Read Yucateco Jeremías 52 Bible Online

Jeremías 52 - Yucateco bible

Jeremías 52

¹Yaan veintiun ja'abo'ob ti' Sedequías ca tu chu'unbesaj u ajawil, ajawnaj Jerusalén once ja'abo'ob. U maamae' cu kaaba'intic ca'ach Hamutal, u x ch'upul paal Jeremías, u caajal ca'ache' Libna.

²Ba'ale' ba'axo'ob tu beetaje' kaastaco'ob tu yich Yuumtzil, láili' je'el bix tu beetajilac Joacim.

³Le t o'olale' Yuumtzile' j p'uuj yéetel Jerusalén bey xan yéetel Judá, ca tu tojolch'intajo'ob tu táan. Cu dzo'ocole' Sedequíase' j ko'oxchaj ti' u t'aan ajaw Babilonia.

⁴Ti' u kiinil diez, ti' u winal diez, ti' u nueve ja'abil u ajawil Nabucodonosor xíimbalnaj yéetel tuláacal u aj ba'atelo'ob u ti'al u bin ba'atelt Jerusalén, ca tu bakpachtaj. Ca je'el actáan ti', tu bakpache' tu beetaj níix lu'umo'ob u ti'al u ba'ateltic.

⁵Le noj caajo' j p'áat bakpachta'an tac tu ja'abil once ti' u ajawil Sedequías.

⁶Ti' u kiinil nueve ti' u can p'éel winalil le ja'abo' yajchaj le wi'ijil ichil le caajo', le máaco'obo' mina'an ca'ach mix ba'al u ti'al u jaanto'ob.

⁷Ca túun tu beetajo'ob jun p'éel nojoch jool tu tuulumil le caajo', quex tumen bakpachta'ano'ob tumen le j caldeobo', ajaw yéetel tuláacal u aj ba'atelo'obe' j púudzo'ob ti' le áakabo'. Jóoko'ob tu jool najil yaan tu chúumuc le ca'a p'éel tuulumo'obo', tu bejil u cúuchil pakalo'ob jalach naj, ca tu ch'a'ajo'ob u bejil u táax kóom lu'umil Jordán.

⁸Ba'ale' le aj ba'atelo'ob caldeobo' tu ch'a'apachtajo'ob ajaw Sedequías, ca tu chucpachtajo'ob tu táax lu'umil Jericó. Xúump'atta'ab Sedequías tumen tuláacal u aj ba'atelo'ob ca j ki'itpajo'ob.

⁹Le j caldeobo' tu machajo'ob le ajawo' ca tu bisajo'ob tu táan u ajawil Babilonia, ti' ca'ach yaan Riblae', tu lu'umil Hamat. Te'elo' Nabucodonosore' tu xot kintaj Sedequías,

¹⁰tu táane' tu túuxtaj xotbil u caal u paalal, bey xan tuláacal u nuuquilo'ob Judá.

¹¹Wa tu yo'olal Sedequíase' tu túuxtaj jóokesbil u yicho'ob cajk'aax u ti'al ca bisa'ac Babilonia, tu'ux j ka'ali tac ca j quíimi.

¹²Ti' u kiinil diez, ti' u cinco winalil u ja'abil diecinueve ti' u ajawil Nabucodonosor u ajawil Babiloniae', Nabuzaradán, aj meyaj ajaw yéetel u náacom xan u canano'ob jalach naj kuch Jerusalén ca tu tóocaj kulnaj, jalach naj yéetel tuláacal u najilo'ob le caajo', tu dzaj u yóol u tóoquic tuláacal u yotocho'ob le u nuuctaquilo'ob le caajo',

¹⁴le aj ba'atelo'ob caldeob láakintico' tu jenajo'ob le tuulum bakpachtic ca'ach Jerusaleno'.

¹⁵Cu dzo'ocole' Nabuzaradane' tu bisaj kala'ano'ob tac Babilonia le máaxo'ob p'aatalo'ob ca'ach te j caajo', bey xan le tu dzajuba'ob tu tzéel u ajaw Babilonia, bey xan u yalab le j meen jadzutz ba'alo'obo'.

¹⁶Chéen tu p'ataj wa jay túul ti' ichil le máaco'ob asab óotzilo'ob u ti'al u meyajto'ob u pakal uva yéetel u coolo'ob.

¹⁷Le j caldeobo' tu xe'exe'et'ajo'ob le ba'alo'ob bronce u ca'ajo'ob yano'ob ca'ach te j kulnajo': u yocomilo'ob, u chuun ocomilo'ob bey xan le nojoch chulub ja'o', ca tu bisajo'ob tuláacal le bronce tac Babilonia.

¹⁸Bey xan tu bisajo'ob u nu'uculo'ob ta'an, jo'opobo'ob, le j nat'abo'ob, le nucuch laco'ob, le nojoch jo'opobo'ob yéetel tuláacal u nu'uculo'ob le kultaj bronce u ca'ajo'.

¹⁹Bey xan le náacom le j canano'obo' tu bisaj tuláacal le ba'alo'ob oro yéetel plata u ca'ajo'obo': le u cáatilo'ob ja', u nu'ucul t'aba'an chúuc, le nucuch laco'ob, u nu'uculo'ob u ta'anil káak, le x t'uchub sáaso'obo', le nucuch jo'opobo' yéetel le nu'uculo'ob ukul, tu'ux cu dza'abal u ti'ibil óolal vino.

²⁰Wa tu yo'olal le ca'a p'éel ocomo'obo', le nojoch chulub ja' yéetel le doce xiibil wacaxo'ob cuchico'ob bronce u ca'ajo'ob, yéetel le chuuno'ob tu túuxtaj beetbil ajaw Salomón u ti'al kulnaje', u aalile' ma' tu páajtal u na'ata'al.

²¹Tu jujun p'éelil le ocomo' yaan asab ti' ocho metros u ca'anlil, yéetel cinco metros ca'a tac táancoch u bakpach; jóojochilo'ob ichil u piimil le bronceo' siete centímetros.

²²Jujun p'éelil le ocomo' tu xuul u ca'anlile', yaan ca'ach jun p'éel p'ich bronce u ca'aj, maanal ca'a p'éel metros u ca'anlil, tu bakpache' yaan jun p'éel tzáatzal bronce u ca'ajo'ob, jadzutzquinta'an yéetel granadaob. Le ca'a p'éel ocomo'obo' lajqueto'ob.

²³Ti' u tzáatzal jujun p'éel p'iiche' yaan cien granadaob, ti' lelo'oba' noventa yéetel seis cu páajtal u yila'alo'ob.

²⁴U náacom le aj canano'obo' tu machaj xan Seraías, nojoch aj kiin, Sofonías aj kiin naadz ti' u nojochil Seraías, yéetel óox túul u j canano'ob u jool najil kulnaj.

²⁵Ti' u cajnáalilo'ob le caajo' tu machaj le náacom yaan yóokol le aj ba'atelo'obo', siete máaco'ob yano'ob tu meeyjul ajaw, ti' yano'ob ca'ach te j caajo', le náacom caxtic máaco'ob u ti'al aj ba'atelo'ob yéetel setenta u nuuctaquilo'ob le caajo'.

²⁶Nabuzaradane' tu bisaj tuláacal le máaco'oba' tu táan u ajawil Babilonia, ti' yaan ca'ach Ribla, tu lu'umil Hamat. Te'elo' u ajawil Babiloniae' tu túuxtaj quíimsbilo'ob. Bey túuno' u cajnáalilo'ob Judae' jóokesa'abo'ob tu cajtalo'ob.

²⁸U xooquil le wíinico'ob j bisa'abo'ob tumen Nabucodonosor, buca'aj u xooquilo'oba': tu ja'abil siete u ajawile' tu bisaj tres mil veintitrés u cajnáalilo'ob Judá;

²⁹tu ja'abil dieciochoe' tu bisaj ochocientos treintidós ti' u cajnáalilo'ob Jerusalén;

³⁰tu ja'abil veintitrés, Nabuzaradán tu bisaj cuarenta yéetel cinco u cajnáalilo'ob Judá, tuláacalo'obe' cuatro mil seiscientos wíinico'ob bisa'abo'ob táanxel lu'um.

³¹Ti' u kiinil veinticinco ti' u winalil doce, ti' u ja'abil treinta yéetel siete bisa'ac Joaquín u ajawil Judae', jo'op' u ajawil Babilonia ajaw Evil-merodac, máax tu ye'esaj u yutzil tu yéetel Joaquín, ca tu jóokesaj ti' le kalabo';

³²tu bisajubáa ma'alob tu yéetel ca tu páaybe'encuntaj ti' u chuca'an le ajawo'ob yaan ca'ach yéetel Babilonia.

³³Bey úuchic u kexic Joaquín le nook cu búuquintic ca'ach ichil le kalabo', páatchaj xan u janal yéetel ajaw tu yalab u kiinil u cuxtal.

³⁴Tu yóokol lelo', tuláacal u kiinilo'ob u cuxtal Joaquine' tu kamaj jun p'éel bo'ol sáamsamal cu taal ti' u ajawil Babilonia.