Read Yucateco Jeremías 3 Bible Online

Jeremías 3 - Yucateco bible

Jeremías 3

¹Yuumtzile' cu ya'alic: Wa jun túul j xiib cu p'atic u yatane' wa leti', cu dzo'ocol u beel yéetel u jeel xiibe', le yáax íichamo' ma' tu ca'a nup'cubáa yéetel. ¡Lelo' jun p'éel nojoch paj subtal ti' le lu'uma'! Ba'ale' teche' Israel, dzo'oc a x cáacbachil yéetel ya'abcach a j keecho'ob, ¡bejela'e' taac a sut tin wicnal! Ten Yuumtzil, ten a'alic.

²Pact le jo'ol lu'umo'obo', pact ma'alob: ¿Tu'ux ma' ta cha'aj u pa'ajal a subtali? culucbalech ca'ach bey u arabeil x tocoy lu'ume', tu jáal bej ca pa'atic ca'ach a j keecho'ob. Le lu'uma' dzo'oc a kascuntic yéetel a x cáacbachil bey yéetel kasa'anil.

³Le t óolale' ma' tu káaxal ja' tu kiinil, que'elil mix ti' yáax kiin. Ca cóoyticabáa bey jun túul x cáacbache'; ¡u najmal a ch'a'ic subtal!

⁴Ma' úuch ca'ache' ca wa'alic ti' teen: In taata, in wéet bisajbáa tin x lo'obaynil,

⁵¿mix bikin bíin máanac a p'ujulil? ¿a líik óolale' mina'an u xuul? Ca'aliquil táan a wa'alique', táan a bíin a beetic loob.

⁶Tu kiinilo'ob ajaw Josíase', Yuumtzile' tu ya'alaj ti' teen: ¿Dzo'oc a wilic ba'ax tu beetaj Israel le x ma' u'uyaj t'aano'? J bin yóokol tuláacal jo'ol lu'um, yéetel yáanal che'e' ca tu kubajubáa x cáacbachil.

⁷Tene' tin tucultaje' quex dzo'oc u beetic tuláacal le ba'alo'oba' je'el u suut tin wicnale'; ba'ale' ma' j suunaji'. U x quictzil Judae' tu kexajen, tu yilaj le ba'ala';

⁸tu yilaj xan bix tin p'atilac Israel j ma' tzic t'aano', ca tin p'ataj, tu yo'olal le nup keban tu beetajo'. Ba'ale' Judá u x quictzil Israel ma' tu kubaj u yóol ti' teeni mix tu ch'a'aj sajaquil, j bine' ca tu beetaj láili' le ba'ax tu beetaj Israele'.

⁹Jach chéen ch'a'abil tu beetilac, ca tu manba'alcuntaj le lu'uma'. Jach tu jaajil u yóol tu kexajilaquen ca tu kultaj tuunicho'ob yéetel che'ob.

¹⁰Cu dzo'ocol tuláacale' Judae' tu kexajen, ma' tu jaajil u yóol suunajique', tumen tu tusajen. Teen Yuumtzil, teen a'alic.

¹¹Yuumtzile' tu ya'alaj ti' teen: Le x ma' tzic t'aan Israelo' ma' jach si'ipilchaja'an je'el bix le Judá tu kexajeno'.

¹²Xeen wa'alen tu táan j xaman ca a ka'ayt le péectzila': Yuumtzile' cu ya'alic: ¡Suunen, Israel x ma' tzic t'aan Israel! Ma' bíin in kamech yéetel kuuxili' mix jun puli' cu bin j xáantal in p'u'ujuli', tumen tene' utzen. Teen Yuumtzil, teen a'alic.

¹³Ka'ajac ti' teech kasa'anech, tumen ma' ta wu'uyaj u t'aan Yuumtzil a Kui'; áalcabnajech a caxant jela'an yaacunajo'ob yáanal tuláacal u bo'oy che', piim u le', mix ta dzo'ocbesaj in t'aani'. Teen Yuumtzil, teen a'alic.

¹⁴Yuumtzile' cu ya'alic: Suunene'ex paalale'ex j ma' tzic t'aane'ex, tumen ten tin dzaj a cuxtale'ex. Jun túul bíin in ch'a'a ti' jujun p'éel caaj, yéetel ca'a túul ti' jujun múuch' cajtalilo'ob otochnáalo'ob, u ti'al ca in beet u suuto'ob Sión.

¹⁵Bíin in dzáa le méektáano'ob in káat t'aane', leti'ob bíin méektáantique'ex yéetel ojéelajil bey u yéetel na'at.

¹⁶Le quéen ya'abaque'ex te j lu'uma' le quéen anac ya'ab a paalale'exe', mix máac bíin u ca'a tzicbalt u ba'asche'il u nup t'aan Yuumtzil; mix máac bíin suunac u tuculte' mix u ka'ajsic; tumen ma' kabéeti', mix tu bin j beetbil u jeel túumbeni'. Teen Yuumtzil, teen a'alic.

¹⁷U caajil Jerusalén túune' bíin a'ala'ac u quili'ich káanche' Yuumtzil; tuláacal u caajilo'ob lu'ume' yaan u much'icuba'ob u ti'al u tziqueno'obi', ma' bíin suunaco'ob u beeto'ob u dzu'uy poolilo'obi'.

¹⁸Le quéen kuchuc u kiinile', Judá yéetel Israele' yaan u nupicuba'ob, bíin suunaco'ob tu ca'a túulalo'ob líikbalo'ob tu caajilo'ob j xaman, u ti'al cajtalo'ob te j lu'um tin dzaj bey kamba'albáil ti' a máanja'an ch'i'ibalo'ob.

¹⁹Israel tene' tin wóoltaj in kamech bey in paale' u ti'al in dzáic ti' teech jun p'éel lu'um asab qui'ichquelem ti' u caajilo'ob tuláacal yóokolcaab. Tene' tin tucultaje' bíin a wa'al ti' teen Yuum mix bikin xan bíin náachaquech ti' teen.

²⁰Ba'ale' bey jun túul co'olel cu kexic yíichame', bey ta beetilaque'ex, ta kexajene'ex. Teen Yuumtzil, teen a'alic.

²¹Cu yu'uba'al t'aano'ob te x tocoy jo'ol lu'umo'; ¡israelitaob táan u yokolo'ob, iquil u káatico'ob ca ch'a'abac óotzilil ti'ob! Tu tzéeltajo'ob le toj bejo', ca tu tu'ubsajeno'ob, téen Yuumtzil u Kuob.

²²Suunene'ex tin wicnal paalale'ex j ma' tzic t'aane'ex, ten bíin in dzaque'ex ti' a ma' tzic t'aane'ex. Way yano'one', c taal ta wicnal tumen teech c Yuumtzil yéetel c Ku.

²³Mix ba'al u biilal ca xi'ico'on te j ca'anal jo'ol lu'umo'obo' wa ca awatnaco'on yóokol le pu'uco'obo'; tumen chéen ti' Yuumtzil c Ku yaan u tocsajil Israel.

²⁴Le x ma' subtal u kultajil beetbil kuobo' tu beetaj c satic le ba'ax tu náajaltajo'ob c taataob yéetel c maamaob le ca'ach mejentaco'ono': tamano'ob yéetel wacaxo'ob, j xibil paalal yéetel x ch'upul paalal.

²⁵Co'ox cabalcuntic óol túun sublacchajaco'on tumen paja'an c subtal, líikbal t mejnil tac tu walquila' to'on yéetel máanja'an ch'i'ibalo'obe', dzo'oc c kebanchajal tu táan Yuumtzil c Ku ma' t dzo'ocbesaj u t'aani'.