Read Yucateco Lamentaciones 2 Bible Online

Lamentaciones 2 - Yucateco bible

Lamentaciones 2

¹¡Nojoch u p'uja'anil Yuumtzil, le o'olale' dzo'oc u éekjoch'e'entic u qui'ichpamil Sión! Dzo'oc u mina'ancunsic u qui'ichpamil Israel je'el bix náachil le ca'an ti' le lu'umo'; ichil u p'uja'anile' mix ka'aj ti' tu'ux cu t'alcuntic u yooqui'.

²Yuumtzile' mix jun p'éel u najilo'ob Jacob tu p'ataj wa'alacbal, ichil u súutuquil u p'uja'anile' tu ju'uju'utaj u tuulumilo'ob x qui'ichpam Judá; tu lúubsajo'ob j lu'um u ajawil yéetel u méektáano'ob.

³Le ca j t'a'ab u p'u'ujlile' tu xóot kuptaj tuláacal u páajtalil Israel. Tu lukesaj ti' to'on u táac muukil u páajtalil le ca'aj nactáantajbáa yéetel le aj p'eeco'obo'; ¡dzo'oc u t'abic káak ichil u ch'i'ibal Jacob, cu tóoquic tuláacal ba'ax cu nactáantic!

⁴Yuumtzile' bey jun túul aj p'eec óole' tu t'inaj u x p'úunche', tu jedzaj u kab; bey jun túul aj p'eeque' tu ja'aja'ataj le ba'ax jadzutz ca'ach u yila'alo'; u p'uja'anile' tu pulaj bey jun p'éel káak tu yóokol u najilo'ob x qui'ichpam Sión.

⁵Yuumtzile' meyajnaj bey jun túul aj p'eec óole': tu láaj xiixcuntaj Israel, tu jutaj tuláacal u jalach najilo'ob, tu jutaj u tuulumilo'ob, tu túul chuptaj le x qui'ichpam Judao' yéetel yaayaj óolal tu yóokol yaayaj óolal.

⁶Bey jun túul j oocole' tu janpaytaj u quili'ich kulnaj; tu mixba'aljcuntaj u cúuchil much'tal. Yuumtzile' tu beetaj u tu'ubsa'al tu caajil Sión, le kinbesajilo'obo' bey xan u kiinilo'ob je'elel. Ichil u sen p'u'ujulile' tu p'ectaj le ajaw bey xan le aj kiin.

⁷Yuumtzile' dzo'oc u cúulpachcuntic u multuunil kultaj, dzo'oc u kex óoltic u quili'ich kulnaj; dzo'oc u kubic tu kab u aj p'eeco'ob u ca'anal tuulumil u bakpach le caajo'. ¡Yaan jun p'éel ka'amcach awatil tu kulnajil Yuumtzil, je'el bix tu kiinil kinbesajile'!

⁸Yuumtzile' tu dzaj tu yóol u jenic u tuulumilo'ob x qui'ichpam Sión. tu tucultaj u beetic jun p'éel xu'ulsajil ca tu dzo'ocbesaj x ma' je'elelil. Pako'ob yéetel tuulumo'ob tu dzaj ichil yaayaj óolale', l aj queet lúubico'ob.

⁹Le caajo' mina'an u jool najilo'ob mix u kalabilo'ob ¡J p'áato'ob ju'uju'uto'ob niquicbalo'ob j lu'um! U ajawil yéetel u méektáano'obe' ichil j ma' ocsaj óolo'ob yano'ob; dzo'oc u p'áatal mina'an u ya'almaj t'aan Ku ti'ob. ¡Mix ti' u aj bóobato'ob yaan ti'ob u náayil Yuumtzil!

¹⁰U nuuquilo'ob x qui'ichpam Sione' culucbalo'ob j lu'um maacal u chi'ob, cu tosico'ob lu'um yóokol u poolo'ob cu búuquintico'ob to'oto'och nooko'ob. U táanquelmilo'ob Jerusalene' cu noctalo'ob tac j lu'um.

¹¹Le okolo' cu xupic in wich, in pucsi'ikale' quin wu'uyic ta'itac u xíiquil; luba'an in wóol tac j lu'um iquil in wilic u xiixcunta'al u caajil in wéet caajalo'ob, le quéen in wil tac le mejen paalal cu chu'ucho'obo', táan u quíimilo'ob yéetel wi'ij ti' le bejo'obo'.

¹²Le mejen paalalo'obo' cu ya'alico'ob ti' u maamaob ¡Mina'an to'on waaj mix u kaab uva! Cu lúubulo'ob bey loobilta'ano'ob u ti'al quíimil tu bejilo'ob le caajo', táan u ch'a'ico'ob u yalab yiiko'ob méeka'ano'ob tumen u maamaob.

¹³¿Ti' ba'ax je'el u páajtal in quetiquech wa in chica'ancuntiqueche' x qui'ichpam Jerusalén? ¿Ba'ax je'el u páajtal in dzáic u ti'al in qui'imaccunsic a wóol x sujuy yéetel x qui'ichpam caajil Sión? Nojoch je'el bix le ka'anabo' bey nojochil a xu'ulsajilo'; ¿máax bíin u dzáa ti' teech áantajil?

¹⁴Le náayo'ob tu ka'aytajo'ob ti' teech le aj bóobato'obo' chéen jun p'éel tuus. Ma' tu ye'esajo'ob ti' teech a keban u ti'al ma' u kexpajal bix yanilech; tu ka'aytajo'ob tuusil náayo'ob u ti'al u beetico'ob a wocsic a wóol ti'ob.

¹⁵Le quéen u yilecho'ob le cu bino'ob ti' le bejo' cu papax kabo'ob táan u p'a'astajo'ob; cu xóobo'ob yéetel cu yúuntico'ob u poolo'ob yéetel p'a'astajil táan u ya'alico'ob ba'al tu yo'olal le x qui'ichpam Jerusaleno': ¿Le wa ti' le noj caaj cu ya'ala'al u jach asab qui'ichpamil yóokolcaaba'?

¹⁶Tuláacal a aj p'eeco'obe' cu japico'ob u chi'ob u ti'al u ya'alico'ob ba'al ti' teech. Ichil xóobo'ob yéetel méec chi'e' cu loolob t'aano'ob beya': Dzo'oc c láaj xiixcuntic, úuch jo'op'oc c pa'atic: ¡kuch u kiinil c ilic!

¹⁷Yuumtzile' tu béeycuntaj u jok jo'olo'ob, tu béeycuntaj u t'aan. Tu ju'ujutaj x ma' ch'a'a óotzilil le ba'ax tu yáax tucultaj u ju'ujutique', tu cha'aj u che'ejtiquech le aj p'eec óolo', ca tu dzaj ca'anal u páajtalil le a aj p'eeco'ob.

¹⁸¡X qui'ichpam Sión káat áantaj ti' Yuumtzil! ¡Cha'a u sen áalcab bul kiin, bul áakab u ja'il a wich! ¡Ma' a jáawsic a wokol, ma' a cha'ic u je'elel a wich!

¹⁹Líiken awatnaquech ti' le áakabo' xi'ic u bin a wawat, láal a pucsi'ikal tu táan Yuumtzil, cha'a u yáalcab bey ja'e': tich' a kabo'ob ti' yéetel alab óolal, káat óolt tu yo'olal u cuxtal mejen paalal cu quíimilo'ob tu ti'itz le bejo'obo' tumen mina'an ba'al u ti'al jaantbil.

²⁰Ile, Yuumtzil, dza'aba' a tuculte, mix jun teen a beetmaj ti' mix máac a ba'al beya'. ¿Bíin wa túun u jaant u mejen paalalo'ob le maamaob cu tzéentajo'obo'? ¿Bíin wa quíimsa'ac aj kiino'ob aj bóobato'ob ichil a quili'ich kulnaj?

²¹Jayacbal u yila'al táanquelemo'ob yéetel nuxibo'ob te j bejo'; In j táanquelemo'ob yéetel in x lo'obayano'obe' lúubo'ob tu yej máascab. Tu kiinil a p'uujulile' meyaj loobilajech u ti'al quíimil ¡quinsajnajech x ma' ch'a'a óotzilil!

²²Chi' quíimilil yaan tuláacal tu'ux, cu taalo'ob bey ti' jun p'éel kinbesaje'; tu kiinil a p'uujlile' Yuumtzil, mix máac páatchaj u púudzul. Le máaxo'ob tin tzéentaj yéetel tin ca'anbesajo'obe', quíimsa'abo'ob tumen le aj p'eeco'obo'.