Read Yucateco Lamentaciones 3 Bible Online

Lamentaciones 3 - Yucateco bible

Lamentaciones 3

¹Teen le máax in túuntmaj le yaayaj óolal yáanal u jaadzil u p'uja'anil Yuumtzilo'.

²Tu bisajen ti' éekjoch'e'en cúuchilo'ob, tu beetaj in xíimbal ti' x ma' sáasil bejo'ob.

³Cu cha'ic u lúubul u kab tin wóokol láaj kiin.

⁴Dzo'oc u beetic u la'abal in bakel bey xan in woot'el, dzo'oc u ca'aca'achic in baaquelo'ob;

⁵dzo'oc u bakpachtiquen yéetel káakaj óolal, bey xan yéetel mukyajo'ob;

⁶tu beetaj in cuxtal ichil éekjoche'enil je'el bix le máaxo'ob úuch quíimico'obo'.

⁷tu kalajen ti' jun p'éel káasab x ma' joolil, tu kaxajen yéetel aal máascab suumo'ob.

⁸Quex awatnajen táan in káatic áantaje' ma' tu núucaj in kat óolalo'obi';

⁹tu kalaj in beel yéetel pakil tuunich, ¡tu kexaj táanxel tu'ux u tojil in beelo'ob!

¹⁰Leti'e' bey jun túul león u tacmajubae', bey jun túul oso jach chéen ta'itac u pulicubáa tin wóokole'.

¹¹Dzo'oc u tzelic in wooc ti' le bejo', dzo'oc u tzi'ictiquen, ¡tu p'atajen yéetel sajbe'entzilil!

¹²¡Tu t'inaj le x p'úunche'o' ca tu dzajen bey ba'ax cun u dzon yéetel u x julubo'obe!

¹³Le x julubo'ob j pu'ulo'ob tumen Yuumtzilo' dzo'oc u ch'íiquilo'ob ti' teen jach taamil.

¹⁴Tuláacal in wéet cajnáalo'obe' cu p'astiqueno'ob, láaj kiin teen u tzicbalil u p'a'aso'ob.

¹⁵Yuumtzile' dzo'oc u chupiquen yéetel káakaj óolalo'ob; káaj le ukul tu dzajo'ob ti' teno'.

¹⁶Tu jéemp'uchtaj in cojo'ob te j lu'umo'; tu beetaj in jáapic le lu'umo'.

¹⁷Le jéedzel óolalo' dzo'oc u náachtal ti' teen, yéetel dzo'oc in tu'ubsic ba'ax le qui'imac óolalilo'.

¹⁸Dzo'oc tac in kuchul in tuculte', dzo'oc u quíimil in chuca'an alab óolal ti' Yuumtzil.

¹⁹Quin ka'ajsic in okom óolal yéetel u juunal óolalil in cuxtal, in káakaj óolal yéetel in muuk yaj;

²⁰quéen ch'íiquiquen in tuculte' cu lúubul in wóol.

²¹Ba'ale' jun p'éel ba'al in káat ca ka'ajac teen mantadz yéetel ca in dzáa in alab óolal ti'.

²²U yaabilaj Yuumtzile' mina'an u xuul, mix xan xu'upuc u yutzilo'obi'.

²³Tuláacal ja'atzcab kiine' cu túumbentalo'ob; ¡buca'aj nojoch a chuca'an óolal!

²⁴Aquin wa'alic tin báil: ¡Yuumtzile' leti' tuláacal ba'al kabéet teen: le o'olale' ti' leti' in kubmaj in wóol!

²⁵Yuumtzile' utz yéetel le máaxo'ob u kubmaj u yóolo'ob ti'o' bey xan yéetel le máaxo'ob caxtico'.

²⁶Asab ma'alob u pa'ata'al x ma' t'aanil u yáantaj Yuumtzil.

²⁷Asab ma'alob ca u kub yóol wíinic tu táanquelemil.

²⁸Wíinique' unaj u p'áatal tu juunal yéetel u macmaj u chi', le quéen u yóolt Yuumtzil beyo';

²⁹unaj ichil cabal óolale' u dzu'udzic le lu'umo' ma' xan ca u kam alab óolali'.

³⁰unaj u sutic u p'u'uc ti' le máax loobiltico', yéetel u kamic u asab nojochil a'alaj ba'alo'ob.

³¹Yuumtzile' ma' bíin u p'ato'on mantadz t juunali'.

³²Quex cu beetic u taal yaayaj óolale' cu ch'a'ic óotzilil, tumen u yaabilaje táaj nojoch.

³³Tu jaajile' ma' utz tu t'aan u beetic u mukyaj, mix u dzáic kina'amil ti' wíinico'obi'.

³⁴U xanabcha'ata'al x ma' ch'a'a óotzilil le máaxo'ob kala'ano'ob te j caajo',

³⁵u manba'alcunta'al tu taan u yich Yuumtzil ba'axo'ob u ti'al wíinico',

³⁶u kéechel ba'ax u naj u beeta'al toje', leti' le ba'alo'ob cu xot kinta'al tumen Yuumtzilo'.

³⁷Le quéen a'ala'ac wa ba'ax, le quéen úuchuc wa ba'axe', cu yúuchul tumen Yuumtzile' dzo'oc u ya'alic.

³⁸Le ayikalilo' yéetel le kaaso'obo' cu taalo'ob, tumen bey tu yóoltilac le j Sen ca'anal Yuumtzilo'.

³⁹Wíinique' aj keban ¿ba'ax óolal cu tacjo'olticubáa ti' le c cuxtala'?

⁴⁰Co'one'ex c tucultic tu jaajil bix unaj cuxtal, co'one'ex suut ti' Yuumtzil.

⁴¹Co'one'ex líiksic tuucul yéetel c payalchi' ti' u Kuil ca'an.

⁴²To'one' j kebanchajo'on j ma' u'uyaj t'aano'on teche' ma' ta sa'atso'oni'.

⁴³Ta bakpachtajo'on yéetel a kuuxilil, ta ch'a'apachtajo'on, ta lukesaj c cuxtal x ma' kex óolal.

⁴⁴Ta pixabáa ti' jun p'éel múuyal u ti'al ma' a wu'uyic c kat óolo'ob.

⁴⁵Dzo'oc a béeycuntico'on bey u ta' míis tu taan máaco'obo'.

⁴⁶Tuláacal c aj p'eeco'obe' cu japico'ob u chi'ob u ti'al u ya'alico'ob ba'al t o'olal;

⁴⁷sajaquil, léechil, xu'ulsajil yéetel óotzilil ¡Leti' ba'axo'ob dza'ab ti' to'on!

⁴⁸Cu yáalcabu ja'il in wich tin p'u'uc iquil in wilic u mixbalcunta'al le caaj in yaabiltmajo'.

⁴⁹Táan in wokol x ma' je'elelil tumen ma' bíin yanac teen ch'a'a óolil

⁵⁰wa ma' chéen le quéen kuchuc u kiinil u pactico'on Yuumtzil líikbal tu ca'anilo'.

⁵¹Yaj in wich tac tu dzu' in pucsi'ikal tu yo'olal ba'ax dzo'oc u yúuchul ti' u x ch'úupalal in caajalo'.

⁵²tu yo'olal mix ba'ale' in aj p'eeco'obe' dzo'oc u léechtiqueno'ob bey jun túul ch'iich'e';

⁵³ti' jun p'éel ch'e'ene' tu mucajeno'ob cuxa'anen ca tu macajo'ob u jool yéetel jun p'éel tuunich.

⁵⁴U ja'ile' dzo'oc u pixquen ca tin tucultaje': Quimen yanilen

⁵⁵Tene' Yuumtzil quin ch'a'a chi'itic a kaaba' yanilen tu taamil le ch'e'ena':

⁵⁶Teche' ca wu'uyic in t'aan ma' tu jáawal a ch'en xiquintic in káat óolal.

⁵⁷Le kiin quin t'aniqueche' ca taal tin wicnal ca wa'alic ti' teen: Ma' a ch'a'ic sajaquil.

⁵⁸Yuumtzil teech ca ba'atel tin wo'olal, teech toquic in cuxtal.

⁵⁹Teech ilic ba'ax ma' tu beel cu beeta'al ti' teni', ¡Beet ti' teen ba'ax toj!

⁶⁰Teech ilic bix u kato'ob u beeto'ob ti' teen kaas, yéetel tuláacal le u jok jo'olo'ob cu beetico'ob tin wo'olalo'.

⁶¹Yuumtzil u'uy u ya'alaj ba'alo'ob yéetel tuláacal u jok jo'olo'ob tin wo'olalo'.

⁶²Le máaxo'ob xan u p'ecmajeno'obe' láaj kiin cu bobo' chi'ob tin wo'olal.

⁶³¡Ile', bix ti' tuláacal ba'ax cu beetico'obe' chéen u ti'al u p'a'astiqueno'ob!

⁶⁴Yuumtzil dzáa ti'ob le ba'ax cu najmatico'obo', dzáa ti'ob u najmatil le kaas cu beetico'obo'.

⁶⁵Dzu'uyquint u tuuculo'ob, láal tu yóokolo'ob a loolob t'aan.

⁶⁶Yuumtzil ch'a'apachto'ob yéetel p'uujlil, xu'ulso'ob way tu yóokol caabe'.