Read Yucateco Jeremías 46 Bible Online

Jeremías 46 - Yucateco bible

Jeremías 46

¹Yuumtzile' tu t'anaj aj bóobat Jeremías tu yo'olal le múuch' caajo'obo'.

²Lela' u péectzil tu yo'olal Egipto, yéetel jach u ti'al u aj ba'atelo'ob faraón Necao, u ajawil Egipto jelecbal ca'ach Carquemis, tu tzéel u yáalcab ja'il Éufrates, Necaoe' j pa'ab u muuk tumen ajaw Nabucodonosor u ajawil Babilonia, tu can p'éel u ja'abil u méektáan Joacim u paal Josías u ajawil Judá:

³¡Mache'ex a chimale'ex! ¡Xeene'ex a ba'atelte'exo'ob!

⁴¡Kaxe'ex u jéequeb xéec le tzíimino'obo'! ¡Aj nat' tziimine'ex, nat' a tziimine'ex! ¡Dza'ex u dzu'uy p'óoquil a ba'atele'ex, ca a tzolaba'ex! ¡Pudzbanquinse'ex u ni' le julte'obo'! ¡Dza'ex u búuquil ba'atel!

⁵Ba'ale' ¿ba'ax quin wilic? Cuculpaach u bino'ob jaka'an u yóolo'ob. U aj ba'atelo'obe' cu ki'itpajalo'ob pa'aba'an u muuko'ob cu jóokolo'ob áalcabil, ma' tu sutico'ob u paacato'ob paachil. ¡Yaan noj sajaquil tuláacal tu'ux! Teen Yuumtzil, teen a'alic.

⁶¡U asab péeca'anilo'obe' ma' tu páajtal u púudzulo'ob, mix tu páajtal u púudzulo'ob le jach xiibo'obo'! Tu xaman, tu tzéel u yáalcab ja'il Éufratese', cu t'óochpajalo'obe' cu lúubulo'ob.

⁷¿Máax le cu ya'abtal bey u ya'abtal u ja'il Niloe', bey jun p'éel áalcab ja' cu meyaj loobe'?

⁸Egipto, wa le cu ya'abtal bey u ja'il Niloe', bey jun p'éel áalcab ja' cu meyaj loob u ja'ile'. Egiptoe' cu ya'alic: Bin in ca'aj ya'abtal u ti'al in ki'itpajal yóok lu'um, bin in ca'aj in xiixcunt tuláacal le caajo'obo' pa'ate' yéetel u cajnáalilo'ob.

⁹¡Xi'ico'ob táanil le j nat' tzíimino'obo'! ¡Tzaypachta'aco'ob tumen le bolano'obo'! ¡Tzol xíimbalnaco'ob le aj ba'atelo'obo': u aj ba'atelo'ob Etiopía yéetel Libia, u machmajo'ob u chimalo'ob: u aj ba'atelo'ob Lidia, ma'alob u ba'atelo'ob yéetel u p'úunche'ob!

¹⁰Lela' u kiinil Yuumtzil u yuumil tuláacal páajtalil, u kiinil u sutic le kaas j beeta'ab ti' tumen u aj p'eeco'ob. Le ca'amat yej máascabo' bíin u beet ya'ab loob, tac u sen cáaltal yéetel ki'ik. Tumen Yuumtzil u yuumil tuláacal páajtalile' bíin ya'ab quíimsajnac tu lu'umil j xaman naadz ti' Éufrates.

¹¹¡U caajil Egipto, xeen Galaad a caxant dzaac! ¡Ba'ale' quex ca dzáicabáe' mix ba'al u biilal ti' teech, tumen mina'an dzaac a ti'alinte'!

¹²Le múuch' caajo'obo' u yojelo'ob dzo'oc u pa'ajal a subtal, tuláacal yóokolcaab cu yu'uba'al a wawat; cu paaclan jéentáanticuba'ob le aj ba'atelo'obo', pa'ate' u bablicuba'ob j lu'um.

¹³Yuumtzile' tu t'anaj aj bóobat Jeremías le táan ca'ach u bin Nabucodonosor, u ajawil Babilonia u ti'al ca'ach u ba'atelt Egipto:

¹⁴A'ale'ex ti' Egipto, ti' Migdol, ti' Menfis yéetel ti' Tafnes: ¡Dzaa óolte'ex, péecsaba'ex! ¡Le máascab ca'amat u yejo' táan u beetic loob ta bakpach!

¹⁵¿Ba'axten j púudz Apis, a quili'ich wacax? ¿Ba'axten ma' j páatchaj u wa'atali'? tumen téen Yuumtzil, teen j lúubse.

¹⁶A aj ba'atelo'obe' cu t'óochpajlo'ob cu lúubulo'ob xan, tu baatzilo'obe' cu ya'alico'ob: ¡Cone'ex lukul waye', ca suunaco'on t lu'um, te tu'ux síijo'ono'! ¡Cone'ex púudzul ti' le ba'atel cu meyaj looba'!

¹⁷Dza'ex le pat kaaba' ti' faraón u ajawil Egipto: Ya'abcach juum, ba'ale' ma' tu kiinili'.

¹⁸Tene', ajawen in kaaba' xane' Yahveh u yuumil tuláacal páajtalil, quin jalach t'antic tu yo'olal in cuxtal: Je'el bix Tabor, chica'an ca'analil ichil le pu'uco'obo', je'el bix Carmelo, cu líikil ichil le ka'anabo', bey le aj p'eec bíin talaco'.

¹⁹Líisaba'ex u cajnáalile'ex Egipto, u ti'al a bisa'ale'ex táanxel lu'um tumen Menfise' bíin suunac x tocoy caajil, tu x lab pakilo'ob tu'ux mix máac bíin cáajaqui'.

²⁰Egiptoe' chica'an ti' jun túul x qui'ichpam sujuy wacax, ba'ale' cu taal jun túul u áacachil j xaman u ti'al chi'ic.

²¹U bo'olbil aj ba'atelo'obo', beyo'ob mejen poloquil wacaxo'obe', ba'ale' le ti'ob xane' bíin lacchajac u yáalcabo'ob, ma' bíin páatac u wa'atalo'ob j ba'ateli', tumen táan u taal u kiinil le noj yajilo', u kiinil jaadz.

²²Egiptoe' bíin púudzuc bey u xóob jun túul caane' le quéen náadzac le aj ba'atelo'ob u puluba'ob j ch'aac yéetel u báato'ob, óoli' bey táan u ch'aquico'ob nucuch che'obe'.

²³¡Bíin ch'a'acac u jujubquil u káaxo'ob! Teen Yuumtzil, teen a'alic. asab ya'abo'ob ca'ach ti' j sáako'ob, mix máac bíin páatac u xoquic.

²⁴Egiptoe' bíin pa'ajac u subtal, bíin lúubuc xan tu kab u caajil j xaman.

²⁵Yuumtzil u yuumil tuláacal páajtalil, u Ku Israele', cu ya'alic: Bin in ca'aj in jadz Amón u ku Tebas, bey xan Egipto yéetel u kuob yéetel u ajawo'ob, faraón yéetel le máaxo'ob u kubmaj u yóolo'ob ti'.

²⁶Bíin in beet u lúubulo'ob tu kab u jach aj p'eeco'ob, tu kab Nabucodonosor u ajawil Babilonia yéetel u aj ba'atelo'ob. Ba'ale' le quéen máanac dze'edzec kiine', Egiptoe' bíin u ca'a suunac caajcunsbil je'el bix ca'ache'. Teen Yuumtzil, teen a'alic.

²⁷Ma' a ch'a'ic sajaquil, u caajil Jacob, in j palitzil; ma' a ch'a'ic sajaquil Israel. Tumen teech yéetel a paalale' bíin in jáalkato'ob ti' le náanach múuch' caajo'ob tu'ux bisa'abe'exo'. Bíin ca'a cajlaque'ex ich jéedzel, mix máac cu bin ja'asic a wóole'ex.

²⁸Teen Yuumtzil, teen a'alic: Ma' u péec a wóol u caajil Jacob, in palitzil, tumen ti' yanen ta wéetele'. Bíin in xu'uls tuláacal le caajo'ob tu'ux tin ki'itbesajecho', Ba'ale' teche' ma' bíin in xu'ulsechi; chéen bíin in dzáa ti' teech u nu'uc, je'el bix ca najmatique', ma' bíin in p'atech x ma' jaadzili'.