Read Yucateco Jeremías 43 Bible Online

Jeremías 43 - Yucateco bible

Jeremías 43

¹Le ca dzo'oc u ya'alic Jeremías ti' le caaj, tuláacal ba'ax tu kuben t'antaj Yuumtzil u Kuob, ca a'ala'ac ti'obe',

²Azarías u paal Osaías, Johanán u paal Carea, yéetel u láak j ca'anal óol wíinico'obe', tu ya'alajo'ob ti' Jeremías: ¡Le ba'ax ca wa'alico' chéen tuus! Yuumtzil c Kue' ma' tu ya'alaj ti' teech ca wa'al ti' to'on ma' unaj c bin cajtal Egiptoi.

³Baruc u paal Nerías tu líiksaj óoltech j t'aan beyo', tu yo'olal u beetic c lúubul tu kab le j caldeobo' u ti'al u quíimsico'on wa u bisico'on cajtal Babilonia.

⁴Bey túuno', mix Johanán mix u náacomilo'ob le aj ba'atelo'ob, mix le máaco'ob j p'áato'ob tu lu'umil Judá, tu dzo'ocbesajo'ob u t'aan Yuumtzil.

⁵Ba'ale', Johanán yéetel tuláacal u náacomilo'ob le aj ba'atelo'obe', tu much'quintajo'ob le dze'edzec máaco'ob j p'áato'ob Judao', tac le máaxo'ob ki'itbesa'abo'ob táanxel lu'ume' suunajo'ob Judá u ti'al j cajtalo'ob tu ca'a téeni':

⁶j xiibo'ob, co'olelo'ob, mejen paalal, u x ch'upul paalal ajaw, yéetel tuláacal le máaxo'ob j p'áato'ob ca'ach tu yáanal u méektáan Gedalías tumen Nabuzaradán, u nojochil aj canano'obo', ichilo'ob xane' j p'áato'ob Jeremías yéetel Baruc.

⁷Ma' tu yu'ubaj t'antajo'ob le ba'axo'ob tu ya'alaj Yuumtzilo', tuláacalo'ob j bino'ob Egipto, ca j kucho'ob tac tu caajil Tafnes.

⁸Tafnese' Yuumtzile' tu t'anaj Jeremías ca tu ya'alaj ti':

⁹Caxt dze'edzec nucuch tuunicho'ob, tu táan u cajnáalilo'ob Judae', muc tu yáanal u but' kat lu'umil le táancabo', actáan tu'ux cu yúuchul oocbal tu jalach najil le caajo'.

¹⁰Ca a wa'al ti'ob: Yuumtzil u yuumil tuláacal páajtalil, u Ku Israele' cu ya'alic: Bin in ca'aj in beet u taal in palitzil Nabucodonosor u ajawil Babilonia, ca in dzáa u jalach káanche' yéetel u jalach chuybil naj tu yóokol le tuunicho'ob dzo'oc in muquic te'ela'.

¹¹Leti'e' bíin taalaque', bíin u xu'uls u lu'umil Egipto. Le máaxo'ob xot kinta'ano'ob u ti'al quíimile', bíin u quíimico'ob, le máaxo'ob u ti'al u bisa'alo'ob j cajtal tu láak lu'ume', bíin u bisa'alo'ob, le máaxo'ob u ti'al j quíimil ichil ba'atele', bíin quíimico'ob ich ba'atel.

¹²Bíin u tóoc u kulnajilo'ob u kuilo'ob Egipto, bíin xan u tóoc u kuob, bíin bisa'aco'ob j kalbil. Bíin u míist u lu'umil Egipto, bey jun túul canan taman cu púustic u yuukil u nooke', cu dzo'ocole' cu bin, tumen mix máac cu páajtal u ya'alic ti' ma' u bin.

¹³Bíin u xiixcunt u jach ca'analil u ocomtuunilo'ob u noj najilo'ob Egipto, yaan xan u láaj tóoquic u kulnajilo'ob u kuilo'ob Egipto.