Read Yucateco Jeremías 29 Bible Online

Jeremías 29 - Yucateco bible

Jeremías 29

¹Cu dzo'ocol u jóokol ajaw Jeconías táanxel lu'um yéetel nojoch xunáane', u palitzilo'ob jalach naje', u nuuquilo'ob Judá yéetel Jerusalén, j meen jatzudz ba'alo'ob yéetel le j meen máascabo'obo', aj bóobat Jeremíase' tu túuxtaj líikbal Jerusalén jun p'éel dzíibil ju'un, ti' u nuuquilo'ob j p'áato'ob ti' le bisa'abo'obo', aj kiino'ob, aj bóobato'ob yéetel le máaco'ob, Jerusalenilo'ob j bisa'abo'ob Babilonia tumen Nabucodonosor.

³Le dzíiba' j bisa'ab tumen Elasa, u paal Safán, yéetel Gemarías, u paal Hilcías, máaxo'ob túuxta'abo'ob Babilonia tumen Sedequías u ajawil Judá u ti'al u dzic ti' ajaw Nabucodonosor. Le dzíibo' cu ya'alic ca'ach beya':

⁴Bey cu ya'alic Yuumtzil u yuumil tuláacal páajtalil, u Ku Israel, ti' tuláacal le j Jerusalenilo'ob bisa'abo'ob Babiloniao':

⁵Beet a wotoche'ex, jedz a cajtale'exi', pakalnene'ex, u ti'al a jaantique'ex u yich.

⁶Dzo'ococ a beele'ex ca yanchajac a paalale'ex, bey xan a j xibil paalale'ex yéetel a x ch'upul paalale'ex, bey xan leti'obe' ca dzo'ococ u beelo'ob ca yanac xan u paalalo'ob. Ya'abcuntaba'ex te'elo', ma' a jun p'íitchajale'ex.

⁷Meyajnene'ex te j caaj tu'ux tin túuxtaje'exo', káat óolte'ex ti' teen utz yóokol, tumen wa cu bin utzil ti'e' bey xan ti' te'ex bíin xi'ic utzil.

⁸Téen Yuumtzil u yuumil tuláacal páajtalil, u Ku Israel, cu ya'alic beya': Ma' a cha'ic a tu'usule'ex tumen aj bóobato'ob mix tumen le j chuchuc na'ato'ob yano'ob ichile'exo', ma' a dzique'ex a wóole'ex ti' u wayako'ob.

⁹Le ba'ax cu tze'ectico'ob tin kaaba'e' chéen tuus. Tene' ma' in túuxto'obi'. Teen Yuumtzil, teen a'alic.

¹⁰Yuumtzile' cu ya'alic: Le quéen chúucpajac le setenta ja'abo'ob ti' Babiloniao', cu cáajal in beetic ti' te'ex utz, bíin xan in dzo'ocbes ba'ax tin séeb chi'itaj u ti'al ca suunaque'ex te j cúuchila'.

¹¹Ba'axo'ob in tucultmaj te'exe', ba'axo'ob utztac a ti'ale'ex, ma' u ti'al kaasile'exi', u ti'al in dzáic ti' te'ex u kiinilo'ob nojoch alab óolal. Teen Yuumtzil, teen a'alic.

¹²Te'ex túune' bíin a ch'a'a chi'itene'ex, bíin payalchi'inaque'ex ti' teen, teen xane' bíin in wu'uy a káat óolale'ex.

¹³Bíin a caxtene'ex, bíin xan a nuptáantene'ex, tumen tu jaajil u yóol a pucsi'ikale'ex ca beetique'ex.

¹⁴Bey, tene' bíin in cha'a' a nuptáantiquene'ex, bíin xan in jelbes ba'ax cu yúuchul ti' te'ex, bíin in mole'ex ti' le caajo'ob tu'ux tin ki'itbesaje'exo', bíin in much'quinte'ex, bíin xan in sute'ex te j lu'um tu'ux jóoke'exo'. Teen Yuumtzil, teen a'alic.

¹⁵Te'exe' ca wa'alique'ex: Yuumtzile' tu dzaj ti' to'on aj bóobato'ob Babilonia.

¹⁶(Yuumtzile' cu ya'alic tu yo'olal le ajaw culucbal tu jalach káanche' David, bey xan tu yo'olal u cajnáalilo'ob le caaja', a láaktzile'ex ma' j bino'ob ta wéetele'ex táanxel lu'umili':

¹⁷Teen Yuumtzil u yuumil tuláacal páajtalil, quin wa'alic: bíin in túuxt ti' te'ex ba'atel, wi'ij yéetel báan quíimil. Bíin in beet a p'áatale'ex bey u tu'il u yich Higoe', jach tu', ma' tu páajtal u jaanta'ale'.

¹⁸Bíin in beet a ch'a'apchta'ale'ex yéetel ba'atel, yéetel wi'ij, bey xan yéetel báan quíimil. Bíin in beet u taj sajactalo'ob, yéetel u ja'akal u yóol le caajo'ob le quéen u yile'exo'ob, ca canbalnaco'ob ti' le loolob t'aano'ob yéetel ti' le sublaquil le quéen in ki'itbese'exo'.

¹⁹Tumen ma' ta wu'uyaje'ex le ba'ax tin wa'alaj ti' te'ex yéetel in palitzilo'ob le aj bóobato'obo', ma' jun téenili'i' ba'ale' ya'ab u téenel, ma' ta wu'uyaje'ex u t'aano'obi'. Teen Yuumtzil, teen a'alic.

²⁰Dzo'ocbesa'ac in t'aan tumen tuláacal le máaxo'ob tin tojolch'intajo'ob Jerusaleno' le ca j bisa'abo'ob Babiloniae'.)

²¹Yuumtzil u yuumil tuláacal páajtalil, u Ku Israel, cu ya'alic tu yo'olal Acab, u paal Colaías, yéetel tu yo'olal Sedequías, u paal Maasías, máaxo'ob cu ya'alico'ob ba'alo'ob ma' jaajtac tu kaaba' Yuumtzil: Bin in ca'aj in beet u lúubulo'ob tu kab Nabucodonosor u ajawil Babilonia, leti'e' bíin u quíimso'ob ta táane'ex.

²²Beyo', le judailo'ob j bisa'abo'ob Babilonia le quéen u yóolto'ob u loolob t'anto'ob wa máaxe', ca u ya'alo'ob beya': Yuumtzil bíin u beet ti' teech je'el bix tu beetajilac ti' Sedequías yéetel ti' Acab, máaxo'ob j káabta'abo'ob ti' káak tumen u ajawil Babilonia.

²³Leti' bíin úuchuc ti' te'ex tu yo'olal ta beetaje'ex ba'alo'ob talam subtzil tu lu'umil Israel: pak kebanchaje'ex yéetel u yatano'ob a wéet xiibile'ex, ta wa'alaje'ex xan tuuso'ob tin kaaba', tene' ma' tin túuxtmaje'ex ca wa'ale'exi'. Tene' jach in wojel. Teen Yuumtzil, teen a'alic.

²⁴Yuumtzile' tu ya'alaj ti' Jeremías ca u ya'al ti' Semaías j Nehelamil:

²⁵Yuumtzil u yuumil tuláacal páajtalil, u Ku Israel cu ya'alic: Teche' ta túuxtaj ta kaaba' jun p'éel dzíib ti' tuláacal le caaj yaan Jerusaleno', yéetel ti' aj kiin Sofonías, u paal Maasías, yéetel ti' tuláacal aj kiino'ob. Te j dzíibo' ca wa'alic ti' Sofonías:

²⁶Yuumtzile' dzo'oc dzáiquech aj kiinil tu cúuchil Joiada, u ti'al ca a beet a noj ilaj meyajil kulnaj. Wa cu taal jun túul j chocopool wíinic cu jo'op'ol u t'aan bey aj bóobate', teche' u najmal a túuxtic dzaabil ti' kalab che' ca ka'axac xan yéetel jookenjok fierro.

²⁷¿Ba'ax o'olal túun ma' a key Jeremías le j Anatotil, cu taal j t'aan ta táane'ex bey aj bóobate'?

²⁸Tu túuxtaj ti' to'on tac Babilonia jun p'éel dzíib, tu'ux ca'ach cu ya'alic: Le bisa'abique'ex táanxel lu'umilo' yaan u xáantal; beet a wotoche'ex, yéetel pakanene'ex u ti'al a jaantique'ex u yich.

²⁹Aj kiin Sofoníase' tu xocaj le dzíib ti' Jeremías.

³⁰Yuumtzil túune' tu t'anaj aj bóobat ca tu ya'alaj ti':

³¹Túuxt a'albil ti' le yano'ob táanxel lu'umilo' teen, Yuumtzil, quin wa'alic ti'ob: Bey tumen Semanías le j Nehelamil dzo'oc u t'aan tin kaaba' quex ma' in túuxtmaj u ya'al mix ba'ale', yéetel dzo'oc u taasic ti' te'ex ma' u jaajil ocsaj óolale',

³²teen Yuumtzil, quin wa'alic bin in ca'aj in jadz Semanías pa'ate' yéetel u ch'i'ibalo'ob. Ma' bíin yanac u ch'i'ibal ichil in caajali', mix tu bíin yanac u qui'imac óolal bíin in dzáa ti' in caajali', tumen yéetel u t'aan beyo' suunaj p'ec óolal in ti'al. Teen Yuumtzil, teen a'alic.