Read Yucateco Jeremías 30 Bible Online

Jeremías 30 - Yucateco bible

Jeremías 30

¹Le ti' le péectzil tu dzaj Yuumtzil ti' Jeremíasa'. Tu ya'alaj ti':

²U Yuumtzil, u Ku Israel, cu ya'alic: Dzíibt ti' jun p'éel ju'un tuláacal ba'ax dzo'oc in wa'alic ti' teech,

³tumen bíin kuchuc u kiinil in kexic u kiin yajil in caajal Israel, yéetel Judá. Teen Yuumtzil, teen a'alic. Teen bíin in beet u suuto'ob te j lu'um tin dzaj ti' u taataob u ti'alinto'ob.

⁴Lela' leti' u péectzil Yuumtzil tu yo'olal Israel yéetel tu yo'olal Judá.

⁵Yuumtzile' cu ya'alic: ¡Táan u yu'uba'al u yawatil noj sajaquil, tu yo'olal jak óolal yéetel péec óolal!

⁶Káat a wu'uyye'ex wa cu síijsaj jun túul j xiib. ¿Ba'ax o'olal túun quin wilic u ch'o'och'otcuba'ob le j xiibo'ob, bey yaan u ki'inamil aalanquil ti'obe'? ¿Ba'axten tuláacalo'ob dzo'oc u sacpile'entalo'ob?

⁷¡Táan u náadzal u kiinilo'ob sajbe'entzil, jun p'éel kiin mix bikin bíin yanac u jeel beyo'! Jun p'éel u kiinil yaayaj óolal u ti'al u caajil Jacob, ba'ale' teen bíin in toco'ob.

⁸Teen, Yuumtzil u yuumil tuláacal páajtalile', quin wa'alic: Bíin in wach' in caajal ti' u kaaxil palitzilil, mix bikin bin suunac palitzilta'al tumen j táanxel lu'umilo'ob.

⁹Bíin u meyajten, tumen téen u Yuumtzil yéetel u Ku, bey xan bíin u meyajt David, máax bíin in dzáa bey u ajawile'.

¹⁰Teen Yuumtzil, teen a'alic: U caajil Jacob, in j palitzil ma' a ch'a'ic sajaquil, Israel ma' a ch'a'ic sajaquil, tumen teech yéetel a paalale' bíin in toque'ex ti' le náach múuch' caajo'ob, tu'ux bisa'abe'exo'. Ba'ale' bíin suunaque'ex yéetel jéedzel, x ma' sajaquil, mix máac bíin ja'asic a wóole'ex.

¹¹Teen Yuumtzil, teen a'alic: ta wéetel yanen u ti'al in toquech. Bíin in xu'uls tuláacal le caajo'ob tu'ux tin ki'itbese'exo'. Ba'ale' teche' ma' bíin in xu'ulsechi'; chéen bíin in jadzech je'el bix ca najmatique': ma' bíin in p'atech x ma' jaadzili'.

¹²Yuumtzile' cu ya'alic: A quimpaja'anile' mina'an utztal ti', a koja'anile' mina'an dzaaquil ti'.

¹³Mina'an mix máac táan óoltiquech; mina'an mix máac dzaquic a quimpaja'anil, mina'an xan dzaaquil a ti'al.

¹⁴Tuláacal a weeyo'obe' dzo'oc u tu'ubsiquecho'ob; mix táan u náadzalo'ob ta wicnal. tin beetaj ti' teech loob bey ti' jun túul aj p'eeque', tin chich jadzajech tu yo'olal a seten kasa'anilo'ob, tu yo'olal xan a ya'abcach kebano'ob.

¹⁵¿Ba'ax ten ca wáacan tu yo'olal a quimpaja'anil? A ki'inamile' mina'an dzaaquil ti'. Yo'olal u ya'abil a kasa'anil yéetel tu yo'olal a máan ya'abil kebano'obe', tin beetaj teech beyo'.

¹⁶Ba'ale' tuláacal máax bíin lukiqueche', bíin lu'ukuc xan, tuláacal a aj p'eeco'obe' bíin bisa'aco'ob táanxel lu'umil; bíin in beet u láaj ocolta'al le máaxo'ob j ocolte'exo', le máax toc tuláacal le ba'ax yaan ti' teche' yaan xan u láaj tocolta'ac ti'.

¹⁷Bíin in sut a toj óolal, bíin in dzac a quimpaja'anil, quex ca u ya'alo'ob a aj p'eeco'ob: Sione' xúunp'atta'an, mix máac táan óoltic. Teen Yuumtzil, teen a'alic.

¹⁸Yuumtzile' cu ya'alic: Bíin in kex u kinyajil u múuch' caajilo'ob Jacob, bíin in ch'a'a óotzilil ti' u múuch' caajilo'ob le caajo'obo' bíin u ca'a líiksa'aco'ob yóokol u jeenel pakilo'ob u jalach najilo'ob xane' bíin ca'a beeta'aco'ob tu cúuchilo'ob.

¹⁹Ichilo'ob bíin u'uya'ac u kaayilo'ob nib óolal yéetel u che'ejilo'ob qui'imac óolal. Ma' bíin jun p'iitchajaco'obi', tumen teen bíin in beet u ya'abtalo'ob. Ma' bíin p'ecta'aco'obi' tumen teen bíin in beet u tzi'iquilo'ob.

²⁰Le j israelitaobo' bíin béeyaco'ob je'el bix ca'ache'; u caajale' bíin p'áatac jedzecnac tin táan, teen bíin in jadz máaxo'ob yedzmailo'ob.

²¹Ichilo'ob bíin jóokoc jun túul noj jalach: jun túul aj méektáan bíin jóokoc láili' ichilo'ob. Bíin in beet u náadzal ti' teen, tumen, ¿Máax je'el u táabal j náadzal ti' tene'? Leti'obe' bíin in caajalto'ob, teen xane' bíin u Kuinteno'ob. Teen Yuumtzil, teen a'alic.

²³U p'u'ujul Yuumtzile' bey jun p'éel chac ikale', bey jun p'éel ka'amcach iik cu jadzicubáa ichil le j loolob wíinico'obo'.

²⁴U p'u'ujul Yuumtzile' chéen bíin ch'éenec le quéen u beet le ba'ax u tucultmaje'. Bíin kuchuc u kiinil a ch'a'a nu'uctique'ex le ba'alo'oba'.