Jeremías, yaan a ka'aytic tin kaaba' tuláacal le ba'alo'oba'. A'al ti'ob beya': Yuumtzile' cu túuxtic u t'aan, bey u juum u jaadz cháaque' líikbal tu ca'analil, u quili'ich cúuchil tu'ux cajacbal. Tu yaayaj aawtaj u j tamano'ob bey je'el bix máaxo'ob cu yedzico'ob uvae', yóokol tuláacal u cajnáalilo'ob le lu'uma'.

³¹U quíilbale' cu yu'uba'al tac tu xuul lu'um, tumen Yuumtzile' bin u ca'aj u nu'uct jun p'éel u tac pool tu yo'olal le caajo'obo', bin u ca'aj u t'an u ti'al xot kiin tuláacal le aj quíimilbe'eno'obo' yaan u xot kintic u ti'al quíimil le loolob máaco'obo'. Yuumtzil a'alic.

³²Yuumtzil u yuumil tuláacal páajtalil cu ya'alic: Le noj yajo' bíin kuchuc ti' tuláacal cajal caaj; jun p'éel nojoch chac ikal cu taal líikbal tu xuul le lu'uma'.

³³Le máaxo'ob cu bin quíims Yuumtzil ti' le kiino', bíin p'áataco'ob jayacbal tu naklilo'ob le lu'uma'. Mix máac bíin okololtico'ob, mix máac bíin muquico'ob, bey u ta' wacax cu bin j p'áatal jaytalo'ob te j lu'ume'.

³⁴¡Awatnene'ex j canan tamane'ex, awatnene'ex yéetel yajil! ¡Te'ex, u aj bejil le j tamano'obo', bablaba'ex j lu'um! Tumen dzo'oc u kuchul u kiinil le quíimsajo' je'el bix u quíimsa'al u poloquil le j tamano'obo' bey bíin beeta'ac ti' te'exo'.

³⁵Le j canan j tamano'obo' ma' bíin páatac u púudzulo'obi', bey xan u aj bejil le j tamano'obo'.

³⁶Le j canan tamano'obo' táan u yawato'ob, yaayaj awat cu beetico'ob u aj bejil le j tamano'obo', tumen Yuumtzile' Dzo'oc u ch'éejsic u janalo'ob.

³⁷Yuumtzile' j p'u'uje' ca tu ch'éejsaj qui'ichquelem coolo'ob.

³⁸Jóok bey jun túul león tu yáactune' u lu'umo'obe' j p'áat x tocoyil, tumen j léec u p'u'ujul Yuumtzil ca tu túuxtaj jun p'éel seten yaayaj ba'atel.