Read Yucateco Jeremías 9 Bible Online

Jeremías 9 - Yucateco bible

Jeremías 9

¹¡Quexi' ca béeyac sayab in wicho'obe', je'el bix u sen áalcab ja' u ya'alil in wiche', u ti'al okolnaquen bul kiin yéetel bul áakab tu yo'olal u quimenilo'ob in caajal!

²¡Quexi' ca yanac jun p'éel cúuchil tu'ux in cajtal te x tocoy lu'ume', u ti'al in náachtal ti' in caajal! Tumen tuláacalo'ob u kexmajo'ob Yuumtzil; leti'obe', jun múuch' aj kex óolo'ob.

³Je'el bix séeba'an u ch'inico'ob julubo'obe', bey séeba'anil u tuuso'ob. Te j caajo'oba' táaj ya'ab tuus, jaaje mina'an; táan u bin u bin ya'abtal le kaaso', lelo' Yuumtzil jajcuntic: Ma' u yóolto'ob u kaj óolteno'obi'.

⁴Canantabáa tac ti' a wéet bisajbáa; mix ti' a sucu'un cu páajtal a kubic a wóol, ichil jach láaktzilo'ob cu tusicuba'ob tu baatzilo'ob le éet bisajba'obo' cu paaclan a'alico'ob ba'al tu yóokolo'ob.

⁵Cu múul p'a'asticuba'ob, mix máac a'alic u jaajil dzo'oc u suuctal u tuuso'ob; talam aj kebano'ob, ma' tu páajtal u jelpajalo'ob.

⁶Yuumtzil a'alic: ¡Jun p'éel loob tu paach u láak loob, jun p'éel tuus tu pach u láak tuus! In caajale' ma' u káat u ya'al wa beyi'.

⁷Le t o'olal téene', Yuumtzil u yuumil tuláacal páajtalile', teen a'alic: ¿Ba'ax u je'el u páajtal in beetic tu yo'olal in caajale', wa ma' in dzáic ich káak u ti'al in wutzquintic?

⁸U yaako'obe' u julubilo'ob quíimsajo'ob chéen tuus cu máan u ya'alo'ob. Cu te'escuntico'ob u yéet bisajba'ob, ba'ale' chéen u ti'al u dza'ob léecho'ob ti'ob.

⁹¿Ma' u najmal in jadzico'ob tu yo'olal le ba'alo'oba'? ¿Ma' bíin in dzáa wa ba'ax cu najmatic jun p'éel caaj beyo'? Teen Yuumtzil, ten a'alic.

¹⁰Okolnene'ex, áacamnene'ex te j pu'uco'obo', kaye'ex jun p'éel ch'a'a óotzilil tu tojil táax lu'um, tumen ela'antac mix máac cu máano'obi'; ma' tu yu'uba'al u jéemcal wacaxi', tac le ch'íicho'obo' yéetel le ko'ox ba'alche'ilo'obe' j púudzo'ob.

¹¹Jerusalene' bin in ca'aj in sut jun tucub tuunicho'ob, bey jun p'éel u sajcab u peekilo'ob káaxe'; yaan in x tocoyquintic u caajilo'ob Judá, yaan u p'áatal x ma' cajnáalilo'ob.

¹²¿Máax jach aj ojéelaj u ti'al ch'a'a nu'uctic le ba'alo'oba'? ¿Yuumtzile' ti' máax tu dzaj u kaj óolt u ti'al ca páatac u tzolic ti' u láak máaco'ob? ¿Ba'ax ten bey yanil chéen x la' caaj, tiquin bey jun p'éel x tocoy lu'um tu'ux mix máac cu máane'?

¹³Yuumtzile' cu núuquic: Tuláacal le ba'axa' úuche' tumen le j israelitaobo' tu p'atajo'ob jun tzéel le ca'anbesaj tin dzaj ti'obo'; ma' tu dzo'ocbesajo'obi' mix tu yóoltajo'ob u beeto'obi'.

¹⁴Tu pechajuba'ob u beeto'ob ba'ax kaas yéetel tu kultajo'ob tuusil kuob, je'el bix ca'anbesa'abo'ob tumen u taataobe'.

¹⁵Le t óolale' teen, Yuumtzil u yuumil tuláacal páajtalil, u Ku Israel, teen a'alic: Bin in ca'aj in dzáa u jaanto'ob jun p'éel ba'al káaj, bin in ca'aj in dzáa ja' cu quíimsaj.

¹⁶Yaan in ki'itbesico'ob ichil caajo'ob ma' u kaj óoltmajo'ob leti'obi', mix xan u taataob; yaan in beetic u ch'a'apachta'alo'ob yéetel táadz máascab, tac quéen láaj xu'ulsa'aco'ob.

¹⁷Yuumtzil, u yuumil tuláacal páajtalile' cu ya'alic: ¡Utzil u'uye'ex! túuxte'ex t'anbil le co'olelo'obo' u meyajo'obe', u yokom óolalo'ob.

¹⁸¡Co'otene'ex tu séeblaquil, okom óolnaque'ex t o'olal; ca xan chu'upuc yéetel u ya'alil c ich tu sóol c iche' ca yáalac u ja'il tu yo'olal c sen okol!

¹⁹Líikbal Sión cu yu'uba'al u kaayilo'ob c okom óolal: ¡Ile'ex buca'aj dzo'oc nakan óotziltal! ¡buca'aj subtzilil dzo'oc mukyajtic! Yaan c p'atic c lu'um, c otoche' dzo'oc u p'áatal x lab caajtalil.

²⁰Co'olele'ex u'uye'ex u t'aan Yuumtzil, ch'a'a nu'ucte'ex u péectzil. Ca'anbese'ex okol ti' a x ch'upul paalale'ex yéetel a x éet bisajba'exe' okom kaaynaque'ex beya':

²¹Quíimile' j ooc ichil c otoch j kuch tac jalach naj; cu quíimsic mejen paalal ti' bejo'ob bey xan le táanquelemo'obe' ti' kíiwiquil cu quíimsico'ob.

²²U quimen wíinclil máaco'obe' p'áato'ob jaytal bey u ta' ba'alche'ob te j káaxo', bey u yi'ij trigo cu p'áatal tu paach le j jochnáalo', mix máac molic. Teen Yuumtzil, teen a'alic.

²³Yuumtzile' cu ya'alic: Ma' u ca'analtal u yich aj ojéelaj tu yo'olal u yojéelaj, mix le aj páajtal tu yo'olal u páajtalil, mix le ayikal tu yo'olal u ayikalil.

²⁴Wa máax u káat ca'analtal u yiche', ca'analchajac u yich tumen u kaj óoltmajen, tumen dzo'oc u kaj óoltic, teen Yuumtzil, quin meyaj te j lu'uma' yéetel yaacunaj, ti'ibil bejil yéetel tojil, tumen leti' le ba'alo'oba' utzo'ob tin wich. Téen Yuumtzil, teen a'alic.

²⁵Yuumtzile' cu ya'alic: Yaan u kuchul u kiinil bíin in jadz le caajo'ob cu súuy kuptico'ob u bakelo'ob;

²⁶Egipto, Judá, Edom, Amón, Moab yéetel tuláacal le caja'ano'ob te x tocoy lu'um cu dziquicuba'ob. Tumen tuláacal le caajo'obo', bey xan tuláacal u caajil Israel j ma' ocsaj óolo'ob.