Read Yucateco Jeremías 34 Bible Online

Jeremías 34 - Yucateco bible

Jeremías 34

¹Nabucodonosor, u ajawil Babilonia, yéetel tuláacal u aj ba'atelo'obe', u cajnáalilo'ob tuláacal le caajo'ob u kubmajuba'ob ca'ach yáanal u páajtalil, táan ca'ach u ba'ateltico'ob Jerusalén yéetel tuláacal le caajo'ob bakpachtmailo', Yuumtzile' tu t'anaj Jeremías ca tu ya'alaj ti':

²Téen Yuumtzil u Junab Ku Israel, quin wa'alic ti' teech, ca xi'iquech a wa'al ti' Sedequías u ajawil Judá: Bey u ya'alic Yuumtzila': Bin in ca'aj in beet u ch'a'abal le caaj tumen u ajawil Babilonia u ti'al ca u tóoque'.

³Teche' ma' bíin a jechic a lúubul tu kab; bíin chu'ucuquech, bíin ku'ubuquech xan ti', cu dzo'ocol a bisa'al tu táane', bíin bisa'aquech Babilonia.

⁴Quex beyo', Sedequías, u ajawil Judá u'uy ba'ax quin in wa'al ti' teech, teen Yuumtzil: Ma' bíin quíimiquech tu yej máascabi'.

⁵Bíin quíimiquech x ma' sajaquil, bíin tóoca'ac ba'al qui'iboc tu kiinil a mucsaj, je'el bix le j tóoca'abo'ob tu mucsajo'ob a máanaja'an ch'i'ibalo'ob ajawnajo'ob táanil ti' teech, bíin u ya'alo'ob: ¡Waay, in dzuulil! táan u yaayaj óolalo'ob ta wo'olal. Téen Yuumtzil, quin wa'alic yéetel quin dzáic u t'aanil.

⁶Aj bóobat Jeremíase' tu ca'a a'alaj tuláacal ti' ajaw Sedequías tu caajil Jerusalén.

⁷Ti' le je'elo', u aj ba'atelo'ob u ajawil Babilonia táan ca'ach u ba'ateltico'ob Jerusalén, Laquis yéetel Azeca, chéen le jaaj ca'a p'éel caajo'ob nuuctac p'aatal ca'ach ti' Judaa'.

⁸Yuumtzile' tu t'anaj Jeremías, le ca j dzo'oc u beetic ajaw Sedequías jun p'éel nup t'aan yéetel tuláacal u cajnáalilo'ob Jerusalén tu'ux cu ya'alic u jáalkabtic le j palitzilo'obo'.

⁹Le nup t'aano' cu ya'alic le máax yaan hebreob u palitziltmaje', xiib wa x co'olele' unaj u jáalkabtic, tu yo'olal ma' u palitziltic u yéet lu'umil.

¹⁰Tuláacal u nuuquilo'ob yéetel tuláacal le caajo' tu yu'ubo'ob ma'alob le kax t'aano', ca tu jáalkabtajo'ob u j palitzilo'ob, ma' j beeta'ab u meyajo'obi.

¹¹Ba'ale' cu dzo'ocole' ka'aj yiiko'ob iquil tu jáalkabtajilaco'ob, ca tu ca'a beeta'ab u meyajo'ob bey palitzilo'obe'.

¹²Yuumtzil túune' tu t'anaj Jeremías, ca tu ya'alaj ti':

¹³Teen Yuumtzil u Kuen Israel, tin beetaj jun p'éel nup t'aan yéetel a úuchben ch'i'ibale'ex le ca tin jóokesajo'ob Egiptoe', tu'ux cu meyajo'ob ca'ach, beyo'ob j palitzilo'obe'. Ca tin wa'alaj ti'ob

¹⁴wa dzo'oc u meyajta'alo'ob seis ja'abo'obe', u najmal u jáalkabtico'ob tu siete ja'abil. Ba'ale' a máanja'an ch'i'ibale'exe' ma' tu yu'ubajo'ob in t'aani', mix tu dzo'ocbesajo'obi'.

¹⁵Bejela'e' dzo'oc u kexpajal a cuxtale'ex, qui'imacchaj in wóol le ca tin wilaj a jáalkabtique'ex le palitzilo'ob a wéet lu'umile'exo'. Cu dzo'ocole' ta beetaje'ex jun p'éel nup t'aan tin taan ichil le kulnaj jun páaycunta'an ti' teno'.

¹⁶Ba'ale' cu dzo'ocole' ta kexaje'ex a tuucule'ex ca ta maanba'alcuntaje'ex in kaaba', ta beetaje'ex u meyajtique'ex tu ca'a teen le palitzilo'ob, quex dzo'oc ca'ach a jáalkabtique'exo'obe'.

¹⁷Bey túuno', teen Yuumtzil quin wa'alic: Te'exe' ma' ta wu'uyaje'ex in t'aani', tumen ma' ta jáalkabtaje'ex le palitzilo'ob a wéet lu'ume'exo'; bejela'a túune' bin in ca'aj in jáalkabt ba'atelo'obo', báan quíimil yéetel wi'ij, u ti'al u taasic jak óolal ti' tuláacal u ajawilo'ob le lu'uma'. Téen Yuumtzil, teen a'alic.

¹⁸U noj aj meyajo'ob Judá yéetel Jerusalén pa'ate' yéetel u j koosilo'ob jalach naj, aj kiino'ob yéetel tuláacal j táan caajilo'ob tu beetajo'ob jun p'éel nup t'aan tin taan: tu bujo'ob jun túul chan wacaxe' ca j máano'ob chúumuc ti' u ca'a búujul. Ba'ale' cu dzo'ocole' tu manba'alcuntajo'ob le nup t'aan yéetel u kex t'aano'.

²⁰Tu yo'olal lelo' bíin in beet u lúubulo'ob tu kab u aj p'eeco'ob, ca quíimsa'aco'ob, ca lu'ukuc u wíinclilo'ob tumen j ch'oom yéetel tumen u ba'alche'ilo'ob káax.

²¹Bey xan bíin in beet ca lúubuc Sedequías u ajawil Judá, yéetel u nuuquil u aj dzíibo'ob tu kab u aj ba'atelo'ob u ajawil Babilonia, quex dzo'oc u jáawal u ba'ateltique'ex.

²²Bin in ca'aj in wa'al ti'ob ca suunaco'ob u puluba'ob tu yóokol le caaja', ca u ba'atelte ca u tóoque. Bíin in beet ca p'áatac x tocoyilo'ob le u láak u caajilo'ob Judá, mix jun túul u cajnáalilo'ob bíin p'áataqui'. Teen Yuumtzil, teen a'alic.