Read Yucateco Jeremías 28 Bible Online

Jeremías 28 - Yucateco bible

Jeremías 28

¹Tu cinco winalil láili' ti' le ja'abo', u káat ya'ale' tu can p'éel ja'ab u ajawil Sedequías tu caajil Judae', aj bóobat Hananías, u paal Azur, ti' u caajil Gabaone', tu ya'alaj ti' Jeremías ichil kulnaj, tu táan aj kiino'ob yéetel ti' tuláacal le caajo':

²Yuumtzil u yuumil tuláacal páajtalil, u Ku Israel, cu ya'alic: Bin in ca'aj in lukes ti' u ajawil Babiloniae' u páajtalil,

³ichil ca p'éel ja'abe' bíin in beet u su'utul tuláacal u nu'uculo'ob kulnaj bisa'ab Babilonia tumen ajaw Nabucodonosor.

⁴Bíin xan in beet u suut Jeconías, u paal Joacim, u ajawil Judá, yéetel tuláacal u láak máaco'ob Judá j bisa'abo'ob palitzilil Babilonia. Bey, téen bíin in pa'a u muuk u ajawil Babilonia. Téen Yuumtzil, teen a'alic.

⁵Aj bóobat Jeremíase' tu núucaj ti' aj bóobat Hananías, tu taan aj kiino'ob yéetel tu táan tuláacal le caaj yaan ca'ach ichil le kulnajo':

⁶¡Bey, quexi' ca u beet Yuumtzil beyo'! ¡Quexi' ca beet Yuumtzil u béeychajal le t'aan dzo'oc a wa'alico', yéetel ca su'utuc tuláacal u nu'uculo'ob kulnaj, yéetel ca suunaco'ob tuláacal le j bisa'abo'ob Babiloniao'!

⁷Ba'ale' u'uy le t'aan quin wa'alic ti' teech yéetel ti' tuláacal le caaja':

⁸Le aj bóobato'ob j taalo'ob ma'ili' síijico'one', tu ka'aytajo'ob ba'atel, noj yajil yéetel báan quíimil tu yóokol ya'ab caajo'ob yéetel tu yóokol mu'uka'an ajawilo'ob.

⁹Ba'ale' le quéen ka'ayta'ac ayikalil tumen jun túul aj bóobate' chéen wa cu béeychajale' je'el u páajtal u ya'ala'al, Yuumtzil túuxte'.

¹⁰Hananías túune' tu lukesaj le yucalche' yaan ca'ach tu caal Jeremíase' ca tu ca'acachaj,

¹¹táan u ya'alic tu táan tuláacal le caajo': Yuumtzile' cu ya'alic: Láili' beya', ichil ca'a p'éel ja'abo'obe' bíin in lukes tu yóokol tuláacal le caajo'obo' le palitzlil tu dzaj Nabucodonosor u ajawil Babilonia, u ti'al ca in xu'ulse. Jeremíase' ca j bini.

¹²Dzo'oc u máan kiin lukesa'ac le yucalche' tu caal Jeremías tumen Hananías le ca tu ca'acachaje', Yuumtzile' tu t'anaj aj bóobat Jeremías ca tu ya'alaj ti':

¹³Xeen ca a wa'al ti' Hananías, teen Yuumtzil, teen a'alic: Ta ca'acachaj jun p'éel yucalche', ba'ale' tene' dzo'oc in máakantic jun p'éel yucalfierro u ti'al ca dza'abac ta caal.

¹⁴Tumen teen, Yuumtzil u yuumil tuláacal páajtalil, u Ku Israele', quin wa'alic: Dzo'oc in dzáic tu caal tuláacal le caajo'obo' jun p'éel yucalfierro u ti'al ca meyajnaco'ob bey palitzilo'ob ti' Nabucodonosor u ajawil Babilonia. Tac u ba'alche'ilo'ob káax dzo'oc in dzáic yáanal u páajtalil.

¹⁵Jeremías túune' tu ya'alaj ti' Hananías: ¡U'uy, Hananías! Yuumtzile' ma' tu túuxtajech ca a wa'al mix ba'ali', ba'ale' teche' táan a dzáic ti' le caaja' jun p'éel ma' jaaj pa'ataji'.

¹⁶Le t o'olale' Yuumtzile' cu ya'alic: Bin in ca'aj in túuxtech, ba'ale' u ti'al in beet a sa'atal tu yóokol le lu'uma'. Ti' le ja'ab ca bin j quíimila', tumen yéetel le ba'ax ta wa'alajo' dzo'oc a p'u'ujsic le caaj tin wóokolo'.

¹⁷Aj bóobat Hananíase' j quíim tu siete winalil láili' le ja'abo'ob.