Read Yucateco Jeremías 39 Bible Online

Jeremías 39 - Yucateco bible

Jeremías 39

¹Ti' u diez winalil u nueve ja'abil u ajawil Sedequías Judaile', Nabucodonosor u ajawil Babiloniae', j bin yéetel tuláacal u aj ba'atelo'ob tu caajil Jerusalene' ca tu bakpachtaj.

²Ti' u nueve kiinil u can p'éel winalil u once ja'abil u méektáan Sedequíase', le aj ba'atelo'ob u aj p'eeco'obe' j ooco'ob te j caajo',

³tuláacal u aj dzíibo'ob u ajawil Babiloniae', j ooco'ob ca je'elo'ob te j noj joolo'. U kaaba'ob ca'ache' Nergal-sarezer, Samgarnebo', Sarsequim, u noj aj meyaj u jalach naj, bey xan u láak Nergal-sarezer, láili' aj noj aj meyaje'.

⁴Ca tu yilaj ajaw Sedequías yéetel u aj ba'atelo'ob ba'ax cu yúuchule', ca j púudzo'ob. Jóoko'ob yéetel áakab tu bejil u jalach x péet pachil pakalo'ob ti' jun p'éel jool naj yaan chúumuc ti' le ca'a p'éel tuulumo', ca tu ch'a'ajo'ob u beelil u táax kóom lu'umil Jordán.

⁵Ba'ale' u aj ba'atelo'ob le j caldeobo' tu ch'a'apachto'ob, ca tu chucpachtajo'ob Sedequías tu táax kóom lu'umil Jericó. J ma'ache' ca j bisa'ab tu táan ajaw Nabucodonosor ti' yaan ca'ach Ribla, tu lu'umil Hamate'. Te'elo' Nabucodonosore' tu xot kintaj: tu táan Sedequíase' tu beetaj u xo'otol u caal u paalal, bey xan tuláacal u ayikalilo'ob Judá.

⁷Wa tu yo'olal Sedequíase' tu beetaj u jóokesa'al u yich, j ka'ax ma'alobe' ca j bisa'ab Babilonia.

⁸Le caldeobo' tu tóocajo'ob jalach naj bey xan u najilo'ob le caajo', tu jenajo'ob xan u tuulumilo'ob Jerusalén.

⁹U dzo'oque' Nabuzaradán, u náacomil u aj canano'ob jalach naje', tu bisaj kala'ano'ob tac Babilonia u cajnáalilo'ob Jerusalén p'áatalo'ob ca'ache' bey xan le dzo'oquili' u máano'ob tu tzéel le j caldeobo'; tuláacal láaj bisa'abo'ob.

¹⁰Chéen tu p'ataj tu lu'umil Jerusalén le jach óotzililo'ob, ti' le kiino' tu dzaj lu'um ti'ob u ti'al u pakalo'ob.

¹¹Nabucodonosor u ajawil Babiloniae' tu ya'alaj ti' Nabuzaradán u náacom le aj canano'ob tu yo'olal Jeremías:

¹²Ch'a'a ta wicnal u ti'al ca a canante, ma' beetic loob ti', dzáa tuláacal ba'ax ca u káat ti' teech.

¹³Nabuzaradán túune' pa'ate' yéetel Nabuzaradán yéetel Nergal-sarezer, ca'a túul u noj aj meyajo'ob jalach naj yéetel tuláacal u láak u aj dzíibo'ob ajaw Babilonia,

¹⁴tu ya'alajo'ob ca jóokesa'ac Jeremías tu'ux kala'ane', ca tu dzajo'ob ti' Jedalías u paal Ahicam u yáabil Safán ca cananta'ac, ca j bisa'ab tu yotoch. Bey úuchic u p'áatal Jeremías cajtal ichil u yéet caajalo'ob.

¹⁵Xuulul kala'anil Jeremías tu táancabil u cúuchil le j canano'obo', Yuumtzile' tu t'anaj ca tu ya'alaj ti':

¹⁶Xeen a wa'al ti' Ebed-melec, le j etiopeo': Yuumtzil u yuumil tuláacal páajtalil, u Kuen Israel, cu ya'alic: Bin in ca'aj in beet le ba'ax tin ka'aytaj tu yo'olal le caaja', u ti'al u loobil, ma' u ti'al utzili'. Le quéen úuch le ba'ala' teche', bíin ti'anaquechi'.

¹⁷Ba'ale' teen bíin in canantech u ti'al ma' a lúubul tu kab le máaco ob máax ti' a ch'a'amaj sajaquilo'. Téen Yuumtzil teen a'alic.

¹⁸Ma' bíin in cha'a a quíimsa'ali'. Teche' bíin a jech le quíimilo' tumen ta wocsaj a wóol ti' teen. Téen Yuumtzil, teen a'alic.