Read Yucateco Jeremías 7 Bible Online

Jeremías 7 - Yucateco bible

Jeremías 7

¹Yuumtzile' tu t'anaj Jeremías ca tu ya'alaj ti':

²Wa'alen tu jool u kulnaj Yuumtzil ca a dzáa ojéeltbil le péectzila': U cajnáalile'ex tuláacal Judá ca wocole'ex ti' le jool naja' u ti'al a kulte'ex Yuumtzil, u'uye'ex u péectzil

³Yuumtzil u yuumil tuláacal páajtalil, u Ku Israel: Tojquint a cuxtale'ex bey xan le ba'axo'ob ca beetique'exo', beyo' teen túune' je'el in cha'ic a cajtale'ex te j lu'uma'.

⁴Ma' a wocsic a wóole'ex ti' u tuus le máaxo'ob cu ya'alico'ob: ¡Way yaan u kulnaj Yuumtzile', way yaan u kulnaj Yuumtzile'!

⁵Wa ca cuxtale'ex ma'alob bey xan le ba'axo'ob ca beetique'exo', yéetel toj a bisicaba'ex ta baatzile'exe';

⁶wa ma' ta woclique'ex le j táanxel lu'umo'obo', le j ma' taataob yéetel le x quimen íicchamo'obo', mix ta quíimsique'ex le j ma' si'ipil way ti' le cúuchila', mix xan ta kultique'ex u yaanal kuob, ba'axo'ob je'el u páajtal u beetic u kastal a wanile'exe',

⁷tene' je'el in cha'ic a cajtale'ex way ti' le lu'um tin dzaj ti' a máanja'an ch'i'ibale'ex u ti'al tuláacal kiino'ob.

⁸Te'exe' ca wocsic a wóole'ex ti' ma' jaaj t'aano'ob mix ba'al u biilal.

⁹Ca woocole'ex, ca quíimsaje'ex, ca pak kebane'ex, jalach t'aane'ex tu yo'olal tuus, ca tóoquique'ex poom ti' Baal, ca kultique'ex kuob máaxo'ob mix ba'al yaan a wile'ex tu yéetelo'ob,

¹⁰cu dzo'ocole' ca taale'ex way ti' le kulnaj jun páaycunta'an chéen ti' teno', u ti'al ca yanaque'ex tin táan. Ca tuclique'exe' utz a wanile'ex waye'; ca tuclique'ex je'el u páajtal u bin a beetique'ex le ba'alo'ob ma' tu páajtal in mukyajtico'.

¹¹¿Ca tuclique'ex wa le kulnaj kuba'an ti' tena' je'el u páajtal a sutique'ex jun p'éel u saajcab j oocolo'obe'? Tene' in wilmaj tuláacal. Teen Yuumtzil, teen a'alic.

¹²Xeene'ex tin quili'ich naj cu yantal Silo, le yáax cúuchil tin yéeyaj u ti'al in cajtalo', u ti'al ca wile'ex ba'ax tin beetaj tu yéetel, tu yo'olal u kasa'anil in caajal Israel.

¹³Quex tumen ma' chéen jun téen tin wa'alaj ma' utz a cuxtale'exe', te'exe' ma' ta wóolte'ex a wu'uye'ex in t'aani', mix a núuque'exi'. Teen Yuumtzil, teen a'alic.

¹⁴Le t o'olalo' le ba'ax tin beetaj yéetel u quili'ich naj Siloe', le bíin in beet yéetel le kulnaj jun páaycunta'an ti' teno', le tin dzaj ti' te'ex yéetel ti' a máanja'an ch'i'ibalo'ob ti' ba'ax a kubmaj a wóole'exo'.

¹⁵Yaan in tojolch'intique'ex tin táan, je'el bix tin tojolch'intajilac a sucu'une'ex, u ch'i'ibalo'ob Efraine'.

¹⁶Jeremías, teche' ma' a payalchi' tu yo'olal le caaja', ma' sen káat óoltic tu yo'olalo'ob. Ma' a pechicabáa, tumen ma' bíin in wu'uyechi'.

¹⁷¿Ma' ta wilic ba'ax cu beetico'ob tu caajil Judá yéetel tu bejilo'ob Jerusalén?

¹⁸U paalale' cu molico'ob u si'il, u taataobe', cu t'abico'ob u káakil, le co'olelo'obo' cu máakantico'ob u sacanil u ti'al u beetico'ob noj waajo'ob u ti'al u kubico'ob ti' le x kua' u patmaob u kaaba' u x Ajaw Ca'an. Cu poch'iqueno'ob, iquil u kubico'ob vino ti' u yaanal kuob.

¹⁹Ba'ale' ma' tu jach poch'eno'ob, je'el bix u asab poch'cuba'obe', tumen subtzil u ti'alo'ob. Teen Yuumtzil, teen a'alic.

²⁰Le t o'olal, téen Yuumtzil, quin wa'alic in ca'aj in láal tuláacal in p'u'ujulil tu yóokol le cúuchila' pa'ate' yéetel u cajnáalilo'ob, bey xan u ba'alche'ob, u che'ilo'ob le káaxo' yéetel tu coolo'ob tu'ux yaan u cúunche'ob. Yaan u chíicpajal bey jun p'éel tóoc mix bikin bíin tu'upuque'.

²¹Yuumtzil u yuumil tuláacal páajtalil, u Ku Israel, cu ya'alic ti' u caajal: Kube'ex tuláacal le láaj tóocbil yéetel quíimsbil ba'alche'ob je'el buca'aj a káate'exe', jaante'ex xan u bakel.

²²Ba'ale' le ca tin jóokesaj a máanja'an ch'i'ibale'ex Egiptoe', mix ba'al tin wa'alaj ca beeta'ac tu yo'olal láaj tóocbil yéetel quíimsbil ba'alche'ob.

²³Ba'ax tin wa'alaj ti'obe' ca u dzo'ocbeso'ob in t'aan; tumen wa cu beetico'ob beyo' teen u Kueno'ob, leti'obe' in caajalo'ob. Tin wa'alaj ca cuxlaco'ob je'el bix in tzolmaj ti'obe', u ti'al ca xi'ic utzil ti'ob.

²⁴Ba'ale' ma' tu yu'ubajeno'obi', mix tu dzo'ocbeso'ob in t'aani', tu dzu'uyquintajo'ob u poolo'ob, tu cha'ajo'ob u jíilta'alo'ob tumen u kaakas dzíibolal u pucsi'ikalo'ob. Ma' tu yóoltajo'ob suut ti' teni', tu cúulpachtajeno'ob.

²⁵Líikbal u jóokico'ob Egiptoe', a máanja'an ch'i'ibalo'ob tac bejela'e', tene' tin túuxtaj jujun túul tu paach u láake', tuláacal le aj bóobato'ob in palitzilo'ob.

²⁶Ba'ale' te'exe' ma' ta dzo'ocbesaje'ex mix ta wu'uyaje'ex in t'aani', ca ta asab dzu'uycuntaje'ex a poole'ex ti' a máanja'an ch'i'ibale'ex.

²⁷Jeremías, teche' u najmal a láaj a'alic ti'ob, quex ca u maco'ob u xiquino'ob; awat t'anto'ob quex ma' u núuquico'ob teech.

²⁸A'al ti'ob: Le múuch' caajo'oba' ma' tu yu'ubico'ob u t'aan Yuumtzil u Kuob, mix u káato'ob ca utzquinta'aco'ob. U jaajil t'aane' dzo'oc u lukul tu chi'ob.

²⁹¡Jerusalén, kos u tzo'otzel a pool, pule! ¡Kay jun p'éel okom óolal kay tu jo'ol lu'umil x tocoy lu'um! Tumen Yuumtzile' p'uja'an yéetel cajnáalilo'ob, dzo'oc u xúump'attic, dzo'oc xan u cúulpachtic.

³⁰Yuumtzile' cu ya'alic: U cajnáalilo'ob Judae' dzo'oc u beetico'ob ba'ax u chi'ichnacuntmajen: tu dzajo'ob u p'ecbe'en kuob ti' le cúuchil beeta'ab in ti'alto', ca tu manba'alcuntajo'ob.

³¹Tu kóomil Ben-hinom tu beetajo'ob u multuunil kultaj u ti'al Tofet, u ti'al u tóoquico'ob u j xibil paalal yéetel u x ch'upul paalal, lelo' ma' tin wa'alaj ca u beeto'obi', mix j máan tin tuucul in wa'aliqui'.

³²Le t o'olale', teen Yuumtzil, quin wa'alic bíin talac u kiinil ti' le cúuchila' ma' bíin a'ala'ac Tofet mix u kóomil Ben-hinom, ba'ale' u Kóomil Quíimsaj. Tofet bíin mu'ucuc le quimeno'obo' tumen mina'an u láak cúuchil.

³³U quimen wíinclil le máaco'obo' bíin suunac u janal j ch'oomo'ob yéetel u ba'alche'ilo'ob káax, ma' bíin anac máax p'ujico'obi'.

³⁴Yaan in xu'ulsic tu caajilo'ob Judá yéetel u bejo'ob Jerusalén u kayilo'ob kiinbesaj yéetel qui'imac óolal, yéetel u kaayilo'ob dzo'ocol beel; tuláacal u caajilo'ob yaan u p'áatalo'ob bey x tocoy lu'ume'.