Read Yucateco Jeremías 40 Bible Online

Jeremías 40 - Yucateco bible

Jeremías 40

¹Yuumtzile' tu t'anaj Jeremías, cu dzo'ocol u jáalkabta'al Ramá, tumen Nabuzaradán u náacom u canantajil le jalach najo'. Nabuzaradán tu nactáantaj Jeremías kala'an bey xan kaxa'an ca'ach ichil u cajnáalilo'ob Jerusalén yéetel Judá le táan ca'ach u bisa'alo'ob Babilonia.

²U náacom le aj canano'obo' tu bisaj Jeremías táanxel ca tu ya'alaj ti': Yuumtzil a Kue' tu ya'alaj yaan u túuxtic yaj óolal te j lu'uma',

³bejela'e' dzo'oc u béeychajal ba'ax tu ya'alaj. Lala' j úuche' tumen te'exe' kebanchaje'ex tu táan Yuumtzil tumen ma' ta wu'uyaje'ex u t'aani'.

⁴U'uyej, ti' le súutuca' quin wach'iquech ti' a kaxa'anilo'ob. Wa a káat j taal tin wéetel Babiloniae', ca taal; teen bíin in canantech. Wa ma' a káat j taale', p'áaten. Teech ca bin a beet ba'ax a káat yéetel tuláacal le lu'uma': xeen je'el tu'uxac a káate'.

⁵Wa a káat j suute', suunen tu yicnal Gedalías u paal Ahicam u yáabil Safán, u ajawil Babilonia, leti' máax j dzaab u méektáan u caajilo'ob Judá, p'áaten cajtal yéetel, bey xan yéetel a caajal. Xeen je'el tu'ux utz a wilique'. Cu dzo'ocole' le náacomo' tu dzaj ti' Jeremías jun p'éel siibal yéetel janal, ca tu p'ataj.

⁶Jeremíase' j bin yéetel Jedalías tac Mizpa, ca j p'áat cuxtali' pa'ate' yéetel le máaco'ob j p'áato'ob ca'ach te j lu'umo'.

⁷Le náacomo'ob yéetel u aj ba'atelo'ob le judíob yano'ob ca'ach te j káaxo', tu yojéeltajo'ob dzo'oc u dza'abal Gedalías u paal Ahicam tumen u ajaw Babilonia u ti'al u méektáant le lu'umo', tu dzaj xan u ti'al u canant le máaco'ob, co'olelo'ob yéetel paalal ti' le jach óotzilo'ob ma' j bisa'abo'ob Babiloniao',

⁸j bino'ob tac Mizpa u yilo'ob Gedalías. Ichilo'obe' ti' yaan ca'ach: Ismael u paal Netanías; Johanán yéetel Jonatán u paalal Carea; Seraías u paal Tanhumet; u paalal Efai le j Netofao'; yéetel Jezanías, u paal jun túul j xiib Maacat, yéetel u máaquilo'ob.

⁹Gedalíase' tu jajcuntaj yéetel jalach t'aan: Ma' a ch'a'ique'ex sajaquil a wantale'ex tu kabo'ob le j caldeobo'. P'áatene'ex cajtal te j lu'uma', beete'ex ba'ax cu ya'alic u ajawil Babilonia, ca xi'ic te'ex utzil.

¹⁰Teen quin p'áatal Mizpa u ti'al in kamic le j caldeob le quéen talaco'ob waye'. Te'exe' dzáa a wóolte'ex a ta'acbese'ex vino, u yich le pakalo'obo', yéetel aceite, beyo' je'el u páajtal a p'áatale'ex ti' le caajo'ob ta ch'a'aje'exo'.

¹¹Bey xan le judíob yano'ob ca'ach Moab, Amón, Edom yéetel ti' u láak múuch' caajo'obe' tu yojéeltajo'ob xan u ajawil Babilonia tu p'ataj dze'edzec judíob tu lu'umo'ob, tu dzaj xan Gedalías u ti'al u méektáanto'ob.

¹²Ca túun j suunajo'ob Judá, ca tu p'atajo'ob le lu'um tu'ux ki'itpajo'ob ca'acho', ca j bino'ob u yilo'ob Gedalías Mizpa. Bey xan leti'ob tu ta'acbesajo'ob vino, yéetel ya'ab u yich pakalo'ob.

¹³Johanán, u paal Carea, yéetel tuláacal u nuuctaquil le náacomo'ob j p'áato'ob ca'ach te j káaxo' j bino'ob u yilo'ob Gedalías,

¹⁴ca tu ya'alajo'ob ti': ¿Ma' wa a wojel ajaw Baalis le j Amonile' tu túuxtaj Ismael, u paal Netanías, u ti'al u quíimsech? Ba'ale' Gedalíase' ma' tu yocsaj óolti'.

¹⁵Johanán túune' tu mucul a'alaj ti' Gedalías: P'at in bin in quíims Ismael. Mix máac yaan u ojéeltic máax beete. ¿Ba'ax ten c bin p'at u quíimsiquech? Lelo' je'el u beetic u ki'itpajal le judíob dzo'oc a much'quintic ta bakpacho', lelo' u xu'uls ba'ax p'áatal ti' Judá.

¹⁶Ba'ale' Gedalíase' tu núucaj: ¡Ma' ma' a beetic! Ba'ax ca wa'alic tu yo'olal Ismaele' ma' jaaji'.