Read Yucateco Jeremías 50 Bible Online

Jeremías 50 - Yucateco bible

Jeremías 50

¹Péectzil tu dzaj Yuumtzil ti' aj bóobat Jeremías u ti'al Babilonia u lu'umo'ob le j caldeobo':

²Ka'ayte'ex le ba'alo'oba', dza'ex ojéeltbil ichil le caajo'obo'. Líikese'ex u chíiculal ka'aytaj; ma' a mucultique'ex mix ba'al. A'ale'ex: ¡Babiloniae' dzo'oc u cha'abal! ¡P'áat ichil subtzilil u ku beel, u ku Marduque' bey xan ichil sajbe'enil! ¡U beetbil kuob, u tuusil kuobe' j p'áato'ob ichil subtzilil yéetel ichil sajbe'enil!

³Tumen j xamane' táan u taal jun p'éel caaj ba'ateltic, u ti'al u sutic x tocoy lu'umil u múuch' caajilo'ob. Mix máac, mix xiibo'ob, mix ba'alche'ob, bíin cajlaco'ob te'elo' tumen tuláacalo'ob bíin púudzuco'ob.

⁴Yuumtzile' cu ya'alic: Ti' le kiino'obo' u cajnáalilo'ob Israel yéetel Judae' bíin talaco'ob u caxanteno'ob táan u yokolo'ob, teen Yuumtzil u Kueno'ob.

⁵Bíin u káat chi'ito'ob tu'ux yaan u bejil Sión, ti' bíin xi'ico'ob táan u ya'alico'ob: Xi'ico'on j much'tal yéetel Yuumtzil, ca c beet mina'an u xuul nup t'aan yéetel, u ti'al ma' u tu'ubul mix bikin.

⁶In caajal ca'ache' beyo'ob j taman saatalo'obe', ma' nu'uca'an u bisa'alo'ob tumen u aj canano'obi', máaxo'ob tu cha'ajo'ob ca sa'atco'ob ich káax, ti' jun p'éel káaxe'. Cu bino'ob cu bino'ob tu láak káax, bey tu'ubic ti'ob u cúuchil tu'ux cu ka'alalo'ob.

⁷Le quéen nactáanta'aco'ob tumen u aj p'eeco'obe' cu póot lukta'alo'ob[1] táan u ya'alico'ob: Ma' c si'ipili' tumen leti'obe' kebanchajo'ob tu táan Yuumtzil le máax dzáic janale', u alab óolal u yúuchben ch'i'ibalo'ob.

⁸¡Púudzene'ex ti' Babilonia u lu'um le j caldeobo'! ¡Xeene'ex, bey u aj bejile'ex u múuch' j tamano'ob!

⁹Tumen ti' le kiino' bíin in beet u ba'atelta'al Babilonia jun páaquili' tumen jun múuch' mu'uka'an j xamanil caajo'ob. Bíin u tzolcuba'ob u ti'al ca u ch'a'ob. Tumen úuchben j ba'atelo'ob, cu tulico'ob julubo'ob, utz u tza'ayalo'ob.

¹⁰Bíin láaj ocolta'ac le j caldeobo'; bíin láaj ocolta'aco'ob tac quéen náacac u yóolo'ob. Teen Yuumtzil, teen a'alic.

¹¹Te'ex, caldeoex, ta wocoltaje'ex in caajal, ¡qui'imacchajac a wóole'ex che'ejnaque'ex! ¡Síit'naque'ex, bey u síit'o'ob le jun túul x lo'obayan wacax ich xíiwe'! ¡Che'ejnaque'ex, bey u che'ej tzíimine'!

¹²Ba'ale' a lu'umex yéetel le caaj tu'ux síije'exo', bíin sen pa'ajac u subtalo'ob. Leti' bíin xuulintic tuláacal le múuch' caajo'obo', jun p'éel tiquin x tocoy caaj pa'aba'an.

¹³Tumen le quéen p'u'ujuquene' bíin in p'at x ma' cajnáalilo'ob, jach x tocoy caaj bíin suunac. Tuláacal máax bíin máanac te'elo' bíin ja'akac u yóol le quéen u yil ba'ax jaadzil tu kamaj.

¹⁴¡Aj ba'atele'ex mache'ex a p'úunche'ex, bakpachte'ex Babilonia! ¡Tule'ex tu yóokol tuláacal a julube'ex, tumen j kebanchaj ti' teen, ti' Yuumtzil!

¹⁵¡Ka'am awatnene'ex ba'atel tuláacal tu'ux! ¡Babiloniae' táan u kubicubáa! ¡Lúubo'ob tuláacal le witzil najo'obo', ju'uto'ob u tuulumilo'ob! ¡Lela' in sutaj kaas: suute'ex u jeel ti'ob! ¡Beete'ex ti', le ba'ax tu beetajo'!

¹⁶Ma' a p'atique'ex mix máac Babilonia pakalnac wa ca joochnac. Le quéen ila'ac le ba'atel cu xu'ulsajo', le táanxel caajilo'obo' bíin suunaco'ob tu lu'umo'ob, jujun túulil cu bin j púudzul tu tojil u lu'umo'ob.

¹⁷Israele' bey jun tuul j taman saatal, ch'a'apachta'an tumen leóno'obe'. Tu yáaxile' jaanta'ab tumen u ajawil Asiria; cu dzo'ocole' jaanta'ab tumen Nabucodonosor u ajawil Babilonia, tu nóot'aj u baaquelo'ob.

¹⁸Yo'olal lelo', teen Yuumtzil, u yuumil tuláacal páajtalil, u Kuen Israele', quin wa'alic: Bin in ca'aj in jadz u lu'umil u ajawil Babilonia, je'el bix tin beetaj yéetel u ajawil Asiriae'.

¹⁹Bíin in beet u suut Israel tu lu'umil, bey jun túul j tamane' bíin yanac ya'ab su'uc ti', tu caajil Carmelo, tu lu'umil Basán, yéetel tu pu'uquilo'ob Efraín yéetel Galaad.

²⁰Teen Yuumtzil, teen jajcuntic: Ti' le kiino'obo', Israel yéetel Judae' bíin p'áataco'ob x ma' si'ipil yéetel x ma' keban, tumen teen bíin in sa'ats tuláacal le tin cha'ajo'ob u cuxtalo'obo'.

²¹¡Ba'atelte'ex u múuch' caajilo'ob Merataim, yéetel u cajnáalilo'ob Pecod! ¡Ch'a'apachte'exo'ob, láaj xu'ulse'exo'ob! ¡Béeycunte'ex tuláacal ba'ax quin wa'alic! Teen Yuumtzil, teen a'alic.

²²Te j lu'umo' táan u yu'uba'al u juum ba'atel, nojoch xu'ulsaj cu yúuchuli'.

²³¡Babiloniae' u baxabil tuláacal yóokolcaab, dzo'oc u ca'achal, dzo'oc u xe'exet'a'al! ¡Nojoch sajaquil cu bin j antal ti' le caajo'ob le quéen u yilo'ob ba'ax ucha'an ti' Babilonia!

²⁴Babilonia ta juunal ta sinaj jun p'éel léech ta beel, mix ta wojéeltaj bix lúubiquech ti'i', ta léechtabáa. Ti' j káaxechi', tumen ta beetaj p'u'ujul Yuumtzil.

²⁵Yuumtzile' tu je'aj le tu'ux cu ta'acbesa'al u nu'ucul ba'atel, ca tu ye'esaj u nu'ucul u jaadzil u p'u'ujul, tumen Yuumtzile' u yuumil tuláacal páajtalil, yaan jun p'éel meyaj cu bin u beet tu lu'um le j caldeobo'.

²⁶¡Ba'atelte'exo'ob je'el ba'axac tzéelile'! ¡Je'ekabte'ex u ch'iilo'ob! ¡Much'quinte'ex le máaquilo'obo' xu'ulse'exo'ob! ¡Mix jun túul ca p'áatac cuxa'ani'!

²⁷¡Quíimse'ex tuláacal u aj ba'atelo'ob, túuxte'ex tu cúuchil quíimsaj! ¡Yaj yanilo'ob! ¡J kuch u kiinil yéetel u súutuquil u ja'adzalo'ob!

²⁸(Le máaco'ob páatchaj u jóokol Babiloniae' j kucho'ob Sione' táan u kaayo'ob ti' Yuumtzil c Ku tumen tu dzaj ba'ax tu najmataj Babilonia tu yo'olal ba'ax tu beetaj yéetel kulnaj.)

²⁹¡T'ane'ex tuláacal le aj p'úunche'obo', u ti'al ca u ba'atelto'ob Babilonia! ¡Tzolaba'ex tu bakpach le caajo' tu yo'olal ma' u púudzul mix máaqui'! ¡Sute'ex u jeel loob ti', je'el bix cu najmatique'! ¡Beete'ex láili' je'el bix tu beetajo'! Tumen ca'ache' ca'anal a wich tin wéetel, yéetel Yuumtzil, u Quili'ich Ku Israel.

³⁰Le t o'olale' u táanquelem paalale' cu lúubulo'ob quimeno'ob tu bejilo'ob tuláacal xan u aj ba'atelo'obe' bíin quíimico'ob ti' le kiino'. Teen Yuumtzil, teen a'alic.

³¹Yuumtzil u yuumil tuláacal páajtalile' cu ya'alic: J ma' subtal caaj, tene' p'uja'anen ta wéetel; dzo'oc u kuchul u kiinil in jadziquech.

³²J ma' subtal caaj a t'óochpajal bíin u beet a lúubul, mix máac bíin líiksiquech. Bíin in nac káakt tuláacal a caajilo'ob, le káako' bíin u láaj xu'uls a bakpach.

³³Yuumtzil u yuumil tuláacal páajtalile' cu ya'alic: U caajil Israel yéetel u caajil Judae' táan u mukyajtico'ob u ye'edzelo'ob. Kala'ano'ob tumen u aj p'eeco'ob, ma' u káato'ob u jáalkabto'obi'.

³⁴Ba'ale' u aj jáalkabtajo'obe', nojoch u muuk, u kaaba'e' Yahveh u yuumil tuláacal páajtalil. Leti' bíin u beet ba'ax ti'ibil ti'ob; bíin u taas ti' le múuch' caajo'oba', yéetel noj sajaquil ti' u cajnáalilo'ob Babilonia.

³⁵Yuumtzile' cu ya'alic: ¡Ba'atelta'ac Babilonia pa'ate' yéetel u cajtalilo'ob! ¡Tac u nuuquilo'ob yéetel u aj ojéelajo'ob!

³⁶¡Ba'atelta'ac u aj meeno'ob: cu chocotal u poolo'obo'!

³⁷¡Ba'atelta'ac u aj ba'atelo'ob: cu quiquilanquilo'ob yéetel sajaquil! ¡Ba'atelta'ac u tziimino'ob bey xan u bolano'ob! ¡Ba'atelta'ac u bo'olbil aj ba'atelo'ob: ca suunaco'ob beyo'ob co'olele'! ¡Ba'atelta'ac u ayikalo'ob: ca okolta'ac ti'ob!

³⁸¡Ba'atelta'ac u yáalcab ja'ilo'obe' ca tijico'ob! Tumen Babiloniae' jun p'éel u lu'umil táaj kaas kuob, tu yo'olalo'obe' dzo'oc u sa'atal u yóol.

³⁹Le t o'olalo' tu lu'umil Babilonia bíin u beeto'ob u yáactun káaxil j miiso'ob yéetel u peekilo'ob káax, ti' bíin cajlaco'ob avestruso'obi'. Mix bikin bíin cajlac máaco'obi'.

⁴⁰Bíin p'áatac bey Sodoma, yéetel Gomorra, bey xan le caajo'ob yano'ob tu bakpacho', le ca j xu'ulsa'abo'obe'. Mix máac bíin suunac cajtali', mix chéen máan ca beeti'. Teen Yuumtzil, teen a'alic.

⁴¹Líikbal u náach lu'umilo'ob j xamane', jun p'éel mu'uka'an múuch' caajo'ob yéetel ya'abcach ajawo'ob cu nu'ucticuba'ob u ti'al taal.

⁴²U cuchmajo'ob u nu'ucul ba'atelo'ob; p'úunche'ob yéetel u julubo'ob; loolob wíinico'ob, ma' tu ch'a'ico'ob óotzilil, u yawato'obe' bey u quíilbal ka'anabe', táan u bino'ob u nat'maj u tziimino'ob. U nu'uctmajuba'ob u ti'al u ba'atelto'ob Babilonia.

⁴³U ajawil Babilonia le ca tu yojéeltaj le péectzila' ma' j páatchaj péec yéetel u sajaquilili', cu yu'ubic yaayaj óolal yéetel ki'inam bey co'olel cu síijsaje'.

⁴⁴Bíin téec taalaquen bey jun túul león cu jóokol ichil u poomche'ilo'ob Jordán cu bin tu'ux yaan túunben janal, bíin in beet u púudzulo'ob le j Babilonialo'obo', bíin in beet u méek táan jun túul máac teen bíin in yéeye. Tumen ¿Máax cu páajtal u queticubáa tin wéetel? ¿Máax cu páajtal u t'aniquen j ba'atel tu yéetel? ¿Máax aj canan taman cu páajtal tin wéetel?

⁴⁵U'uye'ex le tuucul yaan ti' tena', teen Yuumtzil, dzo'oc in nu'uctic jaadz u ti'al Babilonia; le ba'ax dzo'oc in nu'ucbesico' u ti'al u lu'umil le j caldeobo': Tac le mejen j tamano'obo' jach p'eexo'obo' yaan u bisa'alo'ob, le chakano'obo' yaan u jáay xu'ulsa'al.

⁴⁶U lúubul Babiloniae', bíin ka'am juumnac, tu yo'olal lelo' bíin quíilbalnac tac le lu'uma', u yawato'obe' bíin u'uya'ac tac tu láak caajo'ob.