Read Yucateco Jeremías 6 Bible Online

Jeremías 6 - Yucateco bible

Jeremías 6

¹¡U cajnáalile'ex u lu'umilo'ob Benjamín! ¡caxte'ex tu'ux a ta'acbesaba'ex, p'ate'ex Jerusalén! Jóopse'ex u paaxil ba'atel tu caajil Tecoa, dza'ex chíiculal tu caajil Bethaquerem, tumen jun p'éel numyajil, jun p'éel talam cu taal líikbal j xaman.

²Sione' bey jun p'éel jadzutz táax lu'ume',

³tu'ux cu bin j canan tamano'ob yéetel u múuch'ul j tamano'ob; cu je'elelo'ob tu bak paach, tu jujun múuch'il jun páayil u tzéenticuba'ob.

⁴U aj p'eeco'obe' cu ya'alico'ob: ¡líiksaba'ex ba'atel tu yéetel! ¡Nadzaba'ex u ti'al c bin ba'atelto'ob chúumuc kiin! Ba'ale', ¡chéen cunel! dzo'oc u chíinil kiin, le bo'oyo' táan u bíin u yéekjoch'ental.

⁵¡Co'ox ba'ateltic yéetel áakab ca c jen u witzilo'ob!

⁶Yuumtzil u yuumil tuláacal páajtalile' dzo'oc u ya'alic beya': ¡Ch'a'acac che'ob beeta'ac jun p'éel níix lu'um u ti'al c ba'ateltic Jerusalén! Le caaj xot kinta'an u ti'al jaadzil tumen chuup yéetel máaxo'ob cu yedzico'ob wíinic.

⁷Jerusalén u cúuchil tu'ux cu tóop'ol le kasa'anilo' je'el bix u tóop'ol ja'il jun p'éel ch'e'ene'. Chéen cu yu'uba'al u juum ba'atel, loobilo'ob yéetel looxo'ob; ma' tin wilic u láak ba'al chéen mukyajil yéetel ki'inamil.

⁸Tucult ba'ax ca beetic Jerusalén, tumen wa ma'e' quin p'u'ujul ta wéetel, bíin in sutech bey x tocoy lu'umile', mix máac bíin cáajbesiquech.

⁹Yuumtzil u yuumil tuláacal páajtale' cu ya'alic: Le israelitaob cu p'áatalo'obo' yaan u xakal caxta'alo'ob, bey u xakalta'al u yich uva ichil u le'obe', tac quéen xu'upuc.

¹⁰Tene' tin núucaj: ¿Máax cu bin u'uyiquen, wa quin dzáic u yojéelto'ob? U láaj macmaj u xiquino'ob, Yuumtzil ma' tu páajtal u yu'ubico'ob; cu p'a'astico'ob a t'aan tumen ma' utz u yu'ubico'obi'.

¹¹Yuumtzil, chuup yanilen yéetel in p'u'ujul, ma' tu páajtal in balic. Ca tu ya'alaj ti' teen Yuumtzil: wec tu yóokol le j xibil paalal yano'ob te j bejo', tu yóokol le cu much'talo'ob u beeto'ob kaaso'. Yaan u bisa'alo'ob kalbil Le íichamtzilo'ob pa'ate' yéetel u yatano'ob bey xan le nuxibo'ob.

¹²U yotocho'ob, u coolo'ob yéetel u yatano'obe' yaan u ch'a'abalo'ob u ti'al yaanal máaco'ob. Tumen in ca'aj in líikes in kab u ti'al in jadzic tuláacal máax cuxa'an te j lu'uma'. Teen Yuumtzil, teen a'alic.

¹³Tuláacal nucuch máac yéetel mejen paalal, chéen cu tucultico'ob u ayikaltalo'ob yéetel ma' utzil náajalo'obi'; aj bóobato'ob, aj kiino'ob, tuláacalo'ob j oocolo'ob.

¹⁴Ma' tu dzáicuba'ob u dzaco'ob u yajilo'ob in caajal; chéen cu ya'alico'ob láaj ma'alob anilo'ob, cu dzo'ocole' tuláacal kaas yanil.

¹⁵¡Unaj u ch'a'ico'ob subtal iquil u beetico'ob le ba'alo'ob ma' tu páajtal in mukyatico'! Ba'ale' ma' tu ch'a'ico'ob subtal, ¡mix u yojelo'ob ba'ax subtali'! Le beetic, le quéen in jadzo'obe', yaan tac u t'óochpajalo'ob, yaan xan u lúubulo'ob je'el bix u yúuchul ti' láako'obo'. Teen Yuumtzil, teen a'alaic.

¹⁶Yuumtzile' cu ya'alic ti' u caajal: Wa'alene'ex te j bejo'obo' ca a wile'ex, káat chi'ite'ex ba'ax úuch le úuchben nu'uct bejo'obe', tu'ux yaan u ma'alobil bej; xeene'exi' tumen ti' bíin yanac ti' te'ex jéedzeli'. Ba'ale' leti'obe' cu ya'alico'ob, Ma', ma' c káat c xíimbalti'.

¹⁷Yuumtzile' tu dzaj aj canano'ob, ca tu ya'alaj ti' le j cajnáalo'obo': Dzáa a wóole'ex ti' le chíicul cu bin u juumo'. Ba'ale' le máaco'obo' tu ya'alajo'ob: ma' j káat u'uyi'.

¹⁸Le t o'olale', Yuumtzile' cu ya'alic: múuch' caaje'ex u'uye'ex, ojéelte'ex ba'ax cu bin j úuchul ti' in caajal.

¹⁹Lu'um, ch'en xiquinte: bin in ca'aj in taas ti' le caaja' jun p'éel u numyaj lela' cu taal tu yo'olal u loolob tuuculo'ob tumen ma' tu yu'ubaj in t'aani', yéetel tumen tu kex óoltajo'ob in ca'anbesaj.

²⁰¿Ba'ax ten ca taasique'ex u poomil Sabá yéetel u qui'iboquil xíiwilo'ob náanach lu'umo'ob? Ma' utz u lúubul ti' a láaj tóocbil ba'alche'obi', mix u láak a quíimsbil ba'alche'ob.

²¹Le t o'olale' Yuumtzile', cu ya'alic: Bin in ca'aj in beet ca t'óochpajac le caaja' u ti'al ca lúubuc. Taataob yéetel u paalalo'ob, u yéet caajalo'ob, yéetel u yéet bisajba'ob, pa'ate' bíin quíimico'ob.

²²Yuumtzile' cu ya'alic: Líikbal tu náanach lu'umilo'ob j xamane' cu nu'ucticubáa j taal jun p'éel nojoch caaj yaan u páajtalil.

²³U cuchmajo'ob u p'úun che'ob yéetel x julub loolob wíinico'ob, ma' tu ch'a'ico'ob óotzilil; u yawato'obe' bey u quíilbal ka'anabe', u nat'majo'ob u tziimino'ob. Mix ba'al cu bineltic ti'ob u ti'al u ba'atelto'ob Sión.

²⁴Tu caajil Jerusalene', u cajnáalilo'obe' cu ya'alico'ob: Dzo'oc ojéeltic le péectzilo', u sajbe'entzile' dzo'oc u lúubsic muuk; táan c u'uyic okom óolal, yéetel ki'inamil yaan ti' to'on bey jun túul co'olel cu síijsaje'.

²⁵¡Ma' a bine'ex j káax, mix a bine'ex ti' bejo'ob! ¡Aj p'eeco'obe' u cuchmajo'ob u nu'ucul ba'atelo'ob; yaan sajbe'enil tuláacal tu'ux!

²⁶¡In caajal búuquint to'otoch nook u ti'al u yila'al táan a mukyaj, babaltabáa ichil u ta'anil káak, búuquint box nook ca okolnaquech tu jaajil a wóol je'el bix u quíimil chéen jun túulili' paale', tumen le máax bíin u xu'ulso'ono' séeba'an u taal t óokol!

²⁷Yuumtzile' tu ya'alaj ti' teen: Quin kubentic ti' teech ca a túunt in caajal. Xakal ile', ca wil bix u cuxtal.

²⁸Yuumtzil tuláacalo'ob seten cóoco'ob ti' a t'aano'ob aj líiksaj t'aano'ob, yéetel kasa'ano'ob, beyo'ob bronce yéetel hierroe'.

²⁹Le quéen u yust le káak yéetel muuk le jo'opobo' cu beetic u yíibil le plomoo'. Mix ba'al u biilal ca utzil ca'anbesa'aco'ob, tumen le j loolob máaco'obo' ma' tu xu'ululo'ob.

³⁰U naj u p'áatal u kaaba'ob: Plata u ti'al j pu'ulul, tumen teech, Yuumtzil dzo'oc a dzico'ob jun tzéelil.