Read Yucateco Lamentaciones 1 Bible Online

Lamentaciones 1 - Yucateco bible

Lamentaciones 1

¹¡Jach dzo'oc u p'áatal tu juunal noj caaj chup ca'ach yéetel cajnáalo'obo'! ¡Chica'an ti' jun túul x quimen íicham le caaj, u noj caajil le múuch' caajo'obo'! ¡Dza'an tu yáanal chichich meyajo'ob u chan x ajaw le ajawilo'obo'!

²Cu búulul ichil okol ti' le áakabo'; u ja'il u yicho'obe' cu yáalcabo'ob tu p'u'uco'ob. Ti' ichil tuláacal u j weeyo'obe' mina'an mix jun túul u ti'al u náaysic yóoli'. Tuláacal u yéet bisajbáilo'obe' tu sutaj u paacho'ob ti'; bejela'e' dzo'oc u suut u aj p'eeco'ob.

³Tu yóokol u mukyajo'ob yéetel u chichich meyajo'obe', bejela'e' Judae' cu mukyajtic kalabil. Le máax cu ajawil ca'ach ichil le caajo'obo' bejela'e' ma' tu nuptáantic je'elel. Chucpachta'ab tumen le máaxo'ob ch'a'apachtmail ca'acho' ca dzaab ich talam cuxtal.

⁴¡Buca'aj okom óolal yanilo'ob u bejilo'ob Sión! ¡Mix máac yaan u ti'al ca talac ti' le kinbesajo'obo'! X tocoy yanilo'ob u jool najilo'ob le noj caajo', u aj kiino'obe' táan u yokolo'ob, le x ch'úupalalo'obo' taan u yaayaj óolalo'ob, Jerusalene' táan u máansic káakaj óolalilo'ob.

⁵U aj p'eeco'obe' cu t'onquinajo'ob, máaxo'ob ba'ateltico'obe' cu u ayiktalo'ob. Tumen Yuumtzile' tu dzaj ti' yaayaj óolal tu yo'olal u ya'abil úuchic u kebantal. U paalalo'obe' táanxel lu'umil j bisa'abo'ob tumen u aj p'eeco'ob.

⁶J p'áat mina'an u qui'ichpamil le x qui'ichpam Siono'; u nuuquilo'ob beyo'ob quéejo'obe', taan u máano'ob u caxto'ob janal; tu jíiltico'ob u yooco'obe' taan u bino'ob táanil ti' máaxo'ob dzonico'ob'.

⁷Jerusalene' cu ka'ajsic le kiino'ob ca'ach caaj p'áat tu juunal yéetel okom u yóole'; cu ka'ajsic tuláacal le ayikalilo'ob yanchaj ti' le máanja'an kiino'obo'; cu ka'ajal ti' le caaj lúub tu yaanal u páajtalil u aj p'eeque' mix máac j taal u ti'al áantic, Le caaj ila'ab tumen u aj p'eeco'obe' ca j p'a'asta'ab tu yo'olal u ju'ujutil.

⁸Jerusalene' dzo'oc u sen kebantal, le o'olale' cu najmatic ca cúulpachta'ac. Le máaxo'ob tziquic ca'ache' bejela'e' cu cúulpachcuntico'ob, tumen dzo'oc u yilico'ob u chacnule'enil. Le o'olale' taan u yokol, tu yo'olal u sublaquile' cu sutic u pach.

⁹U nooke' chup yéetel kaakas kóokolil, ma' tu tucultaj ba'ax cun úuchuli'. Talam u na'ata'al bix úuchic u lúubul, mix máac yaan u ti'al náaysic u yóol. ¡Yuumtzil, il bix cabalcunsa'an in wóol, pact xan u ca'anal ich le aj p'eeco'obo'!

¹⁰Le aj p'eeco' dzo'oc u beeticubáa bey u yuumil u ayikalilo'ob Jerusalene'. Le caajo' tu yilaj bix ooquico'ob yéetel jáanpay óolal le j ma' ocsaj óolalo'ob ichil le quili'ich kulnajo', ¡Máaco'ob a wa'almaj ti'obe' Yuumtzil, ma' unaj u yocolo'ob tu cúuchil a much'tali'!

¹¹Tuláacal u cajnáalilo'ob táan u yokolo'ob, cu máano'ob u caxto'ob ba'al u jaanto'ob; tu kexaj u ayikalilo'ob yéetel janal u ti'al ca páatac u cuxtalo'ob. ¡Yuumtzil il a wil in ju'uju'util! ¡Táan óolt in yaayaj óolal!

¹²¡Te'ex ca bine'ex ti' le bejo'obo' wa'alene'ex a tuculte'ex, wa yaan u láak yaj óolal je'el bix le cu sen beetic in mukyajo'! ¡Yuumtzil tu túuxtaj teen le yaayaj óolala' le ca j t'a'ab u p'uja'anile'!

¹³Yuumtzile' tu pulaj líikbal te ca'analo', jun p'éel káak tu tóocaj tac in baaquelo'ob; tu jayaj jun p'éel léech tu'ux quin máane' ca tu beetaj in suut paachil; dzo'oc u xump'attiquen ti' mantadz mukyaj.

¹⁴In kebano'obe' dzo'oc u yila'alo'ob tumen Yuumtzil, leti'e' dzo'oc u kaxico'ob ti' teen, bey jun p'éel cuuch aal yanil tin wóokole': ¡taan u xu'upsic in muuko'ob! Yuumtzile' dzo'oc u dzáiquen tu kabo'ob wíinico'ob ma' tu páajtal in mukulmuk tu yéetelo'ob.

¹⁵Yuumtzile' tu pulaj náach ti' teen le jach j xibil máaco'ob cu toquiqueno'ob ca'acho'. Tu léench'intaj tin wóokol jun múuch' aj ba'atelo'ob u ti'al u xu'ulsic in asab j xibil máaco'ob. ¡Yuumtzile' dzo'oc u yedzic le x sujuy Judao' je'el bix u ye'edzel le uvaob u ti'al ca jóokesa'ac le vinoo'!

¹⁶Le ba'alo'oba' cu beetico'ob in wokol. Cu chu'upul in wicho'ob yéetel u ja'ilo'ob, mix máac yaan u ti'al u náaysic in wóol, mix máac yaan u ti'al u dzáa teen túumben líik óolal. Ichil óotzilil dzo'oc u p'áatalo'ob in paalal, tumen asab mu'uka'anchaj le aj p'eeco'ob' ti' to'ono'.

¹⁷Sione' cu tich'ic u kabo'ob táan u káat óolal, ba'ale' mix máac yaan u ti'al náaysic yóol. Yuumtzile' tu ya'alaj ca bakpachta'ac Jacob tumen u aj p'eeco'ob; Jerusalene' u chuun a'alaj ba'alo'ob u ti'alo'ob leti'ob.

¹⁸Yuumtzile' tu beetaj ba'al u naj mal tumen tene' ma' tin dzo'ocbesaj u nu'ucbe'en t'aani'. ¡Ch'en xiquintene'ex, tuláacal caaje'ex; ile'ex in yaayaj óolal! ¡In j táanquelemo'ob yéetel in x lo'obayano'obe' dzo'oc u bisa'alo'ob u ti'al palitziltbilo'ob!

¹⁹Tin kataj áantaj ti' in j weeyo'ob ba'ale' leti'obe' tu tuseno'ob. In aj kiino'ob yéetel in aj nuxibo'obe' j quíimo'ob ichil le caajo': ¡taan ca'ach u máano'ob u caxto'ob janal u ti'al ca páatac u cuxtalo'ob!

²⁰¡Yuumtzil il a wil in yaayaj óolal! ¡Quin wu'uyic bin u ca'aj xíiquil in tzeem! Le yajilo' cu yedzic in pucsi'ikal le quéen in tucult in x ma' u'uyaj t'aano'. Te j táancabo' le táadz máascabo' cu quíimsic in paalalo'ob, way ichnaje' yaan xan quíimil.

²¹Le máaco'obo' cu yu'ubico'ob in yaayaj óolal ba'ale' mix máac yaan u ti'al u náaysic in wóol. Tuláacal in aj p'eeco'obe' u yojelo'ob ba'ax quin mukyajtic, tu yo'olal ba'ax dzo'oc beetique' cu qui'imactal u yóolo'ob. ¡Beet u taal le kiin a ka'aytmajo', u ti'al ca xi'ic kaasil ti'ob je'el bix úuchic ti' teno'!

²²Beet ca kuchuc ta táan tuláacal le kaas tu beetajo'obo'; beet ti'ob tu yo'olal u kebano'ob, je'el bix ta beetaj teno' tumen sen ya'ab in wokol: ¡koja'an yanil in pucsi'ikal!