Read Yucateco Ezequiel 10 Bible Online

Ezequiel 10 - Yucateco bible

Ezequiel 10

¹Cu dzo'ocole' tin wilaj tu yóokol le nakca'an yaan tu yóokol u pool le aj xiknal cuxa'ano'obo', j chíicpaj jun p'éel ba'al bey jalach káanche' chica'an ti' zafiroe'.

²Yuumtzile' tu ya'alaj ti' le máac u búucbesmajubáa yéetel lino': Ooquen ichil u x peten che'ilo'ob le bolan yaan tu yáanal le aj xiknal cuxa'ano'obo', ca a ch'a'a jun láap' t'aba'an chúuco'ob, le yano'ob tu chúumuc le aj xiknal cuxa'ano'obo', ca a tos tu yóokol le caajo'. Ca tin wilaj bix úuchic u jupicubáa le máaco'.

³Ti' le súutuco' le aj xiknal cuxa'ano'obo', ti' yano'ob ca'ach tu xaman le kulnajo', cu dzo'ocole' chupa'an tumen jun p'éel múuyal ichil u sujuy táancabil le kulnajo'.

⁴U nojbe'enil Yuumtzil túune' j na'ac tu yóokol le aj xiknal cuxa'ano'obo' ca j bin tu tojil le kulnajo'; le múuyal túuno' tu chupaj le kulnajo', ca sáasilchaj u sujuy táancabil le kulnaj yéetel u juul u nojbe'enil Yuumtzilo'.

⁵U juum u xiiko'ob le aj xiknal cuxa'ano'obo', cu yu'uba'al ca'ach tac te j sujuy pach táancabo'. Óoli' bey táan u t'aan Ku u yuumil tuláacal páajtalile'.

⁶Yuumtzil túune' tu ya'alaj ti' le máac u búucbesmajubáa yéetel linoo', ca u ch'a'a' káak ichil u x peten che'ilo'ob le bolan tu chúumuc le aj xiknal cuxa'ano'obo'. Le máaco' j bine' ca j wa'alaj tu chuun jun p'éel le x peten che'obo'.

⁷Tu yáanal u xiik le aj xiknal cuxa'ano'obo' cu yila'al jun p'éel ba'al bey u kab máaque'. Jun túul ti' le aj cuxa'ano'obo' tu tich'aj u kab tu'ux yaan le káako', ca tu ch'a'aj jun p'íite' ca tu dzaj tu kab le máac u búucbesmajubáa yéetel le linoo', ca tu ch'a'aje' ca j bini.

⁹Tu yicnal le aj xiknal cuxa'ano'obo', tin wilaj can p'éel peten che'ob, jun p'éel tu yicnal u jujun túulilo'ob. Le peten che'obo' cu jóokbalo'ob bey u jóopbal topacioe'.

¹⁰Le can p'éel x peten che'obo' láaj queet nuuctaquilo'ob, cu yila'al bey ti' yaan jun p'éel ichil u láake'.

¹¹Le quéen jo'op'oc u bin le aj xiknal cuxa'ano'ob ti' je'el máacalmáac le can ti'itzo'obo', ma' kabéetchaj u ca suticuba'obi', tumen cu bino'ob xan tu tojil le cu bin táanilo'.

¹²U wíinclilo'ob, u paacho'ob yéetel u xiiko'obe', láaj chuuptaco'ob yéetel juulo'ob tuláacal tu'ux, bey xan yanilo'ob le peten che'obo'.

¹³tin xicnil ti' wu'uyaj xan u dza'abal u kaaba'into'ob Bolan, le peten che'obo'.

¹⁴Tu jujun túulil le aj xiknal cuxa'ano', yaan ca'ach can p'éel u táan yicho'ob: le yáax jun túulo' u táan yich jun túul wacax yaan ca'ach ti'; u ca'a túule' u táan yich jun túul wíinic yaan ca'ach ti'; u yóox túule' u táan yich jun túul león yaan ca'ach ti'; yéetel u can túule' u táan yich jun túul j cóot yaan ca'ach ti'.

¹⁵Le aj cuxa'ano'oba' láili' leti'ob tin wilajo'ob ca'ach tu jáal u yáalcab ja'il Quebaro'. Le aj xiknal cuxa'ano'obo' j líiko'ob.

¹⁶Le quéen jo'op'oc u bino'ob ca'ache' cu binbalo'ob xan le peten che'obo'; Le quéen xit'o'ob u xiiko'ob u ti'al u líikilo'ob tu yóok lu'ume', le peten che'obo', ma' tu lukulo'ob ca'ach tu tzéelo'ob;

¹⁷le quéen wa'alaco'obe' cu wa'atal xan le peten che'obo'; Le quéen líikico'obe' cu líikil xan le peten che'obo', tumen le peten che'obo' jun tacáalili'ob tu yéetelo'ob.

¹⁸U nojbe'enil túun Yuumtzile' j líik tu yóokol le kulnajo' ca j yanchaj tu yóokol le aj xiknal cuxa'ano'obo'.

¹⁹Leti'obe' xiknalnajo'obe' ca j líiko'ob j lu'um. Tene' tin wilaj bix úuchic u líikilo'ob pa'ate' yéetel le peten che'ob yaan tu tzéelo'obo', bey xan bix úuchic u wa'atalo'ob tu jool najil u kulnaj Yuumtzil yaan j lakino'. U nojbe'enil u Ku Israele' ti' yaan ca'ach tu yóokolo'obe'.

²⁰Láili' leti'ob ca'ach le aj xiknal cuxa'ano'ob tin wilaj tu yáanal u Ku Israel tu jáal u yáalcab ja'il Quebar. Ca túun tin wilaj ba'axo'ob.

²¹Tu jujun tu'ilo'obe' yaan ca'ach can p'éel u táan yicho'ob yéetel can p'éel u xiiko'ob, cu dzo'ocole' tu yáanal u xiiko'obe' cu yila'al ca'ach jun p'éel ba'al bey u kab wíinique'.

²²U táan u yicho'obe' bey u táan yicho'ob láili' bey u táan ich le aj xiknal cuxa'ano'ob tin wilajo'ob tu jáal u yáalcab ja'il Quebaro'. Tu jujun túulilo'ob cu xíimbalo'ob actáan.