Read Yucateco Jeremías 32 Bible Online

Jeremías 32 - Yucateco bible

Jeremías 32

¹Tu diez ja'abil u ajawil Sedequías tu lu'umil Judae', Yuumtzile' tu t'aanaj Jeremías, tu ja'abil dieciocho u ajawil ca'ach Nabucodonosor.

²Ti' le kiino'obo', u aj ba'atelo'ob u ajawil Babiloniae' táan ca'ach u ba'ateltico'ob Jerusalén, aj bóobat Jeremíase' kala'an ca'ach tu táancabil u kalab najil, jalach naj.

³Ajaw Sedequías túuxt kalbil tumen Jeremíase' tu ya'alaj: Yuumtzile' cu ya'alic: Bin in ca'aj in beet u lúubul le caaja' tu kab u ajawil Babilonia,

⁴ajaw Sedequíase' ma' bíin púudzuc ti' le j caldeobo', ba'ale' bíin lúubuc tu kab u ajawil Babilonia, bíin xi'ic tu táan.

⁵Nabucodonosore' bíin u bis Sedequías tu caajil Babilonia, tu'ux bíin p'a'atac, tac quéen ka'ajac ti' teen. Quex ca ba'atelnaque'ex yéetel le j caldeob, ma' bíin béeyaque'exi'. Teen Yuumtzil teen a'alic.

⁶Jeremíase' tu ya'alaj: Yuumtzile' tu t'anajen ca tu ya'alaj ti' teen:

⁷U'uye, Hanameel a láak, u paal Salum a dzeyum, yaan u taal u ka'ayt contech jun xéet' lu'um yaan ti' tu lu'umil Anatot u ti'al ca a man ti', tumen teech u najmal a manic tumen teche' u nadza'an láaktzilech.

⁸Jach je'el bix tu ya'alaj ti' teen Yuumtzile', in láak Hanameele' j taal u yilen te tu'ux kala'aneno', ca tu ya'alaj ti' teen ca in man le lu'um yaan ti', tu caajil Anatot, ichil u lu'um u múuch' cajtalilo'ob u otochnáalo'ob Benjamín, tumen ti' teen u najmal u co'onol, u ti'al ca p'áatac ti' teen, tumen teen u nadza'an láaktzilen. Le ca tin na'ataj ti' Yuumtzil u taal le t'aana',

⁹ca tin manaj le lu'um ti' in láak Hanameel. Tin kubaj diecisiete sac taakin ti', le bajux t a'alajo', ca tin beetaj u ju'unile' ca dzalabta'ab tumen le máaxo'ob j ilo'.

¹⁰

¹¹Cu dzo'ocole' ca tin ch'a'aj ca'a p'éel u ju'unil le moc t'ano', jun p'éele' u ju'unil úuchic in manjique' dzalabta'an, u láak jun p'éele' chéen u ju'unil úuchic u co'onol,

¹²ca tin dzaj ti' Baruc u paal Nerías u ya'abil Maasías, tu táan in láak Hanameel, yéetel tu táan le máaxo'ob tu dzíibtajo'ob u kaaba'ob u ti'al u jajcuntico'ob, tu táan tuláacal le j judíob culucbalo'ob ca'ach tu táancabil u cúuchil tu'ux cu yúuchul canan.

¹³Tu táano'obe' tin wa'alaj ti' Baruc:

¹⁴Yuumtzil u yuumil tuláacal páajtalil u Ku Israele', cu ya'alic: Ch'a'a le ca'a p'éel u ju'unil moc t'ana', le dzalabta'an yéetel le chéen u ju'unil coonolo', ca a ta'ac ti' jun p'éel p'úul, u ti'al ma' u séeb la'abal.

¹⁵Tumen Yuumtzil u yuumil tuláacal páajtalil, u Ku Israele' cu ya'alic: Te j lu'uma' bíin ca'a ma'anac najo'ob, coolo'ob yéetel u x péet pachilo'ob uvaob.

¹⁶Cu dzo'ocol in kubic ti' Baruc u paal Nerías u ju'unil le lu'umo', ca j payalchi'inajen ti' Yuumtzil beya':

¹⁷Teech, Yuumtzil, yéetel nojoch jéechcabil a páajtalile' ta beetaj ca'an yéetel lu'um. Mina'an mix ba'al talam a ti'al.

¹⁸Ca we'esic a yaacunaj ti' ya'abcach ch'i'ibalo'ob, ba'ale' ca jadzic xan le máaco'ob tu yo'olal u keban u taataob. ¡Je'el túuno', Ku, ti' teche' yaan nojoch páajtalil, a kaaba'e' Yahveh, ti' máax yaan tuláacal páajtalil!

¹⁹Teche' nojochech ti' ba'ax ca tucultic, nojochech xan ti' ba'axo'ob ca beetic. Teche' ca wilic tuláacal ba'al cu beetic le wíinico'obo', le t o'olale' ca dzáic le ba'ax cu najmatico'obo'.

²⁰Teech ta beetaj máactzilo'ob yéetel chíiculalo'ob Egipto, tac xan bejela'e' cu bin a beetic tu lu'umil Israel bey xan ichil tuláacal máaco'ob, le t o'olal cu nojbe'encunta'al a kaaba'.

²¹Teche' yéetel nojoch jéechcabil páajtale' ta jóokesaj a caajal Israel tu lu'umil Egipto, le ca ta beetaj máactzilo'ob yéetel chíiculalo'ob ca ta láaj chupajo'ob yéetel sajaquil.

²²Ta dzaj ti' Israel le lu'uma', tu'ux cu yáalcab leche yéetel caab, bey u yáalcab ja'e', je'el bix ta séeb chi'itilac ti' u máanja'an ch'i'ibalo'ob.

²³Ba'ale' le ca j ooco'ob te j lu'uma' le ca jéedzo'obe', ma' tu dzo'ocbeso'ob mix tu yu'ubajo'ob le t'aan ta wa'alaj ti'obe'. Le t óolale' ta túuxtaj tuláacal le kaas tu yóokolo'oba'.

²⁴Bejela'e' le j caldeobo' dzo'oc u beetico'ob níix lu'umo'ob u ti'al u yooclo'ob u beeto'ob loob ti' le caaja', leti' le ba'atel, le wi'ij yéetel báan quíimil, bíin u beet u lúubul le caaj tu kab u aj p'eeco'ob. Yuumtzil, teche' ca wilic táan u yúuchul le ba'ax ta wa'alajo'.

²⁵Quex beyo' ta wa'alaj ti' teen ca in man yéetel ca in bo'ot le lu'um tu táan le aj jaajcunajo'obo', quex tumen le caaja' bin u ca'aj lúubul tu kab le j caldeobo'.

²⁶Yuumtzil túune' tu núucaj ti' Jeremías:

²⁷Teen Yuumtzil, u Ku tuláacal aj cuxa'an. Mina'an mix ba'al talam a ti'al.

²⁸Bey túuno', tene' quin wa'alic ti' teech: Bin in ca'aj in beet u lúubul le caaj tu kab Nabucodonosor, u ajawil Babilonia, yéetel tu kab le j caldeobo'.

²⁹Le j caldeob cu ba'ateltico'ob le caajo' bíin oojco'obi', bíin u t'abo'ob; bíin u tóoco'ob pa'ate' yéetel le najo'ob, tu'ux ca'ach cu tóoca'al poom tu yóokol le najo'obo', yéetel cu ku'ubul vino ti' jela'an kuob, u ti'al ca'ach in p'a'asta'al.

³⁰U caajil Israel yéetel u caajil Judae' tu yáax chuunili', amal tu beetajo'ob le ba'ax in p'ectmaje'; le j israelitaob ma' jáawac u si'ipiltalo'ob yéetel kuob leti'ob beetmajil. Teen Yuumtzil, teen a'alic.

³¹Le caaja' líikbal chu'unpajic tac bejela'e', chéen cu beetico'ob in p'u'ujul yéetel in sen kuuxil. Le t o'olale' bin in ca'aj in beet u samkajal.

³²Tu yo'olal dzo'oc u sen pajico'ob in subtale' yéetel u kaakas cuxtalo'ob, u caajil Israel yéetel Judá, pa'ate' yéetel u ajawilo'ob, yéetel u nuuquilo'ob, yéetel u aj kiino'ob, u aj bóobato'ob yéetel tuláacal u cajnáalilo'ob Judá yéetel Jerusalén.

³³Tu cúulpachteno'ob, ma' tu pactajeno'obi'. Quex mix jun p'éel kiin tin jáawsaj in tzolic u xiquino'ob, ma' tu dzo'ocbesajo'obi' mix tu yóoltajo'ob u kamo'ob in tzol xiquini'.

³⁴J kuchpaj u yóolo'ob u manba'alcuntico'ob in kulnaj, jun páaycunta'an ti' teen, ca tu dzajo'ob u p'ecbe'en kuob ichil.

³⁵Bey xan tu beetajo'ob u multuunil kultaj tu táax kóom lu'umil Ben-hinom, u ti'al u tóoquico'ob u j xibil paalal yéetel u x ch'upul paalal bey quíimsbil ti' Moloc, bey tu beetilaco'ob u kebanchajal Judá, jun p'éel ba'ax p'ecbe'en in ti'alt, tumen ma' tin wa'alaj ca u beeto'obi', mix j máan tin tuuculi'.

³⁶Teen Yuumtzil, u Kuen Israele', quin wa'alic tu yo'olal le caaj ca wa'alic bin u ca'aj lúubul tu kab ajaw Babilonia, tu yo'olal ba'atel, wi'ijil yéetel báan quíimil:

³⁷Bin in ca'aj in much'quint tuláacal u aj táan caajilo'ob ti' tuláacal múuch' caajo'ob tu'ux tin ki'itbesajo'ob le ca'aj léec in nojoch p'u'ujul, in sen kuuxil yéetel in dzíiquil, bíin in beet u suuto'ob te j cúuchila' u ti'al ca cajlaco'ob yéetel jéedzel.

³⁸Leti'obe' bíin in caajalto'ob, teen xane' bíin u Kuinteno'ob.

³⁹Bíin in beet ca yanac ti'ob alab óolal chéen u ti'al u tziquiqueno'ob, tuláacal u kiinilo'ob u cuxtal u ti'al u bin utzil ti'ob bey xan ti' u ch'i'ibalo'ob.

⁴⁰Bíin in beet yéetelo'ob jun p'éel nup t'aan mina'an u xuul: bíin in kax t'antinbáa in beet utz bíin xan in chupo'ob yéetel u dzíibolalil u tziquiqueno'ob, ma' xan u tzelicuba'ob ti' teen.

⁴¹Tene' bíin qui'imacchajac in wóol in beetic utz ti'ob, yéetel tuláacal in pucsi'ikal bey xan yéetel jaaj óolal bíin in beet u cajtalo'ob te j lu'uma'.

⁴²Tu ya'alaj xan Yuumtzil: Je'el bix tin túuxtaj le noj yaj ti' le caaja', bey xan bíin in túuxt tuláacal le utz in wa'almaj ti'obo'.

⁴³Ti' le lu'um dzo'oc a wa'alic yaan u p'áatal x tocoyila', x ma' cajnáalilo'ob, yéetel mix ba'alche'ilo'ob, yéetel yaan bin u lúubul tu kab j caldeobe', bíin ca'a ma'anac lu'umo'obi'.

⁴⁴Bíin úuchuc maan, bíin beeta'ac u ju'unil moc t'aan yéetel u dzalab bey xan u dzíibil kaaba' aj jaajcunajo'ob. Tuláacal bíin úuchuc tu lu'umil Benjamín, tu bakpach Jerusalén, tu caajilo'ob Judá, je'el bix tu múuch' cajtalo'ob u pu'uquilo'ob, tac le táax lu'umo', yéetel tu noj caajilo'ob Néguev, tumen teen bíin in beet u kexpajal u kinyajil. Teen Yuumtzil, teen a'alic.