Read Yucateco Jeremías 4 Bible Online

Jeremías 4 - Yucateco bible

Jeremías 4

¹Yuumtzile' cu ya'alic: Israel wa kat j suute', ti' teen u najmal a suut. Wa ca náachcuntic ti' teech le p'ecbe'en kuobo' ma' xan ta tzelicabáa ti' tene',

²je'el túun u páajtal a jalach t'aan tin kaaba'e' yéetel jaaj, ti'ibil bej, bey yéetel tojil. In kaaba' bíin u ti'alt le caajo'ob, u ti'al u qui'iqui' t'anta'al yéetel kaayo'ob.

³Yuumtzile' cu ya'alic ti' u cajnáalilo'ob Judá Yéetel u cajnáalilo'ob Jerusalén: Ca u meyajto'ob lu'umo'ob ma' paka'ano'obi'; ma' u pakalo'ob ich ki'ix.

⁴U cajnáalilo'ob Judá yéetel u cajnáalilo'ob Jerusalén, súuy kuptaba'ex, kamene'ex bey a Yuumtzile'exe', dza'ex ta pucsi'ikale'ex u chíiculal le nup t'aano. ma' a beete'ex ba'al kaas, ma' xan ca t'a'abac in p'u'ujul bey jun p'éel káak cu tóoch'bale', mix máac bíin páatac u tupic;

⁵Ka'ayte'ex le t'aana', tu caajil Jerusalén yéetel tu caajil Judá, ka'ayte'ex yéetel jóopsaj paax ti' tuláacal le lu'umo', awte'ex jach ka'am: ¡Séeba'an, much'aba'ex! ¡Ti' le caajo'ob yaan u tuulumilo'obo'!

⁶Líikse'ex le lacam tu tojil Siono'; ¡caxte'ex tu'ux a ta'acbesicaba'ex, ma' a xáantale'ex! Tumen j xaman bíin in taas núumsaj yaj yéetel xu'ulsaj.

⁷Leóno' dzo'oc u jóokol tu saajcab, máax xu'ulsic le múuch' caajo'obo' dzo'oc u jóokol; dzo'oc u p'atic u lu'umil, táan u taal u xu'uls a caajal, u ti'al u p'at x tocoyil, yéetel x lab caajil a caajalo'ob,

⁸Le t o'olale' búuquinte'ex to'otoch nook, okolnene'ex, áacamnene'ex yéetel yaj óolal tumen u p'uja'anil Yuumtzile' ma' náachac ti' to'oni'.

⁹Yuumtzile' cu ya'alic: Le quéen kuchuc le kiino', ajaw yéetel u nuuquilo'obe', tu yo'olal u sajaquile' bíin quiquilnaco'ob, aj kiino'obe' bíin táaj sajacchajco'ob le aj bóobato'ob xane' yaan u ja'akal yóolo'ob.

¹⁰Tene' wa'alaj: ¡Yuumtzil, dzo'oc a sen tusic u cajnáalilo'ob Jerusalén! Ta séeb chi'itaj u yantal jéedzel ti'ob, ba'ax yaan ti'obe' jun p'éel xotob tu caalo'ob.

¹¹Le quéen kuchuc le kiino', yaan u ya'ala'al ti' u caajil Jerusalén: Jun p'éel u choco iik x tocoy lu'um cu jóopsaj tu tojil in caajal. Ma' leti'e' j xamanca'an iik cu meyaj u ti'al u saltic u sóol le trigoo;

¹²le iik bíin in beet u taalo' asab ka'am ti' le je'elo', tumen bejela'e' in ca'aj in wa'al ba'ax xot kiin bíin talac yóokolo'ob.

¹³Ile'ex le aj p'eeco', séeba'an u taal, bey u taal múuyale', u bolanilo'ob ba'atele', bey u taal chac ikale', u tziimino'obe' jach asab péeca'ano'ob ti' j cooso'ob. ¡Yaj yanilo'on, mina'an tu'ux c jechic le quíimilo'!

¹⁴U cajnáalil Jerusalén, lukes u kasa'anil a pucsi'ikal, beyo' bíin yanac ti' teech tocsajil. ¿Tac ba'ax kiin a lukesic le xa'aka'an tuucul ta poolo'? le talam kaakas tuuculo'obo'

¹⁵Líikbal Dan yéetel u múulilo'ob Efraín cu taal le loolob péectzilo'obo':

¹⁶A'ale'ex ti' le caajo'ob yéetel ti' Jerusalén ti' jun p'éel náachil lu'ume' cu taalo'ob aj p'eeco'ob táan u yaawtico'ob u ba'ateltico'ob u caajilo'ob Judá.

¹⁷Bíin u bakpachto'ob Judá, bey máaxo'ob cu canantico'ob coole', tumen ma' tu yu'ubajo'ob u t'aan Yuumtzil. Teen Yuumtzil, teen a'alic.

¹⁸A cuxtal yéetel ba'axo'ob ta beetaje' leti' beet u yúuchul ti' teech le ba'alo'obo'; a keban káajcunt u yich ba'ax ta pakajo' leti' xan beetic u yajtal a pucsi'ikal.

¹⁹¡Quin ch'o'och'otquinbáa tu yo'olal in mukyaj! ¡In pucsi'ikale' seten ka'am u titip'anquil! ¡Péeca'an in wóol, ma' tu páajtal in maquic in chi'! Dzo'oc in wu'uyic le jóopsaj paaxo', yéetel u yawatil ba'atel.

²⁰U péectzilo'ob xu'ulsaj cu kuchul: tuláacal le caajo'obo' dzo'oc u xiixcunta'alo'ob. Chéen ca j ila'abe' dzo'oc u láaj pa'abal in x péet caajal, dzo'oc u láaj xe'exe'eta'al in nookil in najo'ob.

²¹¿Ba'ax kiin wal bíin in wil ca'anal in lacame' yéetel in wu'uyic u jóopsa'al le paaxo'?

²²In caajale' jach j ma' na'at, ma' u kaj óoleni' bey u ya'alic Yuumtzil. Paalalo'ob ma' tu tuuculo'ob, ma' tu máansico'ob tuuculo'ob. Seten yaan u na'ato'ob u ti'al u beetico'ob kaas, ba'ale' ma' u yojelo'ob u beeto'ob utzi'.

²³Tin pactaj le lu'uma', chéen jun p'éel x tocoy lu'um ma' nu'uca'an ca'achi' tin pactaj le ca'ano', mina'an ca'ach u sáasilil.

²⁴Tin pactaj le káaxo'obo', táan u quiquilanquilo'ob ca'achi, tuláacal le jo'ol lu'umo'obo' cu péeco'ob ca'achi.

²⁵Tin pactaje' ca tin wilaj mina'an mix jun túul xiib, le ch'íich'o'obo' tuláacal dzo'oc u láaj púudzlo'ob.

²⁶Tin pactaje' ca tin wilaj u x pachil pakal nicte'ob, chéen x tocoy lu'um p'áatic, tuláacal le caajo'obo' xiixcunta'ano'ob ca'achi. U sen p'uja'anil Yuumtzil láaj beete'.

²⁷Yuumtzile' cu ya'alic: Tuláacal le lu'uma' bíin kascunta'ac, ba'ale' ma' bíin in láaj xu'ulsi'.

²⁸Le lu'uma' yaan u chu'upul yéetel okom óolal le ca'ano' yaan u búuquintic box nook. Dzo'oc in wa'alic, tu yo'olale' yaan u béeychajal; dzo'oc in wa'alic, ma' bíin sutkajac in tuuculi'.

²⁹Tu yo'olal u yawat le j nat' tzíimino'obo', yéetel le j ch'iin julubo'obo', tuláacal máaco'ob cu jóokolo'ob áalcabil; cu ta'acbescuba'ob ichil le pocche'ob wa cu na'acalo'ob ti' le chaway tuunicho'obo'. Tuláacal le caajo'obo' cu xúump'atta'alo'ob; mix máac cajacbali'.

³⁰Teech x la' caaj, ¿ba'ax yo'olal ca búuquintic chac nook? ¿ba'ax yo'olal ca léechcaltic ya'abca'ach oro? ¿ba'axten ca bonic a wich yéetel ba'al boox? Mix ba'al u biilal ca qui'ichpamcuntabáa, tumen a j kecho'obe' dzo'oc u xúump'attiquecho'ob táan u caxtico'ob u quíimsiquecho'ob.

³¹Táan in wu'uyic u yawatil mukyaj, bey jun túul co'olel cu si'ijsic u yáax paale' lela' u yawat Sión, táan u jajak iik, cu tich'ic u kab táan u ya'alic: ¡Yaj in wanil! ¡Bin in ca'aj quíimsbil tumen le j quíimsaj wíinico'obo'!