Read Yucateco Jeremías 41 Bible Online

Jeremías 41 - Yucateco bible

Jeremías 41

¹Tu siete winalile', Ismael u paal Netanías yéetel u yáabil Elisama, jun túul ti' u ch'i'ibal ajawe', j bin Mizpa u ti'al tzicbal yéetel Gedalías. J bin láakinta'an tumen diez xiibo'ob. Te Mizpa túuno', ca'aliquil táan u janalo'obe',

²Ismael yéetel le diez xiibo'ob láakintico', téec líiko'ob ca tu quíimsajo'ob Gedalías yéetel máascab ca'a mat u yej, le máax j dzaab ca'ach tumen u ajawil Babilonia u ti'al u méektáant Judá.

³Ismaele' tu quíimsaj xan tuláacal le j judíob yéetel le aj ba'atelo'ob caldeob yano'ob ca'ach yéetel Gedalías tu caajil Mizpao'.

⁴Tu láak kiin úuchic quíimsa'al Gadaliase', ma'ili' ojéelta'ac ba'ax dzo'oc u yúuchule',

⁵j kucho'ob ochenta máaco'ob ti' u taalbalo'ob Silo yéetel Samaria, u dzicmaj u me'exo'ob, u jatmaj u nooko'ob yéetel xo'oxotmajo'ob u wíinclilo'ob. Táan u taasico'ob ca'ach janalbe'en neeko'ob, yéetel poom u ti'al u kubo'ob ti' Yuumtzil tu kulnaj.

⁶Ismael túune' jóok Mizpa u ch'a'a u beelo'ob, táan u yokol te j bejo'. P'elac tu nactáanto'obe' tu ya'alaj ti'ob: Co'otene'ex a wile'ex Gedalías, u paal Ahicam.

⁷Ba'ale', tu séeblaquil kuchico'ob tu chúumuc le caajo', Ismael yéetel máaxo'ob láakintique' tu quíimsajo'ob ca tu pula'antajo'ob ichil jun p'éel chultun.

⁸Diez ti' le máaco'obo' tu ya'alajo'ob ti' Ismael: Ma', ma' a quíimsico'on tumen yaan ti' to'on trigo, cebada, aceite' yéetel caab ta'acbesmaj j káax. Ismael túune' ma' tu quíimsaj le máaco'obo'.

⁹Le chultun tu'ux tu pula'antaj Ismael u quimen wíinclil tuláacal le máaco'ob tu quíimsajo', leti' le cháaltun tu túuxtaj beetbil Ajaw Asa, le táan ca'ach u jechic ma' u quíimsa'al tumen Baasa u ajawil Israel. Jun p'éel ca'ach nojoch chultun, ba'ale' j chu'up yéetel u quimen wíiniquil le máaco'ob tu quíimsa'abo'ob tumen Ismaelo'.

¹⁰Ismael xane' tu kalaj u x ch'upul paalal ajaw yéetel tuláacal le máaco'ob j p'áato'ob Mizpae', máaxo'ob j dzaabo'ob yáanal u méektáan Gedalías tumen Nabuzaradán, u náacom u aj canano'ob jalach naj. Ismaele' tu kalajo'ob, ca tu dzajubáa j xíimbal, yéetel u tuuculil u máan tu lu'umil Amón.

¹¹Johanán u paal Carea yéetel u nuuquilo'ob le aj ba'atelo'ob yano'ob yéetele', tu yojéeltajo'ob le loob dzo'oc ca'ach u beetic Ismaele',

¹²tu much'quintajo'ob tuláacal u yéet j xiibilo'obe' ca j bino'ob u ba'atelto'ob. Tu nactáantajo'ob tu tzéel le nojoch xel pak, yaan Gabaono'.

¹³Le máaxo'ob táan ca'ach u bisa'alo'ob kala'ano'ob tumen Ismaele', ca tu yilajo'ob Johanán láakinta'an tumen tuláacal u nuuquil u aj ba'atelo'obe', qui'imacchaj u yóolo'ob,

¹⁴ca j suunajo'ob u ti'al u nup'uba'ob yéetel Johanán.

¹⁵Ba'ale' Ismael yéetel ocho u yéet j xiibilo'obe', púudzo'ob ti' Johanán ca j bino'ob tu lu'umil Amón.

¹⁶Johanán yéetel u nuuquilo'ob le aj ba'atelo'ob láakintico', tu ch'a'ajo'ob le aj ba'atelo'obo', le co'olelo'obo', paalal yéetel le nucuch aj meyajo'ob j ma'acho'ob Mizpae', cu dzo'ocol ca'ach u quíimsico'ob Gedalíase', máaxo'ob ca'a su'uto'ob ca'ach líikbal Gabaón tumen Johanán.

¹⁷Bey tu dzajilacuba'ob xíimbal tac ca j kucho'ob Gert-quimam, naadz ti' Belén, tu'ux je'elo'ob. Ti' u yóolo'ob ca'ach u bino'ob tac Egipto

¹⁸u ti'al u púudzulo'ob ti' le j caldeobo', tumen sajaco'ob ca'ach ti'ob tu tumen Ismaele' tu quíimsaj Gedalías, máax túuxta'ab ca'ach tumen u ajawil Babilonia u ti'al u dzáic ca'ach u méektáant le múuch' caajo'obo'.