Read Yucateco Jeremías 31 Bible Online

Jeremías 31 - Yucateco bible

Jeremías 31

¹Yuumtzile' cu ya'alic: Ti' le kiino'obo' bíin u Kuinteno'ob tuláacal u múuch' cajnáalilo'ob u yotochnáalo'ob Israel, leti'obe' in caajalo'ob.

²Yuumtzile' cu ya'alic: Te x tocoy lu'umo' tin we'esaj in wutzil ti' le caaj, tu jechaj le quíimilo'. Ti' le kiino'ob táan ca'ach u caxtic Israel jun p'éel cúuchil u ti'al u je'elele'.

³Yuumtzile' chíicpaj ti' teen úuchi, ca tu ya'alaj ti' teen: Tene' tin yaabiltajech yéetel yaacunaj mina'an xu'ulul; le t óolal quin bisiquinbáa ta wéetel yéetel utzil.

⁴U lu'umil Israel bíin in wutzquint a caajilo'ob. Tu ca'a téen bíin talaco'ob yéetel bojol paaxo'ob u ti'al j óokoto'ob yéetel qui'imac óolal.

⁵Bíin ca'a suunac u pako'ob u x péet pachil uvaob tu jo'ol lu'umilo'ob Samaria, le máaxo'ob bíin u x péet pachil uvaobe', bíin u jaanto'ob u yicho'ob.

⁶Tumen bíin kuchuc u kiinil le j canan caajo'obo' bíin u yaawto'ob tu jo'ol lu'umil Efraín: Nadzaba'ex, co'ox Sión, tu táan Yuumtzil c Ku.

⁷Yuumtzile' cu ya'alic: Kaaynene'ex yéetel nojoch qui'imac óolal tu yo'olal u caajil Jacob, jun p'éel noj caaj ichil tuláacal le múuch' caajo'obo'. Beete'ex u yu'uba'al u kaayilo'ob a qui'iqui' t'aane'ex, a'alex beya': Yuumtzil tu tocaj u caajal, le u yalab caaj j p'áat ti' Israelo'.

⁸Bíin in ca'aj in beet u suuto'ob, lukbalo'ob tu lu'umil j xaman, bíin in ca'aj in much'quito'ob, lukbalo'ob tu naklil u xuul yóokolcaab. Yéetelo'obe' bíin talaco'ob, ch'óopo'ob, móocho'ob, co'olelo'ob yo'omtaco'ob, yéetel le dzo'oc u yaalanquilo'obo'; ¡bíin suunac jun p'éel nojoch múuch'cabil caaj!

⁹Bíin talaco'ob táan u payalchi'ob táan xan u yokolo'ob. Tene' yaan in bisico'ob ti' u sayabilo'ob ja', ti' jun p'éel táax bej, tu'ux ma' tu bino'ob j t'óochpajal. Tumen tene' u taataen Israel, Efraine' in nojoch paal.

¹⁰Múuch' caaje'ex, u'uye'ex u t'aan Yuumtzili' tze'ecte'ex tu náachil u jáal ka'anabo'ob: Yuumtzile' tu ki'itbesaj Israel, ba'ale' bíin u ca'a much'quintic bíin xan u canante je'el bix u canantic le j canan taman u j tamano'ob.

¹¹Tumen Yuumtzile' tu lojaj u caajil Jacob, tu tocaj ti' jun múuch' caajo'ob asab yaan u páajtalil.

¹²Bíin talaco'ob bíin kaaynaco'ob yéetel qui'imac óolal tu ca'anlil Sión, bíin u qui'icunt u cuxtalo'ob yéetel u yutzil Yuumtzil: trigo, vino yéetel aceite, j tamano'ob yéetel wacaxo'ob. Bíin béeyaco'ob jun p'éel nojoch u x péet pachil pakal ma'alob jóoyabta'anile', mix bikin xan bíin p'áataco'ob x ma' muukil tu ca'a teen.

¹³Le x ch'úupalalo'obo', bíin óokotnaco'ob yéetel qui'imac óolal, bey le táanquelemo'ob bey xan le nuxibo'obo'. Teen bíin in qui'imaccunt u yóolo'ob: u yokolo'obe' bíin in sut qui' óolalil, bíin in dzáa xan ti'ob jun p'éel qui'imac óolal asab nojoch ti' u yaayaj óolalo'ob.

¹⁴Le aj kiino'obo' bíin in beet u tzéenticuba'ob yéetel u ma'alobil janal, in caajale' ca u najmat u sen ya'abil in ayikalilo'ob. Teen Yuumtzil, teen a'alic.

¹⁵Yuumtzile' cu ya'alic: Cu yu'uba'al jun p'éel t'aan Ramá, u t'aan máax cu yokol yéetel yaayaj óolal. Leti'e' x Raquel cu yokol tu yo'olal u paalal, ma' u káat ca náaysa'ac u yóoli', tumen dzo'oc u quíimilo'ob.

¹⁶Ba'ale' cu ya'ala'al ti' tumen Yuumtzil: Raquel Ch'en a wokol; p'at a wequic u ja'il a wich, tumen a yaj óolale' bíin yanac u bo'olal: a paalale' bíin lukuco'ob tu lu'umil le aj p'eeco'ob, bíin suunaco'ob. Teen Yuumtzil, teen a'alic.

¹⁷Yaan jun p'éel pa'atalil u ti'al le kiino'ob cu taalo': a paalale' bíin u suunaco'ob tu lu'umilo'ob. Teen Yuumtzil, teen a'alic.

¹⁸Dzo'oc in wu'uyic u yaayaj káatanquil u caajil Efraín: Tene' beyen ca'ach jun túul táanquelem wacax ma' suucquinta'ane', ba'ale' teche' dzo'oc a suucquintiquen; beet in suut ti' teech, tumen teche' in Yuumtzil, in Ku.

¹⁹Tene' tin náachcuntajimba' ti' teech, ba'ale' dzo'oc u sutkajal in tuucul; in kebane' jéechcab tin wich, quin loxic in tzeem; quin wu'uyiquinbáa sublaquen yéetel cabal óol tu yo'olal u kebanilo'ob in táanquelmil.

²⁰U caajil Efraine' in ti'ale' jun túul in yaabilaj paal; in j xibil paal asab in yaabiltmaj. Quex le quéen in keye', ma' tu p'áatal ma' in ka'ajsic; in pucsi'ikale' cu péec yóol, tene' quin sen ch'a'ic óotzil ti'. Teen Yuumtzil, teen a'alic.

²¹Israel, dzáa u chíiculo'ob le bejo', u ti'al ca páatac a caxtic tu séeblaquil; pact ma'alob le bej ta xíimbaltajo'. ¡Suunen u caajil Israel, suunen ta cajtalilo'ob!

²²¿Tac ba'ax kiin bíin jáawac a manal máan, bey jun túul x ch'úupal saatale'? Teen Yuumtzil, dzo'oc in beetic ba'al túumben way yóokolcaabe': jun túul co'olel cu co'oco' t'anic jun túul j xiib.

²³Yuumtzil u yuumil tuláacal páajtalil, u Ku Israele' cu ya'alic: Le quéen in kex bix yanil u cajnáalilo'ob Judae', le quéen xan ti' yanaco'ob tu ca'a téen tu lu'umo'ob yéetel tu caajilo'obe', bíin u ca'a a'alo'ob: ¡Yuumtzil u qui'iqui' t'ant le quili'ich pu'uc tu'ux cajacbal le ti'ibil bejilo'!

²⁴U cajnáalilo'ob Judá yéetel u caajilo'ob, u pakalo'ob yéetel le j canan tamano'obo' bíin cajlaco'ob te'elo'.

²⁵Tumen bíin in dzáa ya'ab janal yéetel ya'ab ukul, ti' le máaxo'ob ca'ana'ano'ob yéetel j ma' muuko'ob.

²⁶Ti' lela' téec aajen ca tin p'ilaj in wich. Utzchaj ti' wich in wayak.

²⁷Yuumtzile' cu ya'alic: Bíin talac u kiinil in beetic u ya'abtal máaco'ob yéetel ba'alche'ob tu lu'umil Israel yéetel lu'umil Judá.

²⁸Je'el bix tin dzajilac in wóol u ti'al in joc, in jut, in lu'ubsaj yéetel in beetic loobe' bey xan bíin in dzáa in wóol u ti'al in líiksaj yéetel in pakal. Teen Yuumtzil, teen a'alic.

²⁹Ti' le kiino'obo' ma' bíin suunac a'albili': C taata yéetel maamae' cu jaantico'ob su'usudz uvaob, ba'ale' ti' u paalo'ob cu dzáic u cha'aj cojilo'ob.

³⁰Tumen le máax cu bin u jaant le su'usudz uvao', ti' leti' cu bin u dzáa u cha'aj cojil. Le máax bíin kebanchajaque', leti' bíin quíimic tu yo'olal u keban.

³¹Yuumtzile' cu ya'alic: Bíin talac u jun p'éel kiin iquil bíin in beet jun p'éel túumben nup t'aan yéetel Israel bey xan yéetel Judá.

³²Le nup t'aana' ma' je'el bix le tin beetaj yéetel u máanja'an ch'i'ibale'ex, le ca tin machajo'ob tu kabo'ob u ti'al in jóokesico'ob Egiptoe'; tumen leti'obe' ma' tu dzo'ocbesajo'ob in nup t'aani', quex tumen téen ca'ach u yuumilo'ob. Teen Yuumtzil, teen a'alic.

³³Leti' le nup t'aan bíin in beet yéetel Israel le quéen kuchuc u kiinile': Bíin in dzáa in wa'almaj t'aan tu pucsi'ikal bíin xan in dzíibt tu dzu' u tuucul. Tene' bíin u Kuilteno'ob, leti'ob xane' bíin in caajalto'ob. Teen Yuumtzil, teen a'alic.

³⁴Ma' bíin kabéetchajac ca u paaclan ca'anbesaj u báilo'obi', u yéet bisajba'ob yéetel láaktzilo'ob, u ti'al ca u kaj óolteno'ob, tumen tuláacalo'ob, líikbal u nojchil tac u asab chichanile' bíin u kaj óolteno'ob. Tene' bíin in sa'ates u kasa'anilo'ob mix xan bíin ca'a ka'ajac ti' teen u kebano'obi'. Teen Yuumtzil, teen a'alic.

³⁵Yuumtzile' tu dzaj le kiino' u ti'al u sáasilcunaj yéetel kiin le luna yéetel le eeko'obo' u ti'al u sáasilcunt yéetel áakab, le máax beetic u péec ka'anab yéetel u quíilbal cuclilo'obe', le máax cu kaaba'intic Yuumtzil u yuumil tuláacal páajtalile', cu ya'alic:

³⁶Wa kuchuc jun p'éel u kiinil ca a táadzmáanse'ex le a'almaj t'aano'ob in dzaamaja', ti' le kiino' cu jáawal in ti'alintic u caajil Israel. Teen Yuumtzil, teen a'alic.

³⁷Wa jun p'éel u kiinil ca kuchuc p'isbil le ca'ano' Yéetel ca xakla'ac le lu'um tac tu chuun pakilo'obe', ti' le kiino' bíin in cúulpacht u caajil Israel tu yo'olal tuláacal ba'ax tu beetaj. Téen Yuumtzil, teen a'alic.

³⁸Yuumtzile' cu ya'alic: Bíin talac jun p'éel kiinil bíin ca'a líik utzquinta'ac in caajal, likbal tu witzil Hananeel tac le Jool cu kaaba'intic, Ti'itz.

³⁹Tu'ux cu náacalo'obe' bíin xi'ic toj u t'o'ololo'ob, líikbal te'elo' tac tu jo'ol lu'umil Gareb, cu dzo'ocole' cu kéechelo'ob tac Goa.

⁴⁰Tuláacal le táax lu'um tu'ux cu mu'ucul quimeno'ob yéetel cu pu'ulul u ta'anil káako', bey xan tuláacal le káaxo'ob yano'ob tu yóokol u t'o'ol ja'il Cedrón tac te j ti'itz cu kaaba'intic u Jool kalabil Tzimino'obo', tu lakine' bíin jun páaycunta'ac in ti'alinte, yéetel tuláacal lela' mix bikin bíin suunac jenbil, mix xiixcuntbil.