Read Yucateco Jeremías 44 Bible Online

Jeremías 44 - Yucateco bible

Jeremías 44

¹Péectzil tu kamaj Jeremías u ti'al tuláacal le judíob cajacbalo'ob Egipto, tu caajilo'ob Migdol, Tafnes, Menfis yéetel u múuch' caajilo'ob j noojol:

²Yuumtzil u yuumil tuláacal páajtalil, u Ku Israele' cu ya'alic: Te'exe' dzo'oc a wilique'ex tuláacal le kaas tin beetaj u lúubul yóokol Jerusalén, yéetel ti' u láak u caajilo'ob Judá. Bejela'e' chéen x lab pak mix máac caja'ani'

³tu yo'olal le loobo'ob tu beetajo'obo', tu poch'ajeno'ob tumen tu kultajo'ob jela'an kuob, bey xan tu tóocajo'ob poom ti'ob; kuob mina'an mix ba'al yaan u yilo'ob tu yéetelo'ob, mix ta wéetele'ex, mix yéetel a úuchben ch'i'ibale'ex.

⁴Tin babal túuxtaj le aj bóobato'ob in palitzilo'ob u ti'al u ya'alo'ob ti' te'ex ma' a beetique'ex le ba'alo'ob in seten p'ectmajo'.

⁵Ba'ale' te'exe' ma' ta p'ataje'ex le kaaso', ma' ta wu'uyaje'ex in t'aani' mix ta táan óoltajene'exi'. Láili' bin u bin a kube'ex pom ti' jela'an kuobe'.

⁶Ca túun seten j p'u'ujen, taj nojochaj in dzíiquil, ca j t'a'abo'ob bey jun p'éel káak ichil u caajilo'ob Judá yéetel tu bejilo'ob Jerusalén. Ca j p'áato'ob x lab caajil yéetel chéen x tocoyo'ob tac bejela'e'.

⁷Bey túuno', teen, Yuumtzil u yuumil tuláacal páajtalil, u Kuen Israele', quin wa'alic: ¿Ba'ax o'olal ca taasique'ex ta wóokole'ex le nojoch kaaso'? ¿Ba'ax o'olal ca beetique'ex u quíimil u cajnáalilo'ob Judá, j xiibo'ob, co'olelo'ob, táanquelem paalal yéetel le táantic u síijilo'ob, u ti'al ma' u p'áatal mix máaqui'?

⁸¿Ba'ax o'olal ca pajique'ex in subtal yéetel a cuxtale'ex iquil a kubique'ex poom ti' yaanal kuob way Egipto tu'ux taale'ex cajtala'? Yéetele' ta junale'ex ca xu'ulsicaba'ex, bíin suunaque'ex u ca'anbesajil loolob t'aan yéetel pajsubtalil, ichil tuláacal u caajilo'ob le lu'uma'.

⁹¿Dzo'oc a tu'ubsique'ex le kasa'anilo'ob j beeta'ab tumen a úuchben ch'i'ibale'ex bey xan tumen u ajawil Judá yéetel u yatano'ob, bey xan te'ex yéetel a watane'ex ta beetaje'ex tu lu'umil Judá yéetel tu bejilo'ob Jerusalén?

¹⁰Tac bejela'e' ma' a kexe'ex a cuxtale'exi' mix a wu'uye'ex sajaquili', ma' a beete'ex le ba'axo'ob tin nu'ucbesaj ti' te'ex, mix a dzo'ocbese'ex le a'almaj t'aan tin dzaj ti' te'ex yéetel ti' a úuchben ch'i'ibale'exo'.

¹¹Le t o'olale', teen Yuumtzil u yuumil tuláacal páajtalil u Kuen Israel, quin wa'alic: Dzo'oc in tucultic in taasic kaas ta wóokole'ex yéetel in xu'ulsic tuláacal caajilo'ob Judá.

¹²Le j p'áato'ob Judá tu pechajuba'ob j bin cajtal Egiptoe', láaj xu'ulsa'aco'ob. Tuláacalo'ob líikbal u asab chichanile' tac u nojochil, bíin u quíimsa'aco'ob tumen ba'atelil, yéetel wi'ij, bíin suunaco'ob u ca'anbesajil loolob t'aan yéetel pajsubtal, ti' ba'ax sajbe'entzil.

¹³Bíin in jadz le caja'ano'ob Egiptoo' je'el bix tin jadzajilac Jerusalén, yéetel ba'atel, yéetel wi'ij bey xan yéetel báan quíimil.

¹⁴Mix máac ti' le jun p'íit u yalabil u cajnáalilo'ob Judá, j bino'ob cajtal Egiptoe' bíin p'áatac cuxa'an. Quex ca u yóolto'ob j suut caajaltal judae', ma' bíin suunaco'obi', chéen wa jay túul ichil le j bisa'abo'obo'.

¹⁵Le máaxo'ob túun u yojelo'ob cu ku'ubul ca'ach poom tumen u yatano'ob ti' u yaanal kuob, yéetel le co'olelo'ob yano'ob ca'ach te'elo', tu pa'ate'ilo'obe' cu chuquic jun múuch' chan nonoj, yéetel le j judíob caja'ano'ob tu múuch' caajilo'ob tu noojol Egipto, tu ya'alajo'ob ti' Jeremías:

¹⁶Ma' bíin c u'uyic u péectzil Yuumtzil ca taasic ti' to'ona'.

¹⁷Ba'ale', bíin c beet le ba'ax dzo'oc tucultic beetico'. Ma' bíin ch'éenec tóoquic poom yéetel j kubic u ti'ibil óolalil vino ti' x ajaw u co'olebilil ca'an, je'el bix beetic tac bejela'e', je'el bix xan tu beetilaco'ob c úuchben ch'i'ibalo'ob, yéetel c ajawo'ob bey xan c nuuquilo'ob tu caajilo'ob Judá yéetel tu bejilo'ob Jerusalén. Tumen yaan ca'ach ti' to'on ya'abcach janal, cu bin utzil ti' to'on, cu dzo'ocole' mix jun téen j taal ti' to'on yaj óolal;

¹⁸ba'ale' líikbal p'atilac c kubic poom yéetel ti'ibil óolal ti' x ca'anil ajawe', cu bin to'on kaasil, c éet cajnáalo'obe' cu quíimilo'ob yéetel wi'ij wa ichil ba'atelil.

¹⁹Le co'olelo'obo' tu ya'alajo'ob xan: To'one' c beetic waajo'ob yéetel u yoochel x ca'anil ajaw, kubic xan poom yéetel u ti'ibil óolalil vino, ba'ale' tuláacal t beetaj tumen bey tu yóoltilac c íichamo'ob. Ma' bíin ch'éenec c beetiqui'.

²⁰Jeremías túune' tu núucaj ti' tuláacal le máaco'ob yéetel le x co'olelo'ob t'aanajo'ob beyo':

²¹¿Ca tucultique'exe' Yuumtzile' ma' tu yilic ca'ach, wa dzo'oc xan u tu'ubsic, te'ex a úuchben ch'i'ibale'ex, a ajawe'ex, u nuuquil a caajale'ex yéetel tuláacal le caajo' bix úuchic a kubique'ex poom ti' u yaanal kuob, tu caajilo'ob Judá yéetel tu bejilo'ob Jerusalén?

²²Ba'ale' Yuumtzile' ma' j páatchaj u mukyajtic le kaaso'ob ca beetique'ex ca'acho', ba'alo'ob u che'e p'eec. Tu yo'olal lelo', a múuch' caajale'exe' x tocoy yanilo'ob, mix máac cajacbali', dzo'oc suut u ca'ansajil loolob t'aan, yéetel bey ba'al cu sajbesaje'.

²³Le yaj óolal j taal ta wóokole'exa', j taal tu yo'olal ta kubaje'ex poom ti' u yaanal kuob, kebanchaje'ex ti' Yuumtzil, tu yo'olal ma' ta dzo'ocbesaje'ex u nu'uc t'aano'obi', mix u ya'almaj t'aan, mix ta dzo'ocbese'ex u dzaa t'aano'obi'.

²⁴Jeremíase' tu ya'alaj xan ti' tuláacal le caajo', ba'ale' ti' le x co'olelo'ob tu ya'alaj le t'aana': U'uye'ex u péectzil Yuumtzil, tuláacal cajnáalilo'ob Judá, le cajacbal way Egipto.

²⁵Yuumtzil u yuumil tuláacal páajtalil u Ku Israele', cu ya'alic: X co'olele'ex te'exe' le ba'ax ca wa'alique'ex yéetel a chi'exe', ca beetique'ex yéetel a cuxtale'ex. Ca wa'alique'ex ta séeb chi'itaje'ex a tóoquique'ex poom yéetel a kubique'ex u ti'ibil óolalil vino ti' x ca'anil ajaw, maanaltzail bin a dzo'ocbesique'ex a séeb chi'ex. ¡Ma'alob túun, dzo'ocbese'ex, beete'ex ba'ax ta séeb chi'itaje'ex!

²⁶Ba'ale' te'exe' láaj u'uye'ex, u cajnáalile'ex Judá, máaxe'ex caja'ane'ex Egipto, ba'ax quin wa'alic, teen Yuumtzil: Quin jalach t'antic tu yo'olal u nojchil in kaaba', mix jun túul Judail bíin suunac u t'aan in kaaba' Egipto ca u ya'ale': Tu yo'olal u cuxtal Yuumtzil.

²⁷Tumen tene' bíin ch'úucnaquen u ti'al in túuxt ti' te'ex noj yaj, ma' bíin in túunt utzili'. Tuláacal le judailo'ob cajacbalo'ob Egiptoe' bíin láaj xu'ulsa'aco'ob tumen ba'atelil wa tumen wi'ij.

²⁸Chéen wa jay túul bíin u jech le quíimil ichil ba'atelilo', wa ca jóokoco'ob Egipto u ti'al ca suunac Judá. Beyo' tuláacal le j luko'ob Judá ca j taalo'ob caajaltal Egiptoe', bíin u yilo'ob ba'ax t'aanil bíin béeyac, le u ti'alo'obo' wa le in ti'ala'.

²⁹Teen Yuumtzil, bíin in dzáa ti' te'ex le chíicula', bey u ye'esajil sajac óolal bíin béeychajac, bíin xan in jadze'ex te j lu'uma':

³⁰Téen bíin in kub le faraón Hofra, u ajawil Egipto tu kab u aj p'eeco'ob, je'el bix tin kubajilac Sedequías u ajawil Judá tu kab Nabucodonosor, u ajawil Babilonia u jach p'ec óol.