Read Yucateco Jeremías 26 Bible Online

Jeremías 26 - Yucateco bible

Jeremías 26

¹Tu yáax chuun u ajawil Joacim, u paal Josías tu lu'umil Judá, Yuumtzile' tu t'anaj Jeremías

²ca tu ya'alaj ti': Wa'alen tu sujuy lu'umil kulnaj, ca wa'al tuláacal le ba'ax tin túuxtaj a wa'al ti' le máaco'ob cu taalo'ob tu caajilo'ob Judá u ti'al kultaj tu kulnaj Yuumtzil. Mix ba'al unaj a ta'aquic, láaj a'al ti'ob,

³Je'elajqui' u yu'ubo'ob a t'aan ca u p'a'ato'ob u kaakas cuxtalo'obe', wa cu béeytale' ma' bíin in jadzo'ob tu yo'olal u kaakas cuxtalo'ob je'el bix tin tucultaje'

⁴A'al ti'ob, teen Yuumtzil, quin wa'alic: Wa ca cúulpachtique'ex le t'aan tin wa'alaj te'exo',

⁵mix ta wu'uyique'ex u t'aano'ob in palitzilo'ob le aj bóobato'obo', dzo'oc in túuxtic ya'ab u téenel te'exe' quex ma' a wu'uye'ex u t'aano'obi',

⁶bíin in beet túun ti' le kulnaja' je'el bix tin beetaj ti' le kulnaj yaan ca'ach Siloe'. Bíin in loobilt le caaja', u ti'al ca ila'ac, yéetel ca u ch'a'ob sajaquil u láak u caajilo'ob lu'um.

⁷Aj kiino'ob, aj bóobato'ob yéetel tuláacal le caajo' tu yu'ubajo'ob le t'aan tu beetaj Jeremías te j kulnajo'.

⁸Ca j dzo'oc u ya'alic tuláacal le ba'ax a'ala'ab ti' tumen Yuumtzilo', le aj kiino'ob, le aj bóobato'ob yéetel le caajo' tu macho'obe' ca tu ya'alajo'ob ti': ¡Bin a ca'aj quíimil!

⁹¿Bix a táabal a wa'al tu kaaba' Yuumtzil, le kulnaja', bíin p'áatac je'el bix úuchic ti' le yaan Siloe', yéetel le caaja' bíin xiixcunta'ac, yaan xan u p'a'atal x ma' cajnáalilo'ob? Tuláacal le caajo' much'laj kulnaj, ca tu bakpachtajo'ob Jeremías.

¹⁰U nuuquilo'ob Judá, le ca tu yu'ubajo'ob ba'ax cu yúuchule', j bino'ob tu jalach naj ajaw yéetel te j kulnajo', ca j culajo'ob te j Túumben Joolnajo'.

¹¹Le aj kiino'ob yéetel le aj bóobato'obo' tu ya'alajo'ob ti' u nuuquilo'ob yéetel ti' le caajo': Le máaca' unaj u xot kinta'al u ti'al quíimil tumen dzo'oc u loolob t'antic le caaja', te'exe' ta wu'uyaje'ex ta xiquine'ex.

¹²Jeremíase' tu ya'alaj ti' u nuuquilo'ob le caajo' yéetel ti' u cajnáalilo'ob: Yuumtzil túuxten j t'aan tu kaaba', yéetel ca in wa'al ti' le kulnaja' yéetel ti' le caaja' tuláacal le ba'axo'ob dzo'oc a wu'uyique'exo'.

¹³Utzquinte'ex a cuxtale'ex ca beete'ex ba'ax cu ya'alic Yuumtzil a Kuex, le ti'e' ma' bíin u túuxt le noj yajo'ob dzo'oc u ya'alico'.

¹⁴Wa tin wo'olale' ta kabe'ex yanen; beete'ex ti' téen je'el ba'axac a káate'exe'.

¹⁵Ba'ale' ojéelte'ex ma'alob, wa ca quíimsiquene'exe', te'ex yéetel u cajnáalilo'ob le caaja' bíin si'ipilchajaque'ex tumen ta quíimse'ex jun túul j ma' si'ipil; tumen jach tu jaajile' Yuumtzil túuxten in wa'al ti' te'ex le ba'alo'oba'.

¹⁶U nuuquilo'ob le caajo' yéetel u cajnáalilo'obe' tu ya'alajo'ob ti' le aj kiino'ob yéetel ti' le aj bóobato'obo': Mina'an ba'ax o'olal c xot kintic j quíimil le j xiiba'; tumen tu kaaba' Yuumtzil c Ku tu ya'alaj.

¹⁷Dze'edzec u nuuquilo'obe', líiko'ob ca tu ya'alajo'ob ti' le máaco'ob much'ucbalo'obo':

¹⁸Tu kiinilo'ob Ezequías, ajawil Judae', Miqueas Moresatile' j t'aanaj tu kaaba' Yuumtzil ti' tuláacal u caajil Judá, ca tu ya'alaj: Yuumtzil u yuumil tuláacal páajtalile' cu ya'alic: Sione' bíin p'áatac bey jun p'éel lu'um bukla'ane', Jerusalene' bíin xiixcunta'ac u jo'ol lu'umil xan le kultajo' bíin lo'oboc yéetel xíiw.

¹⁹¿Quíimsa'ab wa Miqueas tumen ajaw Ezequías yéetel tumen tuláacal u caajil Judá? Ma', ajawe' tu ch'a'aj sajaquil ti' Yuumtzil ca tu káataj ca ch'a'abac óotzilil ti'ob. Yuumtzil túune' ma' tu túuxtaj le noj yaj tu ya'alaj ca'acho'. ¿Binel ca'ajo'on c dzáa nojoch cuuch t óokol tu yo'olal jun p'éel loob táaj nojoch?

²⁰Bey xan aj bóobat Urías, u paal Semanías, tu caajil Quiriat Jearim, t'aanaj tu kaaba' Yuumtzil, ca tu loolob t'antaj le caaj yéetel u lu'umil, je'el bix tu beetaj Jeremías.

²¹Ajaw Joacim, u noj meyajo'ob yéetel u nuuquilo'obe' tu yu'ubajo'ob ba'ax tu ya'alaj, ca j óolta'ab quíimsbil tumen ajawe'. Le ca túun tu yojéeltaj Uríase', tu ch'a'aj sajaquil, ca j púudz Egipto.

²²Ajaw Joacim tu túuxtaj Egipto Elnatán, u paal Acbor, yéetel u láak máaco'ob,

²³máaxo'ob tu taasajo'ob Uríase' ca tu kubajo'ob tu kab Joacim, ca j túuxta'ab quíimsbil ca j pu'ul u wíinclil ti' áactun.

²⁴Ahicam, u paal Safán, t'aanaj tu yo'olal Jeremías, le t o'olale' ma' j ku'ub ti' le caajo', u ti'al ca quíimsa'ac.