Read Yucateco Lamentaciones 4 Bible Online

Lamentaciones 4 - Yucateco bible

Lamentaciones 4

¹¡Dzo'oc u p'áatal budzulbudz le oroo'! ¡dzo'oc xan u lukul u jóopbal le ma'alob oroo'! ¡Ki'itpaja'an yanilo'ob tuláacal tu'ux u tuunichilo'ob le quili'ich cúuchilo'!

²U cajnáalilo'ob Sión, cu tuculta'al ca'ach jach co'oj u tojolo'ob, bey je'el bix u co'ojil oroe' bejela'e' cu yila'alo'ob bey cuumil kat beeta'an tumen óotzil j pat cuum kato'obe'.

³Tac u x ch'uupil u peekilo'ob káaxe' cu tzéentico'ob u yaalo'ob, ba'ale' u noj caajil in wéet cajnáalilo'obe' jach j loolob óol bey jun túul u cuutzil x tocoy lu'ume'.

⁴Le mejen paalal cu chu'ucho'obo' seten ukajo'ob, u yaako'obe' cu táakal tu na'aca'ano'ob. Le paalalo'obo' táan u káatico'ob waaj ba'ale' mix máac xan dzáic ti'ob ti'ob.

⁵Le máaxo'ob ca'ach ya'ab u janalo'obe' bejela'e' táan u quíimilo'ob yéetel wi'ij te j bejo'obo'. Le j ch'íijo'ob ca'ach ich ayikalile' bejela'e' ti' j cajacbalo'ob tu'ux cu pu'ulul u ta' míise'.

⁶U kasa'anil u noj caajil in wéet cajnáalo'obe', asab nojochil ti' u keban Sodoma, lela' jun súutuc xu'ulsa'abic, quex mix máac j líik loobiltic.

⁷Asab sactaco'ob ca'ach ti' ye'eb u yéeybil wíiniquilo'ob, asab sactaco'ob ca'ach ti' u kaab iin; u wíinclilo'obe' asab chac ti' coral; beyo'ob safiro ca'ache'.

⁸Ba'ale' bejela'e' asab booxilo'ob ti' le éekjoche'enilo'obo' ma' tu kaj óolta'alo'ob. U yoot'elo'obe' taakal ti' u baaquelo'ob, ¡tiquin bey si'e'!

⁹Asab ma'alob binic ti' le máaxo'ob j quíimo'ob ichil ba'atelilo' ti' le j quíimo'ob ichil wi'ijilo'obo', tumen lelo'oba' jujun p'íit quíimico'ob ca j p'áat mina'an ba'al u jaanto'ob.

¹⁰Co'olelo'ob utz u pucsi'ikalo'obe', tu chacajo'ob u paalalo'ob tu kabilo'ob; u paalalo'ob meyajnaj ti'ob u ti'al jaantbil le ca j xu'ulsa'ab u noj caajil in wéet cajnáalo'obe'.

¹¹Yuumtzile' tu jáalkabtaj tuláacal u p'uja'anil, ma' tu dzaj p'iisil ti' u kuuxili'; tu t'abaj káak ti' u caajil Sión, tu mixba'alcuntaj tac u chuun pakilo'ob.

¹²Mix bikin tu tucultajo'ob u ajawilo'ob le lu'uma' bey xan tuláacal u jalachilo'ob le yóokolcaaba', wa bíin ococ tu jool najilo'ob Jerusalén u aj p'eeco'ob yéetel u aj kuxlantáanbáil.

¹³¡Tuláacal lela' j úuche' tu yo'olal u aj bóobato'ob yéetel u aj kiino'ob máaxo'ob tu wecajo'ob u ki'ikel le j ma' si'ipilo'ob ichil le noj caajo'!

¹⁴Tacchalac u xíimbalo'ob tu bejilo'ob le noj caajo'obo' beyo'ob ch'óopo'obe'; jach boonol yanilo'ob yéetel ki'ik, le óolale' mix máac cu táabal machic u no'oko'ob.

¹⁵¡Tzelaba'ex, tzelaba'ex cu yaawta'al ti'ob; le máaco'oba' kaas yanilo'ob ma' a machique'exo'ob! chéen j máanel máaco'ob táan u púudzulo'ob, ma' tu páajtal u cajtalo'ob waye' cu ya'alico'ob le j ma' ocsaj óolo'obo'.

¹⁶U taalbal Yuumtzil ki'itbeso'ob, ma' j suunaj u paacat tu tojilo'obi'. Ma' j yanchaj tziiquil ti' le kiino'obo' mix ch'a'ab óotzilil ti' le nuxibo'obo'.

¹⁷Quex ca'ana'an c icho'obe', ba'ale' yéetel chuca'an óolale', taan c pa'atic áantaj, ba'ale' chéen cunel. Yéetel p'il ich taan c pa'atic u kuchul jun p'éel caaj ma' tu páajtal u tocsaj.

¹⁸P'il ichta'an tuláacal c xíimbalo'ob ma' tu páajtal c jóokol ti' le bejo' u kiinil c quíimile' dzo'oc u kuchul; ¡dzo'oc u cóojol c xuulil!

¹⁹Le máaxo'ob ch'a'apachtmailo'ono' asab péeca'an u bino'ob ti' le j cóotilo'ob le ca'ano'; cu ch'a'a pachtco'ono'ob tac ti' le pu'uco'obo', ¡cu dzáico'ob ti' to'on lécho'ob te x tocoy lu'umo'!

²⁰J lúub ti' léech u aj yéeyaj Yuumtzil, le máax dzáic u yóol u cuxtale', le ajaw máax o'olal c a'alique': Tu bo'oy bíin cajlaco'on ichil le caajo'obo'.

²¹¡Che'ejnen, qui'imacchajac a wóol u múuch' caajil Edom; teech máax ca ajawiltic u petenil Uz! ¡Tac ti' teech bíin kuchuc le káakaj ukulo' yaan a p'áatal cala'anech yéetel chacnulech!

²²A jaadzile' dzo'oc u jáawal, u caajil Sión; Yuumtzile' mix bikin bíin u ca'a túuxtech ti' yaanal lu'um. Ba'ale' teche' u múuch' caajil Edom yaan xan u jadziquech tu yo'olal a kasa'anil, yaan xan u chíicbesic a kebano'ob.