Read Yucateco Jeremías 51 Bible Online

Jeremías 51 - Yucateco bible

Jeremías 51

¹Yuumtzile' cu ya'alic: Bin in ca'aj in túuxt jun p'éel iik cu xu'ulsaj tu yóokol Babilonia, tu yóokol xan le j caldeobo'.

²Bíin in ca'aj beet ca loobilta'aco'ob tumen Babilonia u aj p'eeco'ob, je'el bix le trigo cu pu'ulul ca'anal tumen iike'; bíin in beet ca p'a'atac x ma' cajnáalilo'ob u lu'umo'. Le quéen kuchuc u kiinil le noj yajilo', bíin ba'atelta'aco'ob tuláacal u tzéelo'ob.

³¡U máakanto'ob u p'úunche'ob le aj p'úunche'obo'! ¡U dza'ob búuc máascabo'ob! ¡Ma' a ch'a'ique'ex óotzil ti' u táanquelemilo'ob Babilonia; láaj xu'ulse'ex u aj ba'atelo'ob!

⁴Ti' tuláacal u múuch' caajilo'ob le j caldeobo' u cajnáalo'obe' bíin p'áataco'ob jayacbalo'ob tu bejilo'ob,

⁵quex tumen Israel yéetel Judá kebanchajo'ob ti' teen, yéetel dzo'oc u chupico'ob yéetel keban u caalo'ob, teen Yuumtzil u yuumil tuláacal páajtalil, u quili'ich Kuen Israele', ma' in xúump'ato'obi'.

⁶¡Púudzene'ex ti' Babilonia! ¡Le máax cu páajtale' u tocubáa! ¡Ma' a quíimile'ex tu yo'olal u keban! Lela' leti' u kiinil in sutic u jeel le ba'ax u beetmajo', bíin in bo'ot je'el bix cu najmatique'.

⁷Babiloniae' bey jun p'éel u nu'ucul ukul, oro u ca'aj yanil tin kab ca'ache', cu cáalcuntic tuláacal yóokolcaab ca'ache'. U caajilo'ob le lu'uma' iquil u yukico'ob ca'ach le vinoo' cu sa'atal u yóolo'ob ca'achi.

⁸Ba'ale', chéen ca j téec lúub xiixcuna'an Babilonia. ¡Okolnene'ex tu yo'olal! Taase'ex dzaaco'ob u ti'al u yajilo'ob u ti'al c ilic wa je'el u yutztale'.

⁹Dzo'oc c dzáic dzaaco'ob ti' Babilonia, ba'ale' ma' táan u dza'acal. ¡P'ate'ex! Co'ox p'atic le cúuchila', tu jujun túulile' xi'ic tu lu'umil, tumen le loob u beetmajo' kucha'an tac ca'an, cu líikil tac te j múuyalo'obo'.

¹⁰Yuumtzile' tu béeycuntaj c ti'alintic le ba'ax c najmatico'. Co'otene'ex, xi'ico'on c tzicbalt tu caajil Sión le ba'ax dzo'oc u beetic Yuumtzil c Ku.

¹¹Yuumtzile' u káat u xu'uls Babilonia, dzo'oc xan u dzáic ti' u ajawilo'ob media le yaayaj tuuculo'oba'. Lela' u sutaj loob Yuumtzil tu yo'olal le ba'ax tu beetajo'ob ti' u kulnajo'. ¡Nu'ucte'ex a p'úunche'ex! ¡Mache'ex ma'alob a chimale'ex!

¹²¡Dza'ex u chíiculal a ba'ateltique'ex le máaxo'ob yano'ob tu yóokol u tuulumilo'ob Babilonia! ¡Ya'abcunte'ex le aj canano'obo'! ¡Dza'ex aj canan caajo'ob! ¡Dza'ex tu jáal bejo'ob máaxo'ob báalamtic! Tumen Yuumtzile' tu nu'uctaj, tu beetaj xan le ba'axo'ob je'el bix u ya'almajil u beetic ti' u cajnáalilo'ob Babilonia.

¹³Teech Babilonia, le yanech tu jáal nucuch áalcab ja'obo' yaan xan ti' teech ya'abcach ayikalilo'ob, ¡dzo'oc u kuchul u kiinil u xuul a cuxtal!

¹⁴Yuumtzil u yuumil tuláacal páajtalile', tu jalach t'antaj tu yo'olal u cuxtal: ¡Bíin in chupech yéetel aj p'eeco'ob, Je'el bix sáako'obe', leti'obe' bíin u kaayilo'ob dzáanche'etajil ta wóokol!

¹⁵Yuumtzil yéetel u páajtalile' tu beetaj lu'um; yéetel u yojéelale' tu beetaj yóokolcaab; yéetel u na'ate' tu sinaj le ca'ano'.

¹⁶yéetel u quíilbal cháaque' cu beetic u yáacam le ja' te j ca'ano', cu beetic u líikil le múuyalo'ob chunbal tu ti'itz le lu'uma', cu beetic u léembal cha'ac táan u káaxal ja', cu jóokesic xan le iik te tu'ux u ta'acbesmajo'.

¹⁷Tuláacal máaque' j ma' na'at yéetel j ma' ojéelaj. Le beetbil kuobo' cu p'atico'ob kaasil máax beetico'ob; ba'axo'obe' chéen tuus, mina'an u cuxtalo'ob;

¹⁸ba'alo'ob mina'an u biilalo'ob chéen u ti'alo'ob paj subtal, yaan u xu'ulsa'alo'ob tumen Yuumtzil tu kiinil p'is óol.

¹⁹¡Buca'aj jela'anil u Ku Jacob, le ti' beetmajil tuláacal ba'ax dzaca'an! Leti' máax yéey Israel, u ti'alinte. Yuumtzil u yuumil tuláacal páajtalil: bey u kaaba'o'.

²⁰¡Babilonia teech jun p'éelech xiixcunaj tuunich in ti'al, u nu'uculech in ba'atel! Ta wéetele' quin pa'ic caajo'ob yéetel quin muxic u ajawilo'ob.

²¹Ta wéetel quin xe'exet'ic tzíimino'ob yéetel le máax nat'mailo'ob, bolano'ob yéetel máax meyajtic.

²²Ta wéetel quin xe'exet'ic j xiibo'ob yéetel co'olelo'ob, nuxibo'ob yéetel táanquelmo'ob, j xi'ipalo'ob yéetel x lo'obayano'ob.

²³Ta wéetel quin xe'et'ic j tamano'ob pa'ate' yéetel u aj canano'ob, j colnáalo'ob yéetel wacaxo'ob, méektáano'ob yéetel u nucuch aj meyajo'ob.

²⁴Ba'ale' te'ex tu táan a wiche'ex bíin in bo'ot Babilonia yéetel tuláacal le j caldeob je'el buca'aj cu najmatico'ob, tu yo'olal le loob tu beetajo'ob ti' Siono'. Teen Yuumtzil, teen a'alic.

²⁵Tene' bíin in jadzech, u pu'uquil kascunajil, teech ca kascuntic tuláacal le lu'uma'. Teen Yuumtzil, teen a'alic. Bíin in líikes in kab u ti'al in jadziquech, bíin in beet a balkajal líikbal te tu ca'analil le búut' tuuno'obo', bíin in sutech elel múulil.

²⁶Mix jun p'éel u tuunichil le a x lab pakilo'ob ma'alobtac u ti'al u beeta'al najo'ob. Jun puli' bíin p'áataquech x tocoyil. Teen Yuumtzil, teen a'alic.

²⁷¡Jóopse'ex u paaxil ba'atel te ta caajale'exo'! ¡Paxe'ex le jóopsbil paaxo', nu'ucbese'ex le caajo'ob u ti'al u ba'atelto'ob Babilonia! ¡Líikese'ex u ti'al u bino'ob tu yóokolo'ob u ajawilo'ob Ararat, Mini yéetel Askenaz! ¡Dza'ex jun túul náacom u ti'al u nu'ucbes le ba'atelo'! ¡Beete'ex u táanilcunticuba'ob le j nat' tzíimino'obo' bey sáako'ob dzíicchaja'ano'obe'!

²⁸Áante'ex u ki'itbescuba'ob le caajo'ob u ti'al u ba'ateltico'ob; bey xan u ajawilo'ob Media, u méektáano'ob yéetel u aj meyajo'ob, tac xan tuláacal le lu'um yaan yáanal u méektáano'obo'.

²⁹Le lu'uma' cu quiquilanquil yéetel cu péec u yóol, tumen Yuumtzile' táan u béeycuntic le ba'ax tu tucultaje' u sutic Babilonia bey jun p'éel jach kaas x tocoy lu'ume'.

³⁰U aj ba'atelo'ob Babiloniae' jáaw u ba'atelo'ob, j p'ato'ob tu tuulumo'ob, tumen j xu'up u muuko'ob, j p'áato'ob beyo'ob x ch'upo'obe'. U caajo'obe' j chu'upo'ob yéetel máaxo'ob j ch'a'e u yotocho'obe' j tóoca'abo'ob.

³¹Le aj bisaj t'aano'obo', tzaylam paach u yáalcabo'ob, u ti'al u ya'alo'ob ti' u ajawil Babilonia u caajale' láaj ch'a'abi.

³²Le aj p'eeco' tu ch'a'aj le cúuchilo'ob u ch'aacat le sayabo'obo', tu tóocaj u cúuchilo'ob u to'ocol caaj le aj ba'atelo'obo' chu'upo'ob yéetel seten nojoch sajaquil.

³³Tumen Yuumtzil u yuumil tuláacal páajtal, u Ku Israele', cu ya'alic: ¡Babiloniae' bey ca'ach jun p'éel bukbil lu'um xanabche'eta'an tu kiinil u yúuchul jooch, tumen dzo'oc chuquic u kiinil jooch!

³⁴Cu ya'alic Jerusalén, u caajil Sión: Nabucodonosor u ajawil Babiloniae' tu xe'exe'et'ajen ca tu póot lukajen; tu p'atajen beyen jun p'éel u nu'ucul janal jóojochile'. Bey jun túul u nojoch ba'aba'alil ka'anab, tu lukajene'; tu na'ajcuntubáa yéetel u jach qui'il in wíinclil, u yalabile' tu pulaj. ¡U bo'ot Babilonia le loob tu beetaj ti' teno'! ¡U bo'oto'ob le j caldeob le máaco'ob tu quíimsajo'ob teno'!

³⁵

³⁶Yuumtzile' cu ya'alic: Tene' bin in ca'aj in beet ba'ax nu'uca'an, bin in ca'aj in sut u jeel ti' a aj p'eeco'ob le ba'ax tu beetaj ti' techo'. Bin in ca'aj in láaj tiquincunt u yáalcab ja'ilo'ob yéetel u sayabilo'ob Babilonia,

³⁷bíin suunac jun tucub jeenel pako'ob, u yáactun u peekilo'ob káax, jun p'éel cúuchil tu'ux mix máac bíin cáajaqui', bíin tza'ayac jak óolal yéetel sajbe'enil ti' tuláacal máax.

³⁸Tuláacalo'ob bíin juumnac u caalo'ob beyo'ob leóne', bíin okolnaco'ob beyo'ob mejnil leóne'.

³⁹Le quéen jo'op'oc u yelelo'ob u wíinclil tumen u yooxele', tene' bíin in dzáa qui' ukul u ti'al u cáaltalo'ob, bíin in beet u sa'atal u yóolo'ob. Beyo' bíin t'úubuco'ob ti' jun p'éel mina'an u xuul wenel, mix bikin bíin ca'a ajaco'ob. Teen Yuumtzil, teen a'alic.

⁴⁰Dzo'ocole' bíin biso'ob tu cúuchil quíimsaj, je'el bix u bisa'al j mejen tamano'obe', j yuuco'ob yéetel j tamano'ob.

⁴¹¡Babiloniae' jun p'éel caaj utz kaj óola'anil ti' tuláacal yóokolcaab, dzo'oc u lúubul dzo'oc u ch'a'abal tumen aj ba'atelo'ob! ¡Cu seten ja'akal u yóolo'ob le caajo'ob le quéen u yilo'obo'!

⁴²Le ka'anabo' tu bulaj Babilonia, ba'al tumen u nojoch cuclil le ja'o'.

⁴³U noj caajilo'obe' suunajo'ob sajbe'en x tocoy lu'um, tiquin yéetel láaj kascunta'abi, tu'ux mix máac cajtali', tu'ux mix máac cu máani'.

⁴⁴Bíin in jadz u ku Bel Babilonia, bíin in beet u xéic le ba'ax tu lukajo', mix bíin suunac xíimbaltbil tumen u láak caajo'ob. ¡Dzo'oc u lúubul u tuulumilo'ob Babilonia!

⁴⁵¡In caajal jóokene'exi', jujun túulil u caxant bix páatac u toquicubáa ti' in p'u'ujul seten chocochaja'ana'!

⁴⁶Ma' u ja'akal a wóole'ex, mix ch'a'ique'ex sajaquil tu yo'olal le tzicbalo'ob cu juum way te j lu'uma'. Tu jujun ja'abil bíin a'albil jejeláas tzicbalo'ob, u tzicbalil u beeta'al loob ti' le múuch' caajo'oba' yéetel ba'atelo'ob ichil méektáano'ob.

⁴⁷Bey túuno', bíin kuchuc u kiinil in jadzic u beetbil kuob Babilonia. Tuláacal le múuch' caajo'obo' bíin p'áatac t'onquinta'ano'ob bíin p'áataco'ob chuup yéetel quimeno'ob.

⁴⁸Ca'an, lu'um yéetel tuláacal ba'ax yanchaja'ane' bíin qui'imacchajac u yóolo'ob le quéen lúubuc Babilonia, le quéen talac lukbal j xaman u aj xu'ulsajo'ob. Teen Yuumtzil, teen a'alic.

⁴⁹Bey, Babiloniae' bíin lúubuc tu yo'olal le máaco'ob tu quíimsaj tu lu'umil Israel, yéetel xan le quíimsaj tu beetaj tuláacal yóokol caabo'.

⁵⁰Te'ex máaxe'ex púudze'ex ti' le quíimsajo', áalcabnene'ex x ma' je'elelil, quex dzo'oc a náachtale'exe', dza'ex a tuucule'ex chéen ti' Yuumtzil ka'ajac te'ex xan Jerusalén.

⁵¹Te'exe' ca wa'alique'ex: sublaco'on iquil c u'uyic bix c po'och'ol. Paj subtalil balic c ich, tumen táanxelil caajilo'ob dzo'oc u yocolo'ob tac tu cúuchilo'ob u jach quili'ichil kulnaj.

⁵²Ba'ale' Yuumtzile' cu ya'alic: Táan u taal u kiinilo'ob in jadzic u kuilo'ob Babilonia, ti' tuláacal u lu'umile' bíin áacamnaco'ob le ucha'an loob ti'obo'.

⁵³Quex ca na'acac Babilonia tac ca'an u ti'al u dzáa jach ca'anal tuulume', tac ti' bíin in túuxt u aj p'eeco'ob u ti'al xu'ulsic. Teen Yuumtzil, teen a'alic.

⁵⁴Líikbal Babilonia cu yu'uba'al u yawatilo'ob mukyaj, líikbal tu lu'umil le j caldeobo' cu yu'uba'al jun p'éel ka'amcach juum.

⁵⁵Yuumtzil, máax xu'ulsic Babiloniae' cu dzáic u xuul u juum. U aj p'eeco'obe' beyo'ob u p'u'ujul cuclil ka'anabe', bíin lúubuc tu yóokolo'ob yéetel nojoch juum.

⁵⁶J taalo'ob u xu'ulso'ob Babilonia; dzo'oc u machico'ob u aj ba'atelo'ob tu ca'acachajo'ob xan u p'úunche'ob. Tumen Yuumtzile' jun túul Ku cu dzáic ti' jujun túul ba'ax cu najmatic.

⁵⁷Le Ajaw Yuumtzilo' u yuumil tuláacal páajtale', cu ya'alic: Bíin in cáalcunt u nuuquilo'ob Babilonia, u aj ojéelajo'ob yéetel u méektáano'ob, u nojoch aj meyajo'ob yéetel u aj ba'atelo'obe', bíin t'úubuco'ob ti' jun p'éel mina'an u xuul wenel u ti'al ma' u yajalo'ob mix bikin.

⁵⁸Teen Yuumtzil, u yuumil tuláacal páajtalil, teen a'alic: U cóococh tuulumilo'ob Babiloniae' bíin láaj je'eneco'ob, u nucuch jool najilo'obe' bíin tóoca'aco'ob. Chéen cunel meyajnajico'ob le múuch' caajo'obo', tumen u xul óolalo'obe' ich káak bíin xu'uluco'ob.

⁵⁹Ti' u can p'éel u ja'abil méektáanac Sedequíase', u ajawil Judae', aj bóobat Jeremíase' tu dzaj jun p'éel kuben t'aan ti' Seraías u paal Nerías u yáabil Maasías. Seraíase' cu láakintic ca'ach ajaw Sedequías le ca j bin Babilonia, u nu'uct u míista'al le tu'ux cu bin j antal le ajawo'.

⁶⁰Jeremíase' tu dzíibtaj ti' jun p'éel ju'un, u péectzil le numyajo'ob cu bin j taal tu yóokol Babilonia, a'albil ma'alobe', tuláacal ba'ax dzíibta'an tu yo'olal,

⁶¹ca tu ya'alaj ti' Seraías: Le quéen kuchuquech Babiloniae', unaj a láaj xoquic le péectzila'.

⁶²Cu dzo'ocole' ca wa'alic: Yuumtzil teche' a wa'almaj bíin a xu'uls le cúuchila', mix máac bíin ca'a cajlaqui', mix máaco'ob, mix ba'alche'ob, tumen yaan a sutic x tocoyil jun puli'.

⁶³Le quéen dzo'ococ a xoquic le ju'una' kax jun p'éel tuunich ti'e' ca kaxic ti' jun p'éel tuuniche' cu dzo'ocole' ca pulic tu yáalcab ja'il Éufrates,

⁶⁴ca wa'alic beya': Bey bíin búuluc Babilonia', mix bikin bíin ca'a líikic ti' le noj yajil cu bin j túuxtbil ti' tumen Yuumtzilo'. Way cu dzo'ocol u t'aano'ob Jeremíase'.