Read Yucateco Jeremías 33 Bible Online

Jeremías 33 - Yucateco bible

Jeremías 33

¹Ca'aliquil ti'ili' kala'an Jeremías tu táancabil kalab naje', Yuumtzile' tu ca'a t'aanaj ca tu ya'alaj ti':

²Téen Yuumtzil, teen tin beetaj le lu'umo', teen tin pataj, cu dzo'ocole' ca tin t'alcuntaj tu cúuchil, quin wa'alic ti' teech:

³T'aneni', teen bíin in núuc ti' teech, bíin in dzáa a wojéelt ba'alo'ob nuuctac, yéetel talamtaco'ob ma' a kaj óoli'.

⁴Teen Yuumtzil, u Kuen Israel, yaan teen jun p'éel péectzil tu yo'olal u najilo'ob Jerusalén, yéetel u najilo'ob u ajawilo'ob Judá bíin je'eneco'ob. Le u jóokolo'ob yéetel u táadz máascabo'ob u ti'al j ba'atel yéetel le j caldeob máaxo'ob cu líiksico'ob níix lu'um u ti'al u ba'atelto'ob le caaja', chéen u ti'al ca niccunta'ac quimeno'ob. Teen, tin noj p'u'ujulile' yaan in beetic u quíimilo'ob tumen dzo'oc in tzelic in pactic ti' le caaja' tu yo'olal ya'ab le kaas u beetmajo'obo'.

⁶Ba'ale' bíin in dzaco'ob, bíin dzáa u toj óolalo'ob, bíin in beet xan ca u najmatico'ob yéetel tziiquil u jéedzelo'ob mix ba'al xan ca péecsic u yóolo'ob.

⁷Bíin in kex u kinyajil Judá yéetel Israel, bíin in ca'a líikes u caajalo'ob u ti'al ca suunaco'ob p'áatal je'el bix ca'ache'.

⁸Bíin in p'o'ob ti' tuláacal le keban tu beetajo'ob ma' utz tin táano', yaan xan in sa'atsic tuláacal le kaas tu beetajo'ob le ca tu beetajo'ob u j ma' u'uyaj t'aanil ti' teno'.

⁹Jerusalene' bíin suunac qui'imac óolal in ti'al, bíin suunac xan in tziiquil yéetel in nojbe'enil, tu táan tuláacal u caajilo'ob le lu'umo'. Le quéen u yu'ubo'ob u tzicbalta'al tuláacal le utz bíin in túuxt tu yóokol u cajnáalilo'ob Jerusalén, yéetel tuláacal le ayikalil bíin in dzáa ti'ob, bíin quiquilanquilo'ob yéetel sajaquil.

¹⁰Yuumtzile' cu ya'alic: Te'exe' ca wa'aliquex, le cúuchil bina' x tocoychaja'an, mina'an bin máaco'ob mix ba'alche'ob; u bejilo'ob bin Jerusalén yéetel u caajilo'ob Judá ch'enecnac, mix máac caja'ani', mix ba'alche'ob. Ma'alob co'ox ilic, te'ela' bíin ca'a u'uya'ac

¹¹u kaayilo'ob kiinbesaj yéetel qui'imac óolal, u kaayilo'ob aj kam nicte'ob, bíin u u'uya'ac u ya'ala'al: Dza'ex nib óolal ti' Yuumtzil u yuumil tuláacal páajtalil, tumen leti'e' utz, u yaacunaje' mina'an u xuul. bíin taasa'ac kulnaj u ti'ibil óolalilo'ob nib óolal. Bey, téen bíin in kex u kinyajil le lu'uma', u ti'al ca suunac je'el bix ca'ache'. Teen Yuumtzil, teen a'alic.

¹²Yuumtzil u yuumil tuláacal páajtalile' cu ya'alic: Le múuch' caajo'ob x tocoy yanilo'ob bejela'a', mina'an u máaquilo'ob mix u ba'alche'ilo'ob ti' tuláacal u caajilo'obe', bíin ca'a yanac suuc tu'ux bíin xi'ico'ob le j canan tamano'ob u biso'ob u j tamano'obi'.

¹³Ma' chéen tu lu'umil le caajo'ob yano'ob te j pu'uco' ba'ale' tac tu táax lu'umilo'ob Néguev, bey tu lu'umo'ob Benjamín, yaan tu bakpach Jerusalén yéetel u láak u caajilo'ob Judá, bíin ca'a ila'ac j canan tamano'ob táan u xoquico'ob u j tamano'obi'. Teen Yuumtzil, teen a'alic.

¹⁴Yuumtzile' cu ya'alic: Bíin kuchuc u kiinil in dzo'ocbesic u séeb chi'il le qui'iqui' t'aano'ob tin beetaj ti' u caajil Israel yéetel ti' u caajil judá.

¹⁵Le quéen kuchuc u ja'abile', ti' le kiino' bíin in beet u yantal jun túul u ch'i'ibal David, sijnal tu yotoch ca u beet u yantal p'is óolal yéetel tojil ti' le lu'uma'.

¹⁶Ti' le kiino' mix máac bíin beetic loob ti' Judá, Jerusalén bíin cajlac x ma' sajaquil. Yéetel le kaaba' t'a'anaca': Yuumtzile', leti' c muuk.

¹⁷Téen Yuumtzil teen a'alic: Mix bikin bíin p'áatac ma' u yantal jun túul u ch'i'ibal Davib u ti'al ca culac tu jalach káanche' Israel,

¹⁸mix bikin bíin p'áatac ma' u yantal aj kiino'ob tu ch'i'ibalo'ob Leví u ti'al ca u kubo'ob láaj tóocbil ba'alche'ob, u tóoco'ob u ti'ibil óolal janalbe'en neeko'ob ti' in tziiquil, yéetel u ti'al u dza'ob ti' teen u láak quíimsbil ba'alche'ob.

¹⁹Yuumtzile' tu t'anaj Jeremías ca tu ya'alaj ti':

²⁰Téen Yuumtzil, teen a'alic: Ma' tu páajtal u p'áatal ma' u béeychajal le nup t'aan in beetmaj yéetel le kiin bey xan yéetel le áakabo', le t o'olale' ma' tu páajtal u p'áatal ma' kuchul le kiino' mix le áakab tu jach tu ja'abil.

²¹Le nup t'aan in beetmaj yéetel in palitzil David, ma' tu páajtal ma' u béeychajal, mix bikin bíin p'áatac ma' yantal jun túul u ch'i'ibal ca u beetubáa ajaw tu jalach káanche', wa ca p'áatac ma' u béeychajal xan in nup t'aan yéetel in aj kiino'ob, u ch'i'ibalo'ob Leví.

²²Ti' u ch'i'ibalo'ob in j palitzil David yéetel ti' in aj meeyjulo'ob le aj kiino'ob, u ch'i'ibal Leví, bíin in ya'abcuntico'ob je'el bix u eekilo'ob ca'an, yéetel u sa'am lu'umil ka'anab, mix máac cu páajtal u xoquic.

²³Yuumtzile' tu t'anaj Jeremíase', ca tu ya'alaj ti':

²⁴¿Ma' wa a wu'uy u ya'ala'al tumen le máaco'ob ma' in wóolt in kam le ca'a túul láaktzilo'ob tin yéeyaj ca'acho', Israel yéetel Judá? ¡Le t óolale' yéetel kex óol cu pactico'ob in caajal, mix cu yilico'ob bey jun p'éel nojoch múuch' caajo'ob!

²⁵Je'elo', teen Yuumtzil, teen a'alic: Teen beetmajil jun p'éel nup t'aan yéetel le kiino', bey xan yéetel le áakabo', in wa'almaj xan bix cu bin meyaj ca'an yéetel lu'um,

²⁶mix bikin bíin in cúulpacht u ch'i'ibal Jacob yéetel David in j palitzil, mix tu bin jáawal in jóokesic ichilo'ob máaxo'ob cu bin j méektáantico'ob u ch'i'ibalo'ob Abraham, Isaac yéetel Jacob. Tumen bíin in ch'a'a óotzilil ti'ob, bíin in beet u kexpajal u kinyajilo'ob.