Read Yucateco Jeremías 37 Bible Online

Jeremías 37 - Yucateco bible

Jeremías 37

¹Nabucodonosor u ajawil Babiloniae', tu dzaj Sedequías u paal Josías u ti'al u ajawtal tu lu'umil Judá, u ti'al u jeelint Jeconías, u paal Joacim.

²Ba'ale' mix Sedequías mix u jalachilo'ob, mix le caajo' tu yóoltajo'ob u yu'ubo'ob le péectzil tu dzaj Yuumtzil tu chi' u aj bóobat Jeremías.

³Ajaw Sedequíase' tu túuxtaj Jucal, u paal Selemías, yéetel aj kiin Sofonías u paal Maasías u ti'al u yil aj bóobat Jeremías u ti'al u ya'alico'ob ti': Payalchi'inen t o'olal ti' Yuumtzil c Ku.

⁴Jeremíase' ma' ka'alac ca'achi, le beetic cu páajtal u máan je'el tu'uxac káat ichil le caajo'.

⁵Ca'aliquil u aj ba'atelo'ob faraone' dzo'oc ca'ach u jóokolo'ob tu caajil Egipto. Le j caldeobo' táan ca'ach u ba'ateltico'ob Jerusalén le ca tu yojéelto'obe' j luko'obi'.

⁶Yuumtzil túune' tu t'anaj aj bóobat Jeremías, ca tu ya'alaj ti'

⁷ca a'ala'ac ti' le j taasaj t'aano'obo': A'ale'ex ti' u ajawil Judá, máax túuxte'ex a káat chi'itene'exo', u aj ba'atelo'ob faraón, tu dzajuba'ob ca'ach bej u ti'al u yáantico'obe', dzo'oc u suuto'ob Egipto.

⁸Le j caldeobo', bíin suunaco'ob u ba'atelto'ob u caajil Jerusalén, bíin u ch'a'ob bíin xan u tóoco'ob.

⁹Teen Yuumtzil, teen a'alic te'exe': Mix a chéen tucultique'ex wa dzo'oc u bino'ob le j caldeobo', tumen ma' bey bíin úuchuco'.

¹⁰Quex ca pa'a u muuk tuláacal u aj ba'atelo'ob le j caldeob táan u ba'ateltique'exo', ma' bíin p'áatac chéen wa jay túul ucha'an loob ti'obi', le máaco'obo' bíin líikico'ob u ti'al u tóoquico'ob le caaja'.

¹¹Ca'aliquil táan ca'ach u p'áatico'ob Jerusalén u aj ba'atelo'ob le j caldeobo', tumen tu yojéeltajo'ob táan u taal u aj ba'atelo'ob faraone',

¹²Jeremíase' jóok te j caajo' u ti'al u binbal tu lu'umil Benjamín u ti'al u t'ox jun p'éel kamba'albáil ichil u yéet lu'umilo'ob.

¹³Ba'ale' le ca j kuch tu Joolnajil Benjamine', jun túul máac cu kaaba'intic Irías u paal Selemías, yéetel u yáabil Hananías, máax ca'ach u nojchil le j canano'obo', j ma'ach Jeremías tumen, ca tu ya'alaj ti': ¡Teche' táan a bin ichil le j caldeobo'!

¹⁴Ca tu núucaj Jeremías: ¡Ma' jaaji', ma' ichil le j caldeob quin bini'! Ba'ale' Iríase' ma' tu yóoltaj u yu'ubi', tu machaje' ca tu bisaj tu yicnal le noj aj meyajo'obo'.

¹⁵Le máaco'oba' p'u'ujo'ob ti' Jeremías ca tu túuxtajo'ob ca ja'adzac yéetel ca ka'alac tu yotoch Jonatán aj dzíib, le naja', dzo'oquili' u su'utul u kalab naje'.

¹⁶Jeremíase' bisa'ab j kalbil tu yáanal lu'umil le kalabo', tu'ux j p'áat ya'ab kiino'ob.

¹⁷Ajaw Sedequíase' tu túuxtaj ca taasa'ac Jeremías jalach naj, ca kujsa'ab Jeremías tu táane', leti'e' tu x mucul káataj ti': ¿Yaan wa u péectzil Yuumtzil? Jeremíase' tu núucaj: Yaan, bey cu ya'alica': a tzicbe'enile' bin u ca'aj lúubul tu kab u ajawil Babilonia.

¹⁸Jeremíase' tu káataj xan ti' ajaw Sedequías: ¿Ba'ax loobil in beetmaj ti' a tzicbe'enil, wa ti' a nucuch aj meyajo'ob, wa ti' a caajal u ti'al ca ka'alaquen?

¹⁹¿Tu'ux yano'ob le aj bóobato'ob cu ya'alico'ob ma' bíin u ba'ateltech u ajawil Babilonia mix teech mix a caajal?

²⁰U yu'uben a tzicbe'enil, beet utz a dzáic ti' teen le ba'ax quin káatic ti' techa': Ma' a cha'ic in bisa'al tu ca'a téen tu yotoch Jonatán le máax dzíibtic tuláacal ba'ax cu yúuchul, ma' xan ca quíimiqueni'.

²¹Ajaw Sedequías túune' tu ya'alaj ca p'a'atac tu táancabil canan, yéetel sáamsamale' ca bisa'ac jun p'éel waaj tu beel le j meen waajo'obo'. Beeta'ab beyo' ca'aliquil yaan ca'ach waaj te j caajo'. Bey úuchic u p'áatal Jeremías tu táancabil canan.