Read Yucateco Jeremías 47 Bible Online

Jeremías 47 - Yucateco bible

Jeremías 47

¹Le ti' le péectzil tu dzaj Yuumtzil ti' aj bóobat Jeremías u ti'al le j filisteobo', ma'ili' kuchuc u kiinil u ba'atelta'al Gaza tumen faraoni':

²Teen Yuumtzil, tene' quin wa'alic: Líikbal j xaman cu taal jun p'éel búulcabal, bey jun p'éel áalcab ja' máan ya'ab u yayalanquil; cu bulic le múuch' caajo'ob yéetel tuláacal ba'axo'ob yani', le caajo'ob yéetel u cajnáalilo'ob. Tuláacal u cajnáalilo'ob le múuch' caajo'obo' cu ka'am awato'ob, le máaco'obo' cu ka'am yaayaj awato'ob.

³Le quéen u yu'ubo'ob u chich áalcab tzíimino'ob, u ka'am juum le bolano'obo', yéetel u juum le petenche'obo', le taatatzilo'obo' cu mina'antal u muuko'obe' cu p'atico'ob u paalal.

⁴Tumen j kuch u kiinil u xu'ulsa'al le j filisteobo', u kiinil u luksa'al ti'ob Tiro yéetel Sidón u luksa'al le jun p'íit áantaj p'aatal ti'obo'. Bey, Yuumtzile' bin u ca'aj u xu'uls le j filisteob, j bino'ob cajtal tu petemil Creta.

⁵U cajnáalilo'ob Gazae' cu koliscunticuba'ob, u cajnáalilo'ob Ascalone' toot u p'áatalo'ob. U yalab le úuchben j wa'apach'o'obe', ¿tac ba'ax kiin bíin xu'uluc a xo'oxotique'ex a bakele'ex u chíiculal ki'inamil?

⁶¡Waay, u táadz máascab Yuumtzil! ¿Ba'ax kiin a je'elel? ¡Suunen tu ca'a teen ta piix, jóoms a wóol, ma' a péec!

⁷¿Ba'ale' bix bíin p'áataquen ma' in péec wa Yuumtzil tu ya'alaj ti', bey, tu kubentaj ti' ca u ba'atelt Ascalón yéetel tuláacal le u jáal ka'anabo'?