Read Yucateco Jeremías 48 Bible Online

Jeremías 48 - Yucateco bible

Jeremías 48

¹U péectzil Yuumtzil u yuumil tuláacal páajtalil, u Ku Israel, u ti'al Moab. ¡Óotzil u caajil Neboe', buca'aj nojoch xiixcunta'anil! ¡Quiriataim j ch'a'abi, ca j pa'aj u subtal! ¡U tuulumile' dzo'oc u je'enel tac lu'um!

²U qui'ichquelmil Moabe' dzo'oc u xu'ulul. Hesbone', le aj p'eeco'obo' táan u jok jo'oltico'ob u ti'al u xu'ulsico'ob Moab, bey u múuch'ul caajo'obe'. Bey xan teech Madmén, bíin xiixcunta'aquech, le ba'atelo' ma' bíin ch'éenec u sajacuntiquechi'.

³Tu caajil Horonaime' cu yu'uba'al u juum awato'ob: ¡Nakan óotzilil yéetel nojoch jay cabal!

⁴Moabe' dzo'oc u x lab paktal; u yawatil ki'inamil cu yu'uba'al tac Soar.

⁵Yéetel u ya'alil u yicho'ob cu náachtalo'ob le máaxo'ob cu na'acalo'ob tu jo'ol lu'umil Luhit; cu yawato'ob tu yo'olal u ki'inamil u náadzal le noj yajilo' le cu yéemelo'ob Horonaim.

⁶¡Púudzene'ex! ¡U tocubáa le máax cu páajtale'! ¡Beetaba'ex bey u cojquéejil le x tocoy lu'umo'!

⁷Moab teche' ta dzaj a walab óol, ti' a muuk yéetel ti' a ayikalil, ba'ale' tac teech bíin ch'a'abaquech. A ku Quemose' bíin bisa'ac x tocoy lu'umil, pa'ate' yéetel u aj kiino'ob, bey xan u nucuch máaquilo'ob.

⁸Le xu'ulsajilo' bíin kuchuc ti' tuláacal le caajo'obo', mix jun p'éel bíin páatac u jechiqui'; le táax kóom lu'um yéetel le táax jo' lu'umo' bíin x lab pakchajac. Teen Yuumtzil, teen a'alic.

⁹Dza'ex jun p'éel dzíibil tuunich ti' Moab tumen bin u ca'aj xu'ulsbil; u caajilo'obe' x tocoy bíin p'áataco'ob mix jun túul u cajnáalil bíin p'áataqui'.

¹⁰(¡Loolob t'anta'ac le máax ma' bíin u beet yéetel qui'imac óolal le meyaj cu bin j dzaabil ti' tumen Yuumtzil! ¡Loolob t'anta'ac le máax ma' tu bíin u yóolt táacpajal ti' quíimsajo'!)

¹¹Moabe' amal jéedzel cuxlajic, mix jun téen ma'achac j bisbil táanxel lu'umil. Bey le vino cu p'a'atal j edztale', ma' tu máansa'al ti' yaanal nu'ucule', le t o'olal ma'atech u sa'atal u qui'il, mix u qui'iboquil.

¹²Ba'ale' Yuumtzile' cu ya'alic: Yaan u kuchul u kiinil in túuxtic máaco'ob u ti'al u láalico'ob le vino ti' u láak nu'uculo'ob, cu dzo'ocole' cu pa'abal le nu'uculo'ob tu'ux luksa'abo'.

¹³Moab túune' bíin u mukyajt úuchic u p'a'atal tumen u ku Quemós, je'el bix tu mukyajtilac Israel u p'a'atal tumen Betel, ti' máax dzaamaj ca'ach u kub u yóolal.

¹⁴Ma' u ya'alic Moab: Jach xiibo'on, aj ba'atelo'on yaan ti' to'on páajtalil.

¹⁵Táan u kuchul le máax cu bin u xu'uls Moab yéetel u caajilo'ob; u ma'alobil u táanquelmilo'obe' bíin quíimico'ob. Cu jajcuntic Ajaw, u kaaba'e' Yahveh u yuumil tuláacal páajtalil.

¹⁶U noj yajil Moabe' táan u náadzal ta'aytac u kuchul.

¹⁷Le cajtalilo'ob yaan tu bakpach Moab, yéetel tuláacal máax kaj óoltmail u nojochile', okolnaco'ob tu yo'olal ca ya'alo'ob: ¡Ile'ex bix xu'ulsa'abic ba'ax u ti'al, quex jach mu'uka'an yéetel jach nojbe'en!

¹⁸Éemen tu cúuchil a tzi'iquil, u caajil Dibón, culen te jach tiquin lu'umo', tumen u xu'ulsajil Moabe' táan u náadzal ta wicnal, naadz xan u taal ta wóokol bíin u jen a tuulumilo'ob.

¹⁹U caajil Aroer, wa'alen tu tzéel bejo' paacatnen; káat péectzilt ti' le máaxo'ob ma' j quíimo'obo', ba'ax úuchi.

²⁰Moabe' paja'an u subtal, chuup yéetel sajaquilil. ¡Okonene'ex yéetel ki'inamil tu yo'olal! ¡Ka'ayte'ex tu yáalcab ja'il Armone', Moabe' dzo'oc u xu'ulsa'al!

²¹Kuch le jadz a'ala'an bíin talac tu yóokol u caajilo'ob le táax lu'umo': Holón, Jahaza, Mefaat,

²²Dibón, Nebo, Bet-diblataim,

²³Quiriataim, Bet-gamul, Bet-meón,

²⁴Queriot, Bosra yéetel tuláacal u caajilo'ob Moab, le naadzo'ob, bey le náachtaco'obo'.

²⁵Yuumtzile' cu ya'alic: Dzo'oc u pa'abal u muuk Moab, yéetel u páajtalile' xu'uli'.

²⁶Cáalcunte'ex Moab, tumen líik yóol ti' Yuumtzil. Moab túune' yaan u bablicubáa ichil u xej, tuláacal bíin p'a'astic.

²⁷Moab ¿ma' wa ca p'a'astic ca'ach Israel yéetel quéen t'aanaquech yo'olale' chéen yéetel pooch'il bey wa jun túul j ocole'?

²⁸Xúump'at a caajale'ex, u cajnáalile'ex Moab; xeene'ex cajtal te j suytuno'obo' bey tzuutzuy cu beetic u ku' tu cáap tuuniche'.

²⁹C kaj óoltmaj u ca'anal ich Moab, u ca'anal óolal, yéetel u nonoj ba'alil.

³⁰Bey xan Yuumtzil u kaj óoltmaj u j ma' subtal, u binqui' t'aan yéetel u sacach t'aan.

³¹Le t o'olal bíin okolnaquen bíin xan in yaj óolte tu yo'olal xan tuláacal u cajnáalilo'ob Moab, bey xan u cajnáalilo'ob Kir-hares.

³²Bíin okolnaquen ta wo'olal u x péet pach u pakal uva Sibma, asab ti' le okol beeta'ab tu yo'olal Jazero'. U ch'úuyulo'ob wicho'obe' cu ch'actic ca'ach le ka'anabo' cu kuchulo'ob ca'ach tac Jazer. Ba'ale' u joochil a uvaobe', dzo'oc u láaj xu'ulsa'al.

³³Ma' tu yu'uba'al u yawatilo'ob qui'imac óolal ichil u x péet pach pakal nicte'ob Moab. Le vinoo' dzo'oc u xu'upul te tu nu'uculo'obo'. Mina'an máax ye'edzic le uvaobo', dzo'oc u xu'ulul u kaayilo'ob qui'imac óolal.

³⁴U cajnáalilo'ob Hesbone' táan u yawato'ob yéetel yaayaj óolal, u ka'am awato'ob xane' cu yu'uba'al tac Eleale' yéetel Jahaza, líikbal Zoar tac Horonaim yéetel Eglat-selisiya, tumen u sayabilo'ob Nimrime' dzo'oc u tijilo'ob.

³⁵Yuumtzile' cu ya'alic: Teen bíin xu'uls u cajnáalilo'ob Moab cu na'acalo'ob tu jo'ol lu'umil, le manba'al kulnajo'ob, u ti'al u kubo'ob quíimsbil ba'alche' yéetel poom ti' u kuob.

³⁶Le t óolale' in pucsi'ikale' cu yáacam tu yo'olal Moab, yéetel tu yo'olal u cajnáalilo'ob Kir-hares, yéetel u juum u nu'uculo'ob u paax quimen, tumen le ayikalilo'ob tu much'quintajo' dzo'oc u sa'atalo'ob.

³⁷Tuláacal poolo'obe' kolista'ano'ob, bey le me'exo'obo', láaj dzica'ano'ob; tuláacalo'ob dzo'oc u kilico'ob u kabo'ob dzo'oc xan u búuquintico'ob x to'och nooko'ob.

³⁸Ti' tuláacal u táancabilo'ob Moab yéetel ti' u bejilo'obe', chéen okol cu yu'uba'alo'obi', tumen tene' tin xe'exe'et'aj Moab bey jun p'éel kat mix ba'al u biilale'. Teen Yuumtzil, teen a'alic.

³⁹¡Moab, áacam okolnene'ex! ¡Buca'aj chuup yanil yéetel sajaquil! ¡Tu sutaj u paach tu yo'olal u sublaquil! Suunaj bey ba'ax sajbe'en yéetel p'ecbe'en, u ti'al u yéet caajalo'ob.

⁴⁰Yuumtzile' cu ya'alic: U aj p'eec Moabe' cu pulicubáa yóokol u et loob ti' bey jun túul j cóot cu juul yéetel u xiike',

⁴¹Caajo'ob yéetel tuulumo'obe' bíin p'áataco'ob tu kab aj p'eeco'ob. Ti' le kiino' u aj ba'atelo'ob Moabe' bíin quiquilnaco'ob bey jun túul co'olel cu síijsaje'.

⁴²Moabe' bíin p'áatac x ma' caajil, tumen tu yóoltaj u ba'atel teen, u ba'atelt Yuumtzil.

⁴³Le t o'olale', teen Yuumtzil, teen a'alic: U cajnáalilo'ob Moabe' bíin béeyaco'ob je'el bix ba'alche' ch'a'apachta'ano'ob tumen j dzoono'ob, wa ti' u chuun yajil u lúubulo'ob ich áactun wa ti' jun p'éel léech.

⁴⁴Máax cu púudzul ti' j dzoono'obe', cu lúubul ich áactun, máax cu jóokol ti' áactune' cu lúubul ich léech, tumen teen bíin in taas tu yóokol Moab u kiinil u ja'adzal. Teen Yuumtzil, teen a'alic.

⁴⁵Yaan dze'edzeque' cu púudzulo'ob x ma' muukil u ti'al u caxto'ob u ta'acbesaj tu bo'oyil Hesbón; ba'ale' Hesbone', u caajil ajaw Sehóne', ichil u tóoch'bal káak yaan, le káako' cu xitbesicubáa tac tu pu'uquilo'ob Moab, le caaj caxan ba'atelo'.

⁴⁶¡Yaj a wanil Moab! ¡U caajil Quemós, sa'atalech! ¡A j xibil paalal yéetel a x ch'upul paalale' cu bisa'alo'ob táanxel lu'umil!

⁴⁷Ba'ale' tu dzo'oque' teen bíin in kex u kinyajil Moab; teen Yuumtzil, teen a'alic. Lela' leti' le xot kiin tu dzaj Yuumtzil ti' Moaba'.