Read Yucateco Jeremías 35 Bible Online

Jeremías 35 - Yucateco bible

Jeremías 35

¹Tu kiinilo'ob ca'ach Joacim u paal Josías, u ajawil judae', Yuumtzile' tu t'aanajen ca tu ya'alaj ti' teen:

²Xeen tu caajal le j recabitaobo' ca t'aanaquech tu yéetelo'ob. Biso'ob ti' jun p'éel u káasabil le kulnajo', ca a dzáa vino ti'ob.

³Teen Jeremíase' j binen in caxt Jaazanías (u paal u yaanal Jeremías u yáabil Habasinías) yéetel u sucu'uno'ob, u paalal, yéetel tuláacal u yéet caajalo'ob le j recabitaobo',

⁴ca tin bisajo'ob kulnaj, tu káasab u paalal Hanán, u paal Igdalías, máax ca'ach jun túul u j palitzil Ku. Le káasaba', ti' yaan ca'ach tu tzéel u káasab u nuuquilo'ob kulnaj, yóokol u káasab Maasías, u paal Salum, máax canantic ca'ach u jool najil kulnaj.

⁵Tin chupaj le luucho'ob yéetel vino, ca tin dzaj ti' le recabitaob ca tin wa'alaj ti'ob: Uke'ex jun p'íit vino.

⁶Leti'obe' tu núucajo'ob: To'one' ma'atech c ukic vino, tumen Jonadab, u paal Recab, c úuchben ch'i'ibale' tu ya'alaj bic táabac c uke, mix to'on, mix j ch'i'ibal u najmal c ukic mix bikin.

⁷Bey xan tu wet'aj c beetic najo'ob yéetel c pakic cool mix u x péet pachil uva. Tu ya'alaje' ca cajlaco'on mantadz ti' chuybil najo'ob, ca páatchajac cuxtal ya'ab kiino'ob te j lu'um tu'ux c máan beyo'on j táanxel j lu'umilo'one'.

⁸To'one' t u'uyaj u t'aan, ca t beetaj tuláacal le ba'ax tu ya'alaj c úuchben ch'i'ibal Jonadab, ma' táan c ukic vino, mix to'on mix c atano'ob mix c paalal,

⁹mix t beetic c otoch u ti'al c cajtal, mix t beetic u x péet pachil uvaob, mix t pakic cool.

¹⁰Caja'ano'on ti' chuybil najo'ob, bey xan dzo'ocbesic xan tuláacal ba'ax tu ya'alaj c úuchben ch'i'ibal Jonadab.

¹¹Ba'ale' le ca j láaj ch'a'ab tumen Nabucodonosor u ajawil Babilonia tuláacal le múuch' caajo'oba', t dzaj t tuucul c taal Jerusalén u ti'al j púudzul ti' u aj ba'atelo'ob le j caldeob yéetel le j siriob; le t óolale' caja'ano'on Jerusalén.

¹²Yuumtzil túune' tu t'anaj Jeremíase' ca tu ya'alaj ti':

¹³Teen Yuumtzil, u yuumil tuláacal páajtalil, u Kuen Israel, quin wa'alic ti' teech ca xi'iquech a wa'al ti' u cajnáalilo'ob Judá yéetel Jerusalén: Cane'ex le ca'anbesaja', yéetel dzo'ocbese'ex in t'aan. Teen Yuumtzil, teen a'alic.

¹⁴U ch'i'ibalo'ob Jonadab u paal Recabe', tu dzo'ocbesajo'ob le ba'axo'ob j a'ala'ab ti'obo', ma' tu yukico'ob vino, le t o'olal tac bejela'e' ma' tu yukico'ob tumen cu dzo'ocbesico'ob u t'aan u yúuchben ch'i'ibalo'. Teen xane' dzo'oc in wa'alic ti' te'ex ya'ab u téenel, ba'ale' ma' ta wu'uyique'ex in t'aan.

¹⁵Dzo'oc in túuxtic in aj bóobato'ob, u ti'al u ya'alo'ob ti' te'ex: P'ate'ex a kaakas cuxtale'ex, yéetel le loolob ba'alo'ob ca beetique'exo'. Ma' a bine'ex tu paach u láak kuob mix a kultique'exo'ob, tumen ja'ali' beyo' je'el u páajtal a cuxtale'ex te j lu'um in dzaamaj ti' te'exa' yéetel ti' a wúuchben ch'i'ibale'exo'. Ba'ale' ma' ta dzo'ocbesaje'ex mix ta wu'uyaje'ex in t'aani'.

¹⁶U ch'i'ibalo'ob Jonadab, u paal Recab, dzo'oc u beetico'ob le ba'ax tu ya'alaj u yúuchben ch'i'ibalo'; ma' bey u caajil Israele' ma' tu yu'ubaj in t'aani'.

¹⁷Le t o'olale', teen Yuumtzil, u yuumil tuláacal páajtalil u Kuen Israel, quin wa'alic: Bin in ca'aj in beet u lúubul yóokol Judá yéetel tu yóokol u cajnáalilo'ob Jerusalene', tuláacal le noj yajilo'ob dzo'oc in wa'alico'. Tumen tene' dzo'oc in t'aan, te'exe' ma' ta wu'uyaje'exi'; tin t'aanaje'ex te'exe' ma' ta núucaje'ex in t'aani'.

¹⁸Cu dzo'ocole', Jeremíase' tu ya'alaj ti' le j recabitaobo': Yuumtzil u yuumil tuláacal páajtalil u Ku Israele' cu ya'alic: Bey tumen te'ex dzo'oc a wu'uyique'ex u t'aan a úuchben ch'i'ibal Jonadab, yéetel dzo'oc a beetique'ex ma'alob tuláacal ba'ax tu ya'alaje',

¹⁹teen, Yuumtzil u yuumil tuláacal páajtalil u Kuen Israel, quin jedzic ti' te'ex, mantadz cu bin j antal jun túul u ch'i'ibal Jonadab ca u meyajten.