Read Yucateco Jeremías 8 Bible Online

Jeremías 8 - Yucateco bible

Jeremías 8

¹Yuumtzile' cu ya'alic: Ti' le kiino' bíin u jóokesa'ac ti' u mucnalo'ob u baaquelo'ob u ajawilo'ob yéetel u nuuquilo'ob Judá, u aj kiino'ob, u aj bóobato'ob yéetel tuláacal le máaxo'ob caja'ano'ob ca'ach Jerusaleno',

²bíin p'áatac jayacbalo'ob tu táan kiin, uj, yéetel tuláacal eeko'obe', ba'axo'ob ca'ach tu yaacuntajo'ob, tu meyajtajo'ob, tu dzajo'ob u yóolo'ob ti'ob, tu kultajo'ob, káat chi'inajo'ob ti'ob, tu kultajo'ob xan. Mix máac bíin molic u ti'al muquico'ob. Bíin p'áataco'ob jaytal j lu'um je'el bix p'áatal jaytal u ta' wacaxe'.

³Máaxo'ob bíin p'áataco'ob cuxa'ano'ob ichil le táaj loolob wíinico'oba' je'el tu'uxac bíin yanaco'obe', le quéen in ki'itbeso'obe', bíin u dzíibolto'ob quíimil. Teen Yuumtzil, u yuumil tuláacal páajtalil, teen a'alic.

⁴Jeremías, teche' a'al ti' le caajo' le péectzil quin in wa'al ti' techa': Jun túul máac cu lúubule' cu ca'a líikil; máax p'atic u beele' cu ca'a suut ti'.

⁵Israel, ¿ba'axten túun ta kexajen? ¿ba'axten tu tzeeljubáa Jerusalén jun puli' ti' téen? ¿Ba'ax o'olal ca pechcabáa a beet a j ma' u'uyaj t'aanil yéetel ma' a káat suuti'?

⁶Ma' je'elec in ch'en xiquini' u ti'al in wu'uyic wa ba'axi' ba'ale' ma' in wu'uy mix máac ca sutkajac u tuucul tu yo'olal u meyaj loob ca u ya'al tu jaajil u yóol: ¿Ba'ax dzo'oc in beetic? Tuláacal wíinic cu jáajan máan, beyo'ob tzíimin jaka'an u yóolo'ob ich ba'atele'.

⁷Tac u ch'íich'ilo'ob ja' u yojel ba'ax kiin bíin ca'a suunaco'ob. Le mucuyo', le x cosamo' yéetel le j ch'úuyo' u yojelo'ob ba'ax kiin unaj u bino'ob táanxel cúuchil. Ma' bey teche', in caajal ma' a kaj óoltmaj in wa'almaj t'aano'obi'.

⁸¿Bix je'el u páajtal a wa'alique'ex aj ojéelaje'exe' yaan ti' te'ex u ya'almaj t'aan Yuumtzil? ¡Wa le aj dzíibo'obo' chéen tuus cu dzíibtico'ob dzo'oc u jelbesico'ob u dzíibilo'ob!

⁹Ba'ale' le aj ojéelajo'obo' yaan u cabal óolta'alo'ob sajaco'ob bey ba'alche' luba'an tu léeche'. ¿Tu'ux yaan a wojéelaje'ex, wa ta kex óolte'ex in t'aan?

¹⁰Le t o'olale' in ca'aj in kub a watane'ex, ti' yaanal j xiib a lu'ume'exe' ti' u yaanal yuumilo'ob. Tumen tuláacal u nuuquil bey u mejnilo'obe' chéen oocol cu tucultico'ob; aj bóobato'ob yéetel aj kiino'ob, tuláacal cu tus oocolo'ob.

¹¹Chéen cu chan báaytico'ob u yajilo'ob in caajal; cu ya'alico'ob láaj ma'alob yanil, quex tu tumen tuláacal kaas yanil.

¹²¡Unajmal u ch'i'ico'ob subtal u beetico'ob ba'ax in p'eec! Ba'ale' ma' u kaj óolo'ob ba'ax subtali'. Le t o'olale' le quéen in jadzo'obe', bíin u t'óochpajaco'ob je'el bix u yúuchul ti' le u láako'obo'. Teen Yuumtzil, teen a'alic.

¹³Yuumtzile' cu ya'alic: Bin in ca'aj in xot in caajal je'el bix u xo'otol trigoe' Mix jun p'éel uva bíin p'áatac tu kab, mix jun p'éel u neek tu kab x ko'och. Chéen tiquin le'ob bíin p'áatac.

¹⁴Le caajo' bíin u ya'ale': ¿Ba'ax u ti'al c p'áatal túun waye'? ¡Cone'ex tuláacalo'on te j caajo'ob tuulumta'ano'obo', ca quíimsa'aco'on jun puli'! Yuumtzil c Kue', yaan u beetic quíimil; cu dzáic ti' to'on ja' cu meyaj loob u ti'al c uke', tumen j kebanchajo'on tu táan

¹⁵Táan ca'ach c pa'atic ayikalil ba'ale' mix ba'al utz j kuchuc ti' to'on. Táan c pa'atic ca'ach toj óolale', ba'ale' chéen sajbe'enil t kamaj.

¹⁶¡Je'el cu taal le aj p'eeco'obo'! ¡Líikbal Dan cu yu'uba'al u poroxni' u tziimino'ob! Quéen awatnac le tzíimino'obo' tuláacal lu'um cu quíilbal. Ta'an u taalo'ob u xu'ulso'ob le múuch' caajo'oba', pa'ate' yéetel tuláacal ba'axo'ob, u noj caajilo'ob yéetel máax caja'ano'obi'.

¹⁷Yuumtzile' cu ya'alic: Bin in ca'aj in túuxt ti' te'ex, j chi'ibal caano'ob ca u chi'ex; mix le j meeno'ob bíin páataco'obi'.

¹⁸In mukyaje' mina'an u dzaaquil in pucsi'ikale' cu lúubul u muuk.

¹⁹U yáacam in caajale' cu yu'uba'al tuláacal tu'ux: ¿Bejela'e' mina'an Yuumtzil Sión? ¿Mina'an u ajawil te'elo'? Yuumtzile' cu núuquic: ¿Ba'ax ten ta poch'ajene'ex le ca ta kultaje'ex beetbil kuob jela'an kuob mix ba'al u biilalo'ob?

²⁰J máan le yáax kiino', dzo'oc le joocho' ma' anchajac tocsajil c ti'alinti'.

²¹Quin mukyajtic u mukyaj in caajal; óotzil óolal yéetel sajaquil cu taal ti' teen.

²²¿Mina'an wa jun túuul tocsajil u ti'al Galaad? ¿Mix máac yaan dzaquic? ¿Ba'ax óolal ma' tu yutztal in caajal?