Read Yucateco Lamentaciones 5 Bible Online

Lamentaciones 5 - Yucateco bible

Lamentaciones 5

¹Yuumtzil, ka'ajac ti' teech le ba'ax j úuch to'ono'; pacto'on, il bix u ya'ala'al ti' to'on ba'al.

²Tuláacal ba'ax c ti'al ca'ache' bejela'e' ti' yaan tu kab j táanxel lu'umilo'obe'; c otoche' u ti'al máaco'ob cu taalo'ob táanxel lu'umil.

³J ma' yuumo'on, mina'an c taata; c maamaobe' dzo'oc u p'áatalo'ob beyo'ob x quimen íichamo'obe'.

⁴¡Le c o'och ja'e' yaan c manic; le si' c ti'alo' yaan c bo'otic!

⁵Dzo'oc u dza'abal jun p'éel yucalche' t caal ma' tu cha'abal c je'elel.

⁶U ti'al c na'ajtal yéetel waje' kabéet c tich'ic kab ti' egipciob yéetel ti' le j asiriobo'.

⁷C taataobe' kebanchajo'ob, bejela'e' quimeno'ob, to'on cuchic u si'ipilo'ob.

⁸Bejela'e' t'onquinta'ano'on tumen palitzilo'ob, mina'an máax toquico'on ti' u kabo'ob.

⁹C máan tu chi' quíimil u ti'al c náajaltic c o'och waaj actáan ti' u máascabo'ob u aj ba'atelilo'ob x tocoy lu'um.

¹⁰C oot'ele' cu yelel bey jun p'éel chujcab tu yo'olal le chocwil cu dzáic to'on le wi'ijo'.

¹¹Tu caajil Sión yéetel tu caajilo'ob Judae', le co'olelo'ob yéetel le mejen x ch'úupalalo'obe' dzo'oc u pa'aba'al u sujuyilo'ob yéetel jáanpay óolal.

¹²C nuuctaquilo'obe' ch'uyquinta'ano'ob tu kabo'ob, le nuxibo'obo' ma' j tzica'abo'obi'.

¹³Le mu'uka'an xiibo'obo' j dzaabo'ob juuch', le táanquelemo'obo' j lúubo'ob tu yáanal u aalil le si'o'.

¹⁴Bejela'e' mina'an nuxibo'ob tu jool najil le caajo', ma' táan u yu'uba'al u kay u j táanquelemo'ob.

¹⁵Bejela'e' mina'an qui'imac óolal t pucsi'ikal; u yóokotil c qui'imac óolalile' xu'ul ichil óotzil óolal.

¹⁶Lúub ti' c pool le péet jo'olo', ¡Yaj yanilo'on tu yo'olal dzo'oc c kebantal!

¹⁷Le olal koja'an c pucsi'ikal; le olale' budzucnac c paacat.

¹⁸U pu'uquil Sione' jun p'éel j niiquib múul; te'elo' ti' cu susutanquil le ch'omaco'obo'.

¹⁹Ba'ale' teche' Yuumtzil mantadz bíin ajawnaquechi'; ¡Tuláacal ja'abo'ob mina'an u xuul bíin yanaquech ta jalach káanche'!

²⁰¿Ba'axten bíin a tu'ubso'on u ti'al kiino'ob mina'an u xuul? ¿Ba'axten bíin a p'ato'on t juunal ya'abcach kiino'ob?

²¹¡Yuumtzil beet c suut ti' teche', ca suunaco'on! ¡Beet u ca'a p'áatal c cuxtal je'el bix yanil ca'ache'.

²²Ba'ale' teche' dzo'oc a jach cúulpachcuntico'on sen nojoch a p'uja'anil t éetel.