Read Yucateco Jeremías 49 Bible Online

Jeremías 49 - Yucateco bible

Jeremías 49

¹U péectzil Yuumtzil yo'olal Amón: ¿Tu'ux yaan u paalal Israel? ¿Tu'ux yaan u aj kamba'alba'ob? ¿Ba'ax o'olal u kuil Milcome' u yuumil Gad bejela'e'? ¿Ba'ax o'olal le amonitaob cajacbalo'ob tu caajilo'ob?

²Ma'alob, co'ox ilic, teen Yuumtzil, teen a'alic: Yaan u kuchul u kiinil in beetic u yu'uba'al tu caajil amonita Rabá u yawatil ba'atelil; chéen múulo'ob bíin suunaco'ob, u caajilo'obe' bíin tóoca'aco'ob. Israel túune' bíin u ca'a ch'a'a' u caajilo'ob. Teen Yuumtzil, teen a'alic.

³¡Áacamnen Hesbón, tumen Haie' dzo'oc u xiixcunta'al! ¡Áacam okolnene'ex u co'olele'ex Rabá! ¡Búuquinte'ex box nook, lox a tzeeme'ex! ¡Áalcabnene'ex bey choco a poole'exe', kil a wíinclile'ex! tumen ku Milcom táan u bisa'al táanxel lu'um pa'ate' yéetel u aj kiino'ob, bey xan yéetel u nojoch máaquilo'ob.

⁴¿Ba'ax o'olal cu ca'analtal a wich tu yo'olal a muuk? A muuke' táan u xu'ulul, j ma' u'uyaj t'aan caajech, ca alab óoltic le buca'aj taakin a much'quintmajo' ca wa'alic: ¿Máax bíin páatac u ba'ateltiquen?

⁵Ma'alob co'ox ilic, ti' tuláacal tu'ux cu bin in túuxt sajaquil ta wóokol. Teen Yuumtzil, u yuumil tuláacal páajtalil, teen a'alic. Jujun túulil cu bin jóokol a wáalcabe'ex je'el tu'ux ca páatchajaque', ma' bíin yanac mix máac u ca'a much'quinte'exi'.

⁶Ba'ale' tu dzooque' bíin in kex u kinyajil le j amonitaobo'. Teen Yuumtzil, teen a'alic.

⁷U péectzil Yuumtzil u yuumil tuláacal páajtalil, tu yo'olal Edom: ¿Mina'an a wojéelal Temán? ¿Ma' u yojelo'ob ba'ax bíin u beeto'ob le aj na'ato'obo'? ¿Kaschaj wa le na'at yaan ca'ach ti'obo'?

⁸¡U cajnáalile'ex Dedán, jóokoc a wáalcabe'ex, xeene'ex a ta'acbesaba'ex! Tumen bin in ca'aj in xu'uls u caajil Esaú; dzo'oc u kuchul u kiinil in jadzic.

⁹Tu kiinil u yéemsa'al le uvaob, cu p'a'atal dze'edzec u ch'úuyulo'ob tu kab; tu áakabil cu kuchul le j oocolo'obo', chéen cu bisico'ob le ba'ax kabéet ti'obo'.

¹⁰Ba'ale' tene' mix ba'al tin p'ataj ti' u caajil Esaú, tin caxtaj tu'ux cu ta'acbesmajuba'ob, bejela'e' ma' tu páajtal u balicuba'ob. U paalalo'ob, u láaktzilo'ob yéetel u yéet caajilo'ob, dzo'oc u láaj xu'ulsa'alo'ob; ma' j p'at mix máac ca u ya'al:

¹¹P'ate'ex tin kab le j ma' taataobo', teen bíin in cananto'ob. A x quimen íichamo'obe' xoocnaco'ob tin wéetel.

¹²Yuumtzile' cu ya'alic: Wa le máaxo'ob ma' tu najmatico'ob u ja'adzalo'ob, ja'adzo'obe', bix bíin p'áatac ma' a ja'adzal, teech xane' yaan a kamic u jaadzil.

¹³Teen Yuumtzil, teen jalach t'antic tin wo'olal: U caajil Bosrae' x tocoy bíin p'áatac, chéen x lab pak, bíin suunac u ca'ansajil paj subtalil yéetel loolob t'aanil, le u láak caajo'ob xano' bíin p'áataco'ob x lab caajil jun puli'.

¹⁴Dzo'oc u kuchul jun p'éel péectzil tu túuxtaj Yuumtzil ti' teen: Jun túul j bisaj t'aan cu máan ya'al cajal caaj: ¡Much'aba'ex u ti'al ca xi'ique'ex a ba'atelte'ex Edom! ¡líiksaba'ex u ti'al le ba'atelo'!

¹⁵Teen bíin in beetech u asab chichanil le caajo'obo', u asab p'ecbe'enil ichil le wíinco'obo'.

¹⁶Ta cha'aj a tu'usul tu yo'olal a j ca'anal ichil, tumen ca tza'aysic ca'ach x pakil. Cajacbalech tu yáam le nucuch tuunicho'obo', utz ch'iiclilech tu sen ca'analil le witzo'obo'. Ba'ale' quex ca beet a ku' seten ca'anal je'el bix le j cóoto', ti' bíin in beet a wéemeli'. Teen Yuumtzil, teen a'alic.

¹⁷U xu'ulsajil Edome' tu yo'olal u seten nojochile', bíin in beet u yantal jak óolal. Tuláacal máax cu bin j máan te'elo' yaan u ja'akal u yóol le quéen u yil bix le jaadzilo',

¹⁸tumen bíin p'áatac bey Sodoma yéetel Gomorra bey xan le caajo'ob yaan tu bakpach, le ca'aj xu'ulsa'abo'obe'. Mix máac bíin ca suunac cajtali', mix chéen u ti'al je'elel. Teen Yuumtzil, teen a'alic.

¹⁹Bíin téec talaquen, je'el bix jun túul león cu jóokol ichil u pocche'ilo'ob Jordán, cu yáalcab tu'ux yojel yaan túumben janal, ti' bíin in beet u púudzul le j Edomilo'obo', bíin in beetic ca méektáanac le máax bíin in yéeyo'. ¿Máax je'el u queticubáa tin wéetele'? ¿Máax je'el u t'aniquen j ba'atel yéetele'? ¿Máax j canan tamanil ca u yóolt káatal tin beele'?

²⁰U'uye'ex le ba'ax dzo'oc in tucultica', teen Yuumtzil, teen nu'uctmail tu yo'olal Edom, le jok jo'ol in máakantmaj yo'olal u cajnáalilo'ob Temmán: Tac le mejen j tamano'ob yano'ob le jach p'eexo'ob bíin bisa'aco'ob, le chakan tu'ux cu janalo'obo' yaan xan u xu'ulsa'alo'ob.

²¹Le quéen lúubuc Edome bíin ka'am juumnac, tu yo'olal lelo' bíin quíilbanac le lu'uma', bíin awatnac táan u káatic áantaj, u yawate' bíin u'uya'ac tac Chac Ka'anab.

²²Le aj p'eeco' bíin u pulubáa yóokol Bosra bey jun túul j cóot cu juul yéetel u xiike', le quéen kuchuc u kiinile', u aj ba'atelo'ob Edome' bíin quiquilnaco'ob bey jun túul co'olel cu síijsaje'.

²³Péectzil tu yo'olal Damasco: U caajilo'ob Hamat yéetel Arfade' sublaco'ob, tumen dzo'oc u kuchul kaakas péectzil. Cu chu'upulo'ob yéetel noj sajaquil, ma' tu páajtal yantal jéedzel ti'ob.

²⁴Damasco yéetel u x ma' muukile' cu líiksicubáa j púudzul. Cu lúubsa'al u yóol tumen le sajbe'enilo', le yaayaj óolalo' yéetel le ki'inamilo', bey jun túul co'olel cu síijsaje'.

²⁵Le caaj utz kaj óola'anil, le caaj qui'imac u yóolo', dzo'oc u xúump'atta'al.

²⁶Ti' le kiino' u táanquelem paalale' bíin p'áataco'ob jaytal te j bejo'obo', tuláacal u aj ba'atelo'obe' bíin quíimico'ob. Teen Yuumtzil u yuumil tuláacal páajtalil, teen a'alic.

²⁷Bin in ca'aj in tóoc u tuulumilo'ob Damasco, le káako' bíin u láaj xu'uls u jalach najilo'ob Ben-adad.

²⁸U péectzil Yuumtzil u ti'al u ch'i'ibalo'ob Cedar yéetel u ti'al u nuuquilo'ob Hazor, máaxo'ob pa'ab u muuko'ob tumen Nabucodonosor, u ajawil Babilonia: ¡Péecsaba'ex ba'atelte'ex Cedar! ¡Xu'ulse'ex le múuch' j lakinil cajtalilo'obo'!

²⁹Ch'a'ex u chuybil najo'ob yéetel u j tamano'ob, u bo'oy nooko'ob yéetel tuláacal u nu'uculo'ob. Toque'ex u camello'ob, awte'exo'ob: ¡Yaan nojoch sajaquil tuláacal tu'ux!

³⁰¡Jóokoc a wáalcabe'ex u j cajnáalile'ex Hazor! ¡Xeene'ex a ta'acbesaba'ex! Teen Yuumtzil, teen a'alic. Tumen Nabucodonosor, u ajawil Babiloniae' dzo'oc u tucultic u bin beet ti' teech kaas.

³¹Teen Yuumtzil, teen a'alic ti' te'ex: ¡Xeene'ex, ba'atelte'ex le caaj ma' sajac caja'anilo', bey xan yéetel jéedzel, x ma' jool najo'ob u yotoch, mix xan tu kalicuba'ob, jach chéen tu juunal!

³²¡Ocolte'ex u camello'ob yéetel u wacaxo'ob! Bin in ca'aj in ki'itbeso'ob tuláacal tu'ux, le máaco'ob cu dziquico'ob u tzéel u táan jo'olo'ob; tuláacal tu'ux bíin in taas noj yajil. Teen Yuumtzil, teen a'alic.

³³Hazore' bíin p'áatac x tocoy lu'umil jun puli', jun p'éel x tocoy bíin suunac u cajtal u peekilo'ob káax. Mix máac bíin suunac cajtali', mix ca chéen je'elequi'.

³⁴Le ca tu chu'unbesaj Sedequías u beetic u ajawil Judae', Yuumtzile' tu dzaj ti' Jeremías le péectzil u ti'al Elam:

³⁵Teen Yuumtzil u yuumil tuláacal páajtalil, quin wa'alic: Bin in ca'aj in ca'aca'ach u p'úunche'ob Elam, u noj nu'ucul u ba'atel.

³⁶Bin in túuxt súusut iiko'ob tu yóokol le caaja', líikbal tu can ti'it iiko'ob, u ti'al u ki'itbesa'alo'ob tuláacal tu'ux, tac quéen p'áatac mina'an múuch' caajo'ob tu'ux u ta'acbesicuba'ob.

³⁷Bíin in beet u quiquilanquil Elam tu táan u aj p'eeco'ob, bíin in túuxt noj yajo'ob ti', bíin in láal in p'u'ujul tu yóokol, bíin in túuxt ba'atel tac quéen in láaj xu'ulse. Teen Yuumtzil, teen a'alic.

³⁸Bíin in dzáa in jalach káanche' tu lu'umil Elam, bíin xan u beet u quíimil u ajawilo'ob yéetel u nuuquilo'ob. Teen Yuumtzil, teen a'alic.

³⁹Ba'ale' bíin kuchuc u kiinil in kexic u kinyajil u lu'umil Elam. Teen Yuumtzil, teen a'alic.