Read Yucateco Jeremías 36 Bible Online

Jeremías 36 - Yucateco bible

Jeremías 36

¹Ti' u can ja'abil u méektáan Joacim, u paal Josías, u ajawil Judá, Yuumtzile' tu t'anaj Jeremías ca tu ya'alaj ti':

²Ch'a'a jun p'éel u ju'unil dzíibe', ca dzíibt tuláacal le ba'ax dzo'oc in wa'alic ti' teech tu yo'olal Israel, Judá yéetel tuláacal u chuucáan múuch' caajo'ob, líikbal le ca tin yáax t'aanajech tu kiinilo'ob Josíase' tac bejela'e'.

³Le quéen u yojéelto'ob le judíob tuláacal le noj yajo'ob quin tucultic in túuxtic ta wóokole'exo', quexi' ca u p'ato'ob u kaakas cuxtalo'obe', teen túune' bíin in sa'ats u kasa'anilo'ob yéetel u kebano'ob.

⁴Jeremíase' tu t'anaj Baruc, u paal Nerías, ca tu tzolaj tuláacal le ba'ax a'ala'ab ti' tumen Yuumtzilo', Baruc túune' tu dzíibtaj ti' jun wáal ju'un.

⁵Cu dzo'ocole' Jeremíase' tu tzolaj ti' Baruc le ba'axo'ob u najmal u beetico': Ila'a bix yanilen, tene' wet'a'an in bin tu kulnaj Yuumtzil.

⁶Le t o'olale', xeen teech tu kiinil su'ukin ca a xoc le Ju'un tin wa'alaj ti' teech ba'ax ca bin a dzíibte', le ta dzíibtajo', u ti'al ca u yu'ub tuláacal le caajo' yéetel tuláacal u cajnáalilo'ob Judá cu taalo'ob way u yu'ubo'ob u péectzil Yuumtzile'.

⁷Je'elajqui' u payalchi'ob ti' Yuumtzil u ti'al u káat óolalo'obe', ca u p'ato'ob xan u kaakas cuxtalo'ob, tumen u kuuxil yéetel u p'uja'anil Yuumtzil úuchic u yayaj t'antic le caaja' sen sajbe'entzilo'ob.

⁸Baruque' tu beetaj tuláacal le ba'ax a'ala'ab ti' tumen aj bóobat Jeremías: j bin kulnaj ca tu xocaj u péectzil Yuumtzil ti' le codzbil ju'uno'.

⁹Tu nueve winalil ti' u cinco ja'abil u méektáan Joacim u paal Josías, u ajaw Judá, j a'ala'abe', u cajnáalilo'ob Jerusalén je'el bix le taalaja'ano'ob ti' u láak u caajilo'ob Judae' ca su'ukinaco'ob tu táan Yuumtzil.

¹⁰Baruc j bin tu sujuy lu'umil kulnaj, tu yoocbal le Túumben Joolnajo', líikbal tu káasab Gemarías, u paal Safán máax dzíibtic ba'axo'ob cu yúuchul, tu xocaj ti' tuláacal le caajo' le codzobil ju'un tu'ux yaan ca'ach u t'aano'ob Jeremías.

¹¹Micaías, u paal Gemarías u yáabil Safane', tu yu'ubaj tuláacal u péectzil Yuumtzil j xo'oc tumen Baruc dzi'ibta'an ti' codzobil le ju'uno',

¹²ca j bin jalach naj, tu káasab le máax cu dzíibtic tuláacal ba'ax cu yúuchulo', tu'ux much'ucbalo'ob ca'ach tuláacal u nuuquilo'obo': Elisama, le aj dzíibo', Delaía, u paal Semaías; Elnatán, u paal Acbor; Gemarías u paal Safán; Sedequías, u paal Hananías, yéetel u láak u nuuquilo'ob.

¹³Micaíase' tu tzicbaltaj ti'ob tuláacal ba'ax tu yu'ubaj le ca j xo'oc le codzbil ju'un tumen Baruc tu táan tuláacal le caajo'.

¹⁴Le u nuuquilo'obo', tu túuxtajo'ob Jehudí, u paal ca'ach Netanías, u yáabil Selemías, u ca'a áabil Cusi u ti'al u ya'alic ti' Baruc ca u bis le ju'un tu xocaj tu táan tuláacal le caajo'. Baruque' tu ch'a'aj le ju'uno' ca j bin tu táano'ob,

¹⁵leti'obe' tu ya'alajo'ob ti': Culen, xoc ti' to'on le ju'uno'. Baruque' ca tu xocaj ti'ob,

¹⁶chéen p'elac tu yu'ubilaco'obe', chupo'ob yéetel sajaquil, ca tu pactajuba'ob tu baatzilo'ob jun túul tu táan u láak, ca tu ya'alajo'ob: Yaan c a'alic ti' ajaw tuláacal.

¹⁷Cu dzo'ocole' ca tu ya'alajo'ob ti' Baruc: Tzicbalt ti' to'on bix úuchic a dzíibtic tuláacal le ba'ala'.

¹⁸Baruque' tu núucaj: Jeremíase' le ti' tu tzolaj teen tuláacal, teen túune' tin dzíibtaj yéetel tinta ti' le codzobil ju'una'.

¹⁹Ca túun tu ya'alajo'ob ti' Baruc: ¡Teech yéetel Jeremíase' xeene'ex a ta'acbesaba'ex, mix máac ca u yóojelt tu'ux yane'ex!

²⁰Le nucuch jalacho'obo' tu p'atajo'ob le ju'un tu káasab Elisama, le máax dzíibtic tuláacal ba'ax cu yúuchulo', ca'aj j bino'ob jalach naj u ya'alo'ob ti' ajaw tuláacal ba'ax cu yúuchul.

²¹Ajawe' tu túuxtaj Jehudi ca u taas le ju'un yaan tu káasab Elisama, le ca j taasa'abe', Jehudie' tu xocaj tu táan ajaw, yéetel tu táan tuláacal le nucuch jalacho'ob bakpachtmilo'.

²²Tu yo'olal u winalil nueve ca'ache', ajawe' ti' yaan tu káasab tu'ux suuc u kíich tu kiinil que'elil, tu táan jun p'éel kíich t'aba'an.

²³Le quéen dzo'ococ ca'ach u xo'ocol tumen Jehudí óox p'éel wa can p'éel t'oololo'obe', le ajawo' cu xotic yéetel jun p'éel xotob, cu dzo'ocole' cu pulic ich káak. Bey tu beetilac tac ca tu tóocaj tuláacal le codzobil ju'uno'.

²⁴Le ajaw yéetel le u nuuquilo'ob tu yu'ubajo'ob le xooco' ma' tu ch'a'ajo'ob sajaquil mix chíicpaj wa tu yaj tu yóolo'obi'.

²⁵Elnatán, Delaía yéetel Gemarías tu káat óolto'ob ti' ajaw ma' u tóoquic le ju'uno', ba'ale' leti'e' ma' tu yóoltaj u beet ba'ax cu ya'alico'obi',

²⁶ba'ale' tu ya'alaj ti' Jerameel, yaan u ki'ikel ajaw ti', bey ti' Seraías, u paal Azriel, yéetel ti' Selemías u paal Abdeel, ca u macho'ob aj bóobat Jeremías bey xan u aj dzíib Baruc. Ba'ale' Yuumtzile' tu ta'acajo'ob.

²⁷Cu dzo'ocol u tóoca'al le ju'un tumen ajaw, tu'ux yaan ca'ach le t'aano'ob tu ya'alaj Jeremías, ca j dzi'ibta'ab tumen Baruque', Yuumtzile' tu t'aanaj Jeremías ca tu ya'alaj ti':

²⁸Ch'a'a u láak codzobil ju'une', ca dzíibt tu ca'a téen tuláacal le ba'axo'ob dzíibta'ab ca'ach ti' le yáaxo', le j tóoca'ab tumen Joacim u ajawil Judá.

²⁹A'al ti' le ba'alo'oba': Bey u ya'alic Yuumtzila': Teche' ta tóocaj le ju'uno', ca ta keyaj Jeremías tu yo'olal tu dzíibtaj ti' le ju'uno', yaan u taal u ajawil Babilonia u ti'al u kascunt le múuch' caajo'oba', bin u ca'aj u p'at x ma' máaquilo'ob yéetel x ma' ba'alche'ilo'ob.

³⁰Utz beyo', téen Yuumtzil, quin wa'alic ti' teech Joacim, u ajawil Judá, ma' bíin yanac a ch'i'ibal tu jalach káanche' Davidi'. A quimen wíinclile' bíin p'áatac tu yooxow kiin yéetel ti' u síisil áakab,

³¹teech yéetel a ch'i'ibale', pa'ate' yéetel a nuuquilo'obe', bíin in jadze'ex tu yo'olal a kebane'ex. Bíin beet u lúubul ta wóokole'ex yéetel tu yóokol u cajnáalilo'ob Jerusalén yéetel Judá tuláacal le noj yajilo'ob tin wa'alajo'ob, ti' ba'axo'ob, te'exe' ma' ta woquesaj ta wóole'exi'.

³²Jeremías túune' tu ch'a'aj u láak codzobil ju'une' ca tu dzaj ti' Baruc, u aj dzíib, máax tu dzíibtaj tuláacal le ba'axo'ob tu ca'a a'alaj Jeremíaso', jaaj a'albile', tuláacal le ba'ax dzíibta'an ti' le ju'un tóoca'ab ca'ach tumen ajaw Joacim. Jeremíase' tu tzayaj xan u láak ba'alo'obi'.