Read Yucateco Jeremías 38 Bible Online

Jeremías 38 - Yucateco bible

Jeremías 38

¹Sefatías u paal Matán, Gedalías u paal Pasur, Jucal u paal Selemías, yéetel Pasur u paal Malquías, tu yu'ubajo'ob u ya'alic Jeremías tu táan le caajo' le t'aano'oba':

²Yuumtzile' cu ya'alic: Máax cu bin j p'áatal te j caajo' bíin quíimic ich ba'atel, yéetel wi'ij wa báan quíimil. Ba'ale' le máax cu jóokol u ti'al u kubicubáe' ti' le j caldeobo', bíin páatac u toquic quex u cuxtal.

³Yuumtzile' cu ya'alic: Le caaja' yaan u lúubul tu kab u aj ba'atelo'ob u ajawil Babilonia. Leti' cu bin u ch'a'e, mix máac bíin páatac u wet'ic.

⁴Le nucuch aj meyajo'obe' tu ya'alajo'ob ti' ajaw: Yaan u quíimsa'al le máaco', tumen yéetel u t'aano'obe' cu lúubsic u yóol le aj ba'atelo'ob p'áatalo'ob tac bejela'a' te j caaja', bey tu ya'alajilaco'ob xan tuláacal le máaco'obo'. Le máaca' ma' tu caxtic u yutzil le caaja', chéen u kaasil.

⁵Ajaw Sedequíase' tu núucaj ti'ob: Ma'alob, beete'ex yéetel, je'el ba'alac a káate'exe'. Tene' ma' tin páajtal ta wéetele'ex.

⁶Leti'ob túune' tu machajo'ob Jeremíase' ca tu pulajo'ob ich u chultun Malquías u paal ajaw, yaan ca'ach tu táancabil canan. Ca tu yéemsajo'ob Jeremías yéetel suumo'ob, tu yo'olal chéen luuk yaan ca'ach te j chultuno' Jeremíase' dzóop ichil.

⁷Jun túul etiope cu kaaba'intic Ebed-melec, jun túul xiib utz u yila'al u meyaj te jalach najo', tu yu'ubaj u ya'ala'al dzo'oc u pu'ulul Jeremías ichil le chultuno'. Ti' le kiino' ajawe' ti' yaan ca'ach ti' jun p'éel múuch'cabil tu Joolnajil Benjamín.

⁸Ebed-melec túune' jóok ti' le jalach najo' ca j bin u ya'al ti' ajaw:

⁹Tzicbe'en, le ba'ax dzo'oc u beetico'ob le máaco'ob yéetel Jeremíaso', jun p'éel loob. Dzo'oc u pulico'ob ichil jun p'éel chultun, te'elo' táan u quíimil yéetel wi'ij, tumen mina'an waaj te j caaja'.

¹⁰Tu séeblaquile' ajawe' tu ya'alaj ti' Ebed-melec ca u bis tu yéetele' treinta u túulul j xiibo'ob u ti'al u jóokeso'ob ti' le chultun ma'ili' quíimique'.

¹¹Ebed-melec tu bisaj le j xiibo'obo', ca j bin tu cúuchil tu'ux cu dza'abal u nookil jalach naj ca tu ch'a'aj x lalab nookobe', ca tu jalkesaj yéetel suumo'ob ti' Jeremías ichil le chultuno',

¹²ca tu ya'alaj ti': Dzáa le x lalab nooko'ob yáanal a xiiko'ob u ti'al ma' u weliquech le suumo'obo'. Jeremíase' tu beetaj beyo'.

¹³Le j xiibo'ob túuno' tu jalkesajo'ob le suumo' ca tu jóokeso'ob te'elo'. Cu dzo'ocole' Jeremíase' j p'áat tu táancabil canan.

¹⁴Ajaw Sedequíase' tu ya'alaj ca taasa'ac tu táan, aj bóobat Jeremías, tu yóox p'éel u jool najil kulnaj. Te'elo' ajawe' tu ya'alaj ti': Bin in ca'aj in beet ti' teech jun p'éel káat chi', in káate' ca a wa'al ti' teen u jaajil.

¹⁵Jeremíase' tu núucaj: Wa quin núuquic ti' teech le káatchi'a', ca túuxtic quíimsbilen, wa xan quin dzáic ti' teech jun p'éel tzol xiquine', ma' bíin a wu'uye.

¹⁶Ba'ale' Sedequíase' tu mucul beetaj le jalach t'aan ti' Jeremíasa': Quin jalach t'antic ti' teech, tu kaaba' Yuumtzil máax tu dzaj cuxtale', ma' bíin túuxtech quíimsbili', mix bíin in kubech tu kab le máaxo'ob u káato'ob u quíimsecho'obo'.

¹⁷Jeremías túune' tu ya'alaj ti' Sedequías: Yuumtzil u yuumil tuláacal páajtalil u Ku Israele', cu ya'alic: Wa ca kubicabáa jun puli' tu kab u náacomo'ob u ajawil Babiloniae', teech yéetel a wotochnáalo'obe' ma' táan a quíimile'ex, le caaja' ma' bíin tóoca'aqui'.

¹⁸Ba'ale' wa ma' ta kubicabáa ti'obe', le j caldeobo' bíin u ch'a'ob le caaja', cu dzo'ocole' bíin u tóoco'ob, teche' ma' bíin páatac a púudzuli'.

¹⁹Sedequíase' tu núucaj: Sajaquen ti' le judíob j máano'ob tu tzéel le j caldeobo', wa quin lúubul tu kabo'obe' bíin u beeto'ob in mukyaj.

²⁰Jeremíase' tu núucaj: Ba'ale' a tzicbe'enile' ma' bíin lúubuc tu kabo'obi'. U beet utz u dzo'ocbesic a tzicbe'enil u t'aan Yuumtzil dzo'oc in wa'alica', u ti'al ca xi'ic utzil ti' teech, ja'ali' bey je'el a cuxtalo'.

²¹Yuumtzile' tu ye'esaj ti' téen ba'ax bíin úuchuc, wa cu pechcubáa a tzicbe'enil u ti'al ma' u kubicubáe':

²²tuláacal le co'olelo'obo' cu bino'ob j p'áatal tu jalach naj u ajawil Judae' bíin jóokesa'aco'ob u ti'al j dzaabil ti' u náacomo'ob u ajawil Babilonia, leti'obe' bíin u ya'alo'ob: Ajawe' tu'us tumen u yéet bisajba'ob, ca j pa'ab u muuk; tu cha'ajo'ob u dzóopol u yooc ich luuk, ca tu xúump'attajo'ob.

²³Jeremíase' j bin u ya'alic ti' ajaw: Tuláacal a watano'ob yéetel u paalal a tzicbe'enile' bíin ku'ubuco'ob ti' le j caldeobo', a tzicbe'enile' ma' bíin páatac u púudzul ti'obi', ba'ale' bíin ku'ubuquech tu kab u ajawil Babilonia, cu dzo'ocole' cu tóoca'al le caaja'.

²⁴Sedequías túune' tu núucaj ti' Jeremías: Wa a yaabiltmaj a cuxtale', ma' a wa'alic ti' mix máac le ba'ala'.

²⁵Wa u nuuquil u meyajo'ob jalach naj cu yojéeltico'ob t'aanajen ta wéetele', bíin talaco'ob u káat chi'ito'ob ti' teech ba'ax ta wa'alaj ti' teen, ba'ax xan tin wa'alaj ti' teech, bíin ya'alo'ob ti' teech ma' bíin u quíimsecho'obi' wa ca láaj a'alic ba'ax t a'alaj.

²⁶Ba'ale' teche' unaj a wa'alic chéen táan a káat óoltic ti' teen ma' in cha'ic a bisa'al tu ca'a teen tu yotoch Jonatán tu yo'olal ma' a quíimil te'elo'.

²⁷Bey úuchico', tuláacal le nucuch meyajo'obo' j bino'ob u yilo'ob Jeremías, ca tu beetajo'ob ya'ab káat chi'ob ti', ba'ale' leti'e' tu núucaj je'el bix a'ala'abic ti' tumen ajawe'. Bey j p'áatic yéetel jéedzel, tumen mix máac tu yu'ubaj le tzicbalo'.

²⁸Jeremías túune' j p'áat tu táancabil canan, tac tu kiinil ca j ch'a'ab Jerusalén.