Read Yucateco Jeremías 42 Bible Online

Jeremías 42 - Yucateco bible

Jeremías 42

¹Tuláacal u nuuquilo'ob aj ba'atelo'ob, tac Johanán, u paal Carea, yéetel Azarías, u paal Osaías, yéetel tuláacal le cajnáalo'obo', u paalilo'ob yéetel u nuuquilo'obe' tu nadzajuba'ob

²ti' aj bóobat Jeremías ca tu ya'alajo'ob: Binel ca'ajo'on j káat ti' teech jun p'éel ba'al; ma' a wa'alic ti' to'on ma'il: Káat óolnen ti' Yuumtzil a Ku t o'olal, máaxo'on chéen jun p'íit p'aatalo'ona'. Ca'ache' ya'abo'on, je'el bix a wilica' chéen jun p'íito'on.

³Káat óolnen ti' Yuumtzil a Ku ca u ca'anbes ti' to'on bix u najmal j cuxtal, yéetel ba'ax u najmal c beetic.

⁴Jeremíase' tu núucaj: Ma'alob, bin in ca'aj káat óolal ti' Yuumtzil a Kuex ta wo'olale'ex, je'el bix dzo'oc a káatique'exo', bíin xan in dzáa a wojéelte'ex tuláacal ba'ax cu bin u ya'al ti' teen, mix ba'al bíin in muculte.

⁵Ca túun tu ya'alajo'ob ti' Jeremías: Ca u yóolt Yuumtzil a Ku ca u beetubáa u aj jaajcunajil jaaj yéetel chuca'an óolal, ca u jadzo'on wa ma' t beetic le ba'ax bíin u ya'al ti' teech ca a wa'al ti' to'ono'.

⁶Utz t t'aan, wa ca u beet c kuuxil, ba'ax cu ya'alic Yuumtzil c Ku, ti' máax t a'alaj ti' teech ca payalchi'inaquech, tu yo'olal beyo' ca xi'ic ti' to'on utzil.

⁷Diez kiino'ob máanac, ca j t'a'an Jeremías tumen Yuumtzil,

⁸leti'e' tu t'anaj Johanán u paal Carea, yéetel u nuuquil aj ba'atelo'ob máaxo'ob láakintic ca'ach yéetel tuláacal le caajo', líikbal u paalil tac nuxibil,

⁹ca tu ya'alaj ti'ob: Yuumtzil u Ku Israel, ti' le máax ta wa'alaje'ex ca payalchi'inaquen cu ya'alic:

¹⁰Wa a xot'maj a wóole'ex j p'áatal te j lu'uma', teen bíin in beetic a ayikaltale'ex, ma' bíin in xu'ulse'exi', ba'ale' bíin in beet a jéedzele'ex, mix bikin bíin in joque'ex, tumen yaj tin wóol tin túuxtilac le noj yajila'.

¹¹Ma' a ch'a'iquex sajaquil ti' u ajawil Babilonia, ti' máax sen sajaque'ex. Tumen tene' ti' yanen ta wéetele'ex u ti'al in toque'ex yéetel in jáalkabte'ex ti' u páajtalil. Teen Yuumtzil teen a'alic.

¹²Bíin in ch'a'a te'ex óotzilil, yaan xan in beetic ca u cha'a te'ex óotzilil, ca u p'at ca suunaque'ex ta lu'ume'ex.

¹³Ba'ale' wa te'ex ma' a káate'ex j p'áatal te j lu'uma', ba'ale' ca j ma' u'uyaj t'antique'ex Yuumtzil a Kuex

¹⁴ca wa'alique'ex: Asab utz t óol ca xi'ico'on cajtal Egipto, tu'ux ma' táan c ilic ba'atelil, mix bíin c u'uy u juum jóopsaj paaxi', mix bíin quíimico'on yéetel wi'iji',

¹⁵te'exe', le máaxe'ex p'aatale'ex Judá, u'uye'ex túun ba'ax cu ya'alic Yuumtzil, u Yuumil tuláacal páajtalil, u Ku Israel: Wa te'ex ca pechicaba'ex j bin cajtal Egiptoe',

¹⁶le ba'atel yéetel le wi'ijil ca sen sajactale'exo', bíin u chuque'ex, ti'ili' bíin quíimique'exi'.

¹⁷Tuláacal le cu dzíiboltic j bin cajtal Egiptoe', ti' bíin quíimico'obi', ich ba'atel, wi'ijil wa ti' báan quíimil. Mix máac bíin p'áatac cuxa'ani'; mix máac bíin jechic le noj yajil bíin in túuxto'.

¹⁸Yuumtzil u yuumil tuláacal páajtalil, u Ku Israel cu ya'alic: Je'el bix sen p'u'ujic in kuuxil yéetel in nojoch dzíiquil tu yo'olal u cajnáalilo'ob Jerusalene', bey bíin sen p'u'ujuc ta wóokole'ex, wa ca bine'ex Egipto. Bíin suunaque'ex u ca'anbesajil loolob t'aan, ti' ba'ax bíin dzáa sajbe'entzil, ma' bíin suunaque'ex a wile'ex le cúuchila'.

¹⁹Ti' te'ex máaxe'ex p'aatale'ex Judá, Yuumtzil a'alic ti' te'ex ma' a bine'ex Egipto. U'uye'ex ma'alob, teen dzáic a wojéelte'ex bejela'e'.

²⁰Te'exe' táan a beetique'ex jun p'éel nojoch loob, tumen ta chi'ile'ex ta kubentaje'ex ti' teen ca káat óolnaquen ti' Yuumtzil a Kuex: Ta wa'alaje'ex: Káat óolnaquech ti' Yuumtzil c Ku, cu dzo'ocole' ca a dzáa c ojéelt ba'ax u káat ca j beete', u ti'al ca c dzo'ocbese'.

²¹Tene' dzo'oc in dzáic a wojéelte'ex ba'ax tu ya'alaj ti' teen Yuumtzil, ba'ale' ma' a káat a wu'uyexi'.

²²Le t o'olale', ojéelte'ex ma'alob tu yo'olal ba'atel, le wi'ijil yéetel le báan quíimilo', te'exe' bíin quíimique'ex te j lu'um tu'ux taac a bine'ex cajtalo'.