Read Yucateco Jeremías 5 Bible Online

Jeremías 5 - Yucateco bible

Jeremías 5

¹Yuumtzile' cu ya'alic: Áalcabte'ex u bejilo'ob Jerusalén, pacte'ex ma'alob, caxante'ex tu kíiwiquilo'ob, ca a wile'ex wa yaan máax cu beetic ba'ax tu beel, yéetel tu jaajil u yóol. Wa ca nuptáantique'exe' quin sa'atsic Jerusalén.

²Yaan máaxo'ob cu jalach t'aano'ob tu kaaba' Yuumtzil, ba'ale' ma' tu jaajil u yóolo'obi'.

³Yuumtzil, teche' ba'ax a káate' máaco'ob ma'atech u tuso'ob. Ta jadzajo'ob, ba'ale' ma' j yajchaji' ta wóotzilcuntajo'ob, ba'ale' ma' tu yóoltajo'ob j caanbali'. J dzu'uy poole'ex, asab chichtaco'ob beyo'ob tuuniche', ma' tu yóoltajo'ob j suut te j ma'alob bejo'.

⁴Tin tucultaje': chéen le óotzilo'ob cu paticuba'ob bey j ma' na'ato'obe', tumen ma' u yojelo'ob ba'ax u káat Yuumtzili', ba'ax cu ya'almaj t'antic Ku ti'obi'.

⁵Yaan in nadziquinbáa ti' nucuch máaco'ob ca in wa'al ti'ob. Leti'obe' u najmal u yojéeltico'ob ba'ax u káat Yuumtzil ba'ax xan cu ya'alic Ku. Ba'ale' tuláacalo'ob tu beetajo'ob u j ma' tziiquilo'ob ti' Ku tu ya'alajo'ob ma' bíin u yu'ubaj t'anto'obi'.

⁶Le t o'olal leóno'ob bíin jóokoco'ob te j noj káaxo' bíin quíimsa'aco'ob, bíin xe'exe'et'a'aco'ob tumen u loobilo'ob x tocoy lu'umo', bíin u muluba'ob j cojo'ob tu jo'ol u caajalo'ob bíin xe'exet'a'aco'ob chéen p'elac u jóokolo'ob; tumen dzo'oc u talam kebanchajalo'ob, báalam meyaj lo'obe'ex.

⁷Yuumtzile' cu ya'alic: ¿Bix bíin in sa'ats ti' teech tuláacal le ba'alo'oba'? a paalalo'obe' dzo'oc u xúump'attiqueno'ob, cu jalach t'aano'ob tu kaaba' kuob, ma' kuobi'. Tin dzaj ya'ab janal ti'ob, ba'ale' tu p'atajo'ob u yocsic u yóolo'ob ti' teen, ca tu kubajuba'ob ti' x cáacbachil.

⁸Beyo'ob tzíimin taac u báaxal, che'ej u bin tu paach u yatan u yéet xiibile'.

⁹¿Ma' wa bíin in jadzo'ob tu yo'olal le ba'alo'oba'? ¿Ma' wa le cu najmatic jun p'éel caaj beya'?

¹⁰¡Ococ u aj p'eeco'ob ca nóoc ch'acta'ac u pakal le uvaobo', quex ma' u ch'a'acal tuláacal! ¡Ch'a'acac u kabo'ob, tumen bejela'e' ma' in x péet pachi'!

¹¹¡Israel yéetel Judae' dzo'oc u kebantalo'ob! Teen Yuumtzil, teen a'alic.

¹²Israel yéetel Judae' dzo'oc u kexico'ob Yuumtzil; dzo'oc u ya'alico'ob: Kue' ma' kabéeti'. Mix ba'al kaas cu bin j úuchul ti' to'on, ma' tu bin j antal ba'atelil, mix u mukyajil wi'ij.

¹³Aj bóobato'obe' chéen iiko'ob, tumen u t'aan Yuumtzile' mina'an ti'ob. Bejela'e' u'uye'ex ba'ax tu ya'alaj ti' teen Yuumtzil, u Kuil tuláacal páajtalil: Tu yo'olal cu ya'alico'ob le ba'alo'oba', je'el le ba'ax bíin úuchuc ti'oba': Bin in ca'aj in beet ca suunac káakil in t'aan ta chi' le caajo' bíin in beet ca suunac si'il, u ti'al ca jáabsa'ac tumen le káako'.

¹⁵Yuumtzil cu ya'alic: Israel, bíin in taas jun p'éel caaj náach u taal, u ti'al u beet loob ti' teech, jun p'éel caaj mu'uka'an, yéetel jach úuchben. Teche' ma' a wojel u t'aani', mix ta na'atic ba'ax cu ya'alico'ob.

¹⁶Tuláacalo'obe' jach xiixib j ba'atelo'ob u nu'ucul ba'atelo'obe', u káat ya'al quíimil.

¹⁷Bíin u láaj jaantico'ob a jooch bíin xan jaanto'ob a wo'och waaj, bíin xan u luko'ob a j xibil paalal yéetel a x ch'upul paalal, a j tamano'ob, a wacaxo'ob, a pakal uva yéetel u yich a higueraob. U nu'ucul u ba'atelo'obe' bíin u xiixcunto'ob le caajo'ob tuulumta'ano'ob, ti' ba'axo'ob a dzaamaj a walab a óolal.

¹⁸Yuumtzile' cu ya'alic: Ti' le kiino' ma' bíin in láaj xu'ulsi'.

¹⁹Le quéen káat chi'itac ti' teech: ¿Ba'ax o'olal tu beetaj ti' to'on Yuumtzil le ba'alo'oba'? núuc ti'ob beya': Je'el bix ta p'atile'ex Yuumtzil ca ta kultaje'ex jela'an kuob tu lu'umile', bey xan bíin a meyajte'ex yaanal máaco'ob ti' jun p'éel táanxel lu'umil.

²⁰A'alex ti' u ajawilil Israel yéetel ti' Judá:

²¹U'uy ba'ax quin wa'alic j ma' tuucul caaj, jach j ma' na'at wíinic, yaan u yicho'ob ba'ale' ma' tu paacato'ob yaan u xiquino'ob, ba'ale' ma' tu yu'ubic t'aan.

²²Teen Yuumtzil, teen a'alic: ¿Te'exe' ma' ta ch'a'ique'ex sajaquil? ¿Ma' ta quiquilanquile'ex tin táan? Teen tin beetaj u jáal ka'anab u ti'al u xuulinte, jun p'éel u xuul ma' tu páajtal u ch'actic. U cuclilo'obe' cu péeco'ob ma' muukil ka'am u juumo'ob, ba'ale' ma' tu páajtal u ch'actic.

²³Te'exe' yaan ti' te'ex jun p'éel pucsi'ikal jach dzu'uy j ma' tziic; ta p'atene'ex ca j bine'ex.

²⁴Ma' tu tucultajo'ob mix tu ya'alajo'ob: Co'ox tziquic Yuumtzil c Ku, máax tu kiinile' cu beetic u káaxal ja', ti' yáax kiin yéetel que'elil, yéetel cu p'atic u kiinil u ti'al jooch.

²⁵Ba'ale' a kebane', tu beetaj u jelpajal tuláacal ba'al yéetel ma' tu páajtal a qui'imacunsic a wóole'ex yéetelo'ob.

²⁶Tumen yaan tin caajal loolob máaco'ob cu ch'eenebo'ob beyo'ob j dzoon ch'íicho'obe' cu dzáico'ob léecho'ob ti' u yéet j xiibilo'ob.

²⁷Cu chupico'ob u yotocho'ob yéetel ocoltbil ba'alo'ob je'el bix cu chu'upul u so'oy ch'íich'o'obe'. Bey úuchic u ch'ico'ob muuko' yéetel u ayikaltalo'obo'.

²⁸Le beetic poloctaco'ob, tumen ma'alob u tzéenticuba'ob. U kasa'anilo'obe' mina'an u xuul: ma' tu beetico'ob ba'ax tu beel ti' le j ma' taataobo'. mix tu dzáico'ob ti' le óotzilo'obo' ba'ax cu najmatico'ob.

²⁹¿Ma' úuchac in jadzico'ob tu yo'olal le ba'alo'oba'? Teen Yuumtzil, teen a'alic.

³⁰Yaan jun p'éel ba'al jakbe'en yéetel sajbe'en cu yúuchul te j lu'uma'.

³¹Ba'axo'ob cu tze'ectico'ob le aj bóobato'ob chéen tuus; le aj kiino'obo' cu méektáano'ob je'el bix u káato'obe'. ¡in caajale' bey utzil tu t'aano'! Ba'ale', ¿Ba'ax bíin a beete'ex le quéen kuchuc u xuule'?